ຂປລ. ໃນຕອນແລງ ວັນທີ 25 ເມສາ ນີ້, ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ໄດ້ພົບປະຢ້ຽມຢາມ ສະຫາຍ ຫງວຽນຊວນຟຸກ ນາຍົກລັດຖະມົນຕີ ແຫ່ງ ສສ ຫວຽດນາມ ໃນການພົບປະດັ່ງກ່າວ, ສະຫາຍ ຫງວຽນຊວນຟຸກ ໄດ້ຕາງໜ້າໃຫ້ຄະນະລັດຖະບານຫວຽດນາມ ສະແດງຄວາມຊົມເຊີຍ ຕໍ່ສະຫາຍ ບຸນຍັງ ວໍລະຈິດ ແລະ ບັນດາສະຫາຍ ທີ່ໄດ້ຮັບການເລືອກຕັ້ງ ໃຫ້ເປັນການນໍາສູງສຸດ ຂອງ ສປປ ລາວ ເພື່ອສືບຕໍ່ຊີ້ນໍາ ນໍາພາປະຊາຊົນລາວ ພັດທະນາສ້າງສາປະເທດຊາດ ໃຫ້ຈະເລີນເຂັ້ມແຂງ. ໃນຖານະທີ່ເປັນນາຍົກລັດຖະມົນຕີ ແລະ ຄະນະໃນລັດຖະບານຫວຽດນາມ ຈະເຮັດທຸກຄວາມ ສາມາດຂອງຕົນ ເພື່ອເພີ່ມພູນຄູນສ້າງຄວາມສາມັກຄີພິເສດ ແລະ ການຮ່ວມມືຮອບດ້ານລາວ-ຫວຽດນາມ, ຫວຽດນາມ-ລາວ ໃຫ້ນັບມື້ກວ້າງຂວາງໝັ້ນຄົງຕະຫລອດໄປ.
ສະຫາຍ ບຸນຍັງ ວໍລະຈິດ ຕາງໜ້າໃຫ້ຄະນະຜູ້ແທນຂັ້ນສູງ ສປປ ລາວ ສະແດງຄວາມຂອບໃຈຕໍ່ການຕ້ອນຮັບ ອັນອົບອຸ່ນຈາກ ທ່ານ ຫງວຽນຊວນຟຸກ ແລະ ຄະນະລັດຖະບານຫວຽດນາມ ໃນໂອກາດເດີນທາງມາຢ້ຽມຢາມ ຢ່າງເປັນທາງການໃນຄັ້ງນີ້ ເຊິ່ງການພົບປະກັບ ສະຫາຍ ເລຂາທິການໃຫຍ່ ຫງວຽນຟູຈ້ອງ ກໍໄດ້ມີ ຄວາມເປັນເອກະພາບສູງ ກ່ຽວກັບການເສີມຂະຫຍາຍມູນເຊື້ອ ແຫ່ງຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ພ້ອມປຶກສາຫາລືເຖິງແຜນການຮ່ວມມືໃນຕໍ່ໜ້າ ເພື່ອຜົນປະໂຫຍດ ຂອງປະຊາຊົນສອງຊາດ ແລະ ປະກອບສ່ວນສຳຄັນ ເຂົ້າໃນການຮັກສາຄວາມໝັ້ນຄົງ ໃນພາກພື້ນ ແລະ ສາກົນ.
ໃນຕອນແລງຂອງວັນດຽວກັນ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ກໍໄດ້ເດີນທາງໄປພົບປະຢ້ຽມຢາມ ສະຫາຍ ນາງ ຫງວຽນທິກີມເງີນ ປະທານສະພາແຫ່ງຊາດຫວຽດນາມ. ໃນໂອກາດນີ້ ສະຫາຍ ປະທານສະພາແຫ່ງຊາດຫວຽດນາມ ໄດ້ຕາງໜ້າໃຫ້ສະພາແຫ່ງຊາດ ສະແດງຄວາມຊົມເຊີຍມາຍັງ ສະຫາຍ ບຸນຍັງ ວໍລະຈິດ ທີ່ໄດ້ຮັບການແຕ່ງຕັ້ງ ໃຫ້ເປັນເລຂາທິການໃຫຍ່ ຄະນະບໍລິຫານງານສູນກາງພັກ, ທັງເປັນປະທານປະເທດ ແຫ່ງ ສປປ ລາວ ຄົນໃໝ່. ການເດີນທາງມາຢ້ຽມຢາມສັນຖະວະໄມຕີ ສສ ຫວຽດນາມ ຢ່າງເປັນທາງການ ຂອງສະຫາຍ ບຸນຍັງ ວໍລະຈິດ ຄັ້ງນີ້ໄດ້ສະແດງໃຫ້ເຫັນການພົວພັນທີ່ດູດດື່ມ ແລະ ຄວາມສາມັກຄີພິເສດ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ເຊື່ອໝັ້ນວ່າ ດ້ວຍບົດຮຽນ ແລະ ປະສົບການ ຂອງສະຫາຍ ບຸນຍັງ ວໍລະຈິດ ຈະນຳພາປະເທດຊາດກ້າວຂຶ້ນຢ່າງບໍ່ຢຸດຢັ້ງ. ພ້ອມນີ້, ສະຫາຍ ນາງ ຫງວຽນ ທິກີມເງີນ ກໍໄດ້ແຈ້ງໃຫ້ ສະຫາຍ ບຸນຍັງ ວໍລະຈິດ ຊາບກ່ຽວກັບຜົນສຳເລັດ ການດຳເນີນກອງປະຊຸມສະໄໝ ທີ XI ຂອງສະພາແຫ່ງຊາດຫວຽດນາມ ເຊິ່ງໄດ້ມີການກຳນົດແຕ່ງຕັ້ງ ບຸກຄົນສຳຄັນໃນຄະນະລັດຖະບານຊຸດໃໝ່ ຂອງຫວຽດນາມ ດ້ວຍຜົນສຳເລັດທີ່ຈົບງາມ. ຕໍ່ກັບການຮ່ວມມືລະຫວ່າງສອງສະພານັ້ນ ແມ່ນນັບມື້ກວ້າງຂວາງ ເພື່ອເຮັດໃຫ້ສະພາແຫ່ງຊາດ ເປັນອົງການນິຕິບັນຍັດ ແລະ ເປັນເວທີສະແດງຄວາມຄິດເຫັນ ຂອງປະຊາຊົນ ເພື່ອປະຊາຊົນຢ່າງແທ້ຈິງ.
ໃນຕອນຄໍ່າ ຂອງວັນດຽວກັນ ສະຫາຍ ຫງວຽນຟູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກ ແລະ ສະຫາຍ ເຈີ່ນດາຍກວາງ ປະທານປະເທດ ແຫ່ງ ສສ ຫວຽດນາມ ໄດ້ຈັດງານລ້ຽງເປັນກຽດຕ້ອນຮັບ ສະຫາຍ ບຸນຍັງ ວໍລະຈິດ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ພ້ອມຄະນະ ທີ່ໄດ້ເດີນທາງຢ້ຽມຢາມສັນຖະວະໄມຕີ ສສ ຫວຽດນາມ ຢ່າງເປັນທາງການ ແລະ ອວຍພອນໃຫ້ຄວາມສາມັກຄີພິເສດ, ການຮ່ວມມືຮອບດ້ານ ລາວ-ຫວຽດນາມ ຈົ່ງໝັ້ນຄົງຖະນົງແກ່ນຕະຫລອດກາລະນານ, ອວຍພອນໃຫ້ການຢ້ຽມຢາມ ສສ ຫວຽດນາມ ຂອງຄະນະຜູ້ແທນຂັ້ນສູງ ສປປ ລາວ ປະສົບຜົນສຳເລັດ ຢ່າງຈົບງາມ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!