ທ່ານ ວັນນະສອນ ໂພທິປັນຍາ ຫົວໜ້າຂະແຫນງແຜນການ ພະແນກແຜນການ ແລະ ການລົງທຶນ ໃຫ້ຮູ້ວ່າ: ຫຼັງຈາກແຂວງບໍ່ແກ້ວມີຂົວມິດຕະພາບ ແຫ່ງທີ 4 ໄດ້ເຮັດໃຫ້ສະພາບການລົງທຶນຢູ່ພາຍໃນແຂວງບໍ່ແກ້ວ ມີທ່າອ່ຽງຂະຫຍາຍຕົວເພີ່ມຂຶ້ນເລື້ອຍໆ ສະແດງອອກໃນສົກປີຜ່ານມາ ມີນັກລົງທຶນຂອງເອກະຊົນພາຍໃນ ແລະ ຕ່າງປະເທດ ເຂົ້າມາລົງທຶນ 29 ຫົວໜ່ວຍມີທຶນຈົດທະບຽນທັງໝົດ 104 ຕື້ກີບ ໃນນັ້ນ ຂະແໜງການທີ່ໄດ້ຮັບການລົງທຶນຫຼາຍກວ່າໝູ່ແມ່ນຂົງເຂດກະສິກຳ ແລະ ການບໍລິການ ເປັນຕົ້ນແມ່ນ ໂຮງແຮມ, ບ້ານພັກ, ຮ້ານອາຫານ ແລະ ວຽກງານຂົນສົ່ງໂດຍສານ, ຂົນສົ່ງສິນຄ້າ, ການນຳເຂົ້າສິນຄ້າຜ່ານແດນ, ນັກທ່ອງທ່ຽວມີຈຳນວນເພີ່ມຂຶ້ນເຊັ່ນດຽວກັນ.
ສຳລັບ 6 ເດືອນຕົ້ນປີ 2015-2016 ນີ້ໄດ້ອະນຸມັດກິດຈະການສຳປະທານ 4 ໂຄງການ ລວມມີໂຄງການກໍ່ສ້າງເຂື່ອນໄຟຟ້າ ແລະ ສ້າງຕັ້ງໂຮງງານໂມ້ຫີນ ມູນຄ່າຈົດທະບຽນ 19.6 ລ້ານໂດລາ, ໂຄງການກຳລັງສຶກສາສຳຫຼວດອອກແບບ ແລະ ໄດ້ເຊັນ MOU ແລ້ວໜຶ່ງໂຄງການ ທຶນຈົດທະບຽນ 5 ລ້ານໂດລາ ແລະ ການລົງທຶນເຂົ້າໃນກິດຈະການທົ່ວໄປ ມີ 58 ໂຄງການ ມູນຄ່າ 340.4 ຕື້ກີບ ການລົງທຶນສ່ວນໃຫຍ່ແມ່ນໃນຂົງເຂດກະສິກຳ, ອຸດສາຫະກຳ ແລະ ການບໍລິການເປັນຫຼັກ.
ຂ່າວຈາກ: ເສດຖະກິດ-ການຄ້າ