ຂປລ. ວັນທີ 25 ເມສາ ນີ້, ທ່ານ ສຈ.ດຣ ບໍ່ວຽງຄໍາ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ທັງເປັນປະທານ ສະພາວິທະຍາສາດແຫ່ງຊາດ ໄດ້ຖະແຫລງຂ່າວຕໍ່ສື່ມວນຊົນ ກ່ຽວກັບວັນຊັບສິນທາງປັນຍາໂລກ 26 ເມສາ ໂດຍມີບາງຕອນ ໃຫ້ຮູ້ວ່າ: ສປປ ລາວ ໄດ້ພ້ອມກັບບັນດາປະເທດສະມາຊິກ ອົງການຊັບສິນ ທາງປັນຍາໂລກ ຈັດງານສະເຫລີມສະຫລອງ ວັນຊັບສິນທາງປັນຍາໂລກ ພາຍໃຕ້ຄໍາຂວັນ “ການປະດິດສ້າງລະບົບດີຈີຕອນ ແມ່ນວັດທະນະທຳແຫ່ງຈິນຕະນາການໃໝ່” ເຊິ່ງເນັ້ນໃຫ້ເຫັນເຖິງ ບົດບາດຄວາມສຳຄັນຂອງການປະດິດສ້າງ ແລະ ພັດທະນາລະບົບດີຈີຕອນ ເພື່ອນຳໃຊ້ເຂົ້າໃນທຸກໆຂົງເຂດວຽກງານ ເປັນຕົ້ນການນຳໃຊ້ເຕັກໂນໂລຊີ ຂໍ້ມູນຂ່າວສານລະບົບດີຈີຕອນ ໃນບັນດາຂະແໜງການຕ່າງໆ ກໍຄືໃນຊີວິດການເປັນຢູ່ຂອງມວນມະນຸດ ຈົນກາຍເປັນວັດທະນະທຳ ໃນຍຸກປັດຈຸບັນ.
ສຳລັບງານສະເຫລີມສະຫລອງວັນດັ່ງກ່າວ, ໄດ້ຈັດຂຶ້ນຢ່າງເປັນທາງການ ໃນວັນທີ 26 ເມສາ ນີ້, ຢູ່ນະຄອນຫລວງວຽງຈັນ ໂດຍມີຫລາກຫລາຍກິດຈະກຳ ເປັນຕົ້ນວາງສະແດງ ຊັບສິນທາງປັນຍາ, ປາຖະກະຖາ, ສະແດງສິລະປະ ວັນນະຄະດີ ແລະ ອື່ນໆ ເພື່ອສ້າງຈິດສຳນຶກໃຫ້ແກ່ສັງຄົມເຂົ້າໃຈ ກ່ຽວກັບພາລະບົດບາດ ແລະ ຄວາມສຳຄັນ ຂອງວຽກງານຊັບສິນທາງປັນຍາ, ເປັນຕົ້ນກ່ຽວກັບສິດທິບັດ, ອະນຸສິດທິບັດ, ເຄື່ອງໝາຍການຄ້າ, ລິຂະສິດ ແລະ ຜົນງານຊັບສິນທາງປັນຍາດ້ານອື່ນໆ. ພ້ອມນັ້ນ, ຍັງເປັນການສະແດງ ເຖິງຄວາມເຄົາລົບ ແລະ ຍ້ອງຍໍ ສັນລະເສີນຜົນງານ ແລະ ພູມປັນຍາຂອງບັນດານັກຄົ້ນຄວ້າວິທະຍາສາດ, ນັກປະດິດສ້າງ ແລະ ປະດິດຄິດແຕ່ງ ເພື່ອຊຸກຍູ້ສົ່ງເສີມການການສ້າງສາ ແລະ ພັດທະນາປະເທດຊາດ ໃຫ້ຈະເລີນຮຸ່ງເຮືອງ.
ສປປ ລາວ ໄດ້ເຂົ້າເປັນສະມາຊິກ ອົງການຊັບສິນທາງປັນຍາໂລກ ມາແຕ່ປີ 1995, ສາມາດບັນລຸ ຜົນງານໃນຫລາຍດ້ານ ເປັນຕົ້ນໃນປີ 1997 ໄດ້ເຄື່ອນໄຫວ ໃນໜ່ວຍງານການຮ່ວມມືຊັບສິນທາງປັນຍາອາຊຽນ, ປີ 1998 ໄດ້ເຂົ້າເປັນພາຄີສົນທິສັນຍາປາຣີ ວ່າດ້ວຍການປົກປ້ອງຊັບສິນທາງອຸດສາຫະກໍາ, ປີ 2006 ໄດ້ເຂົ້າເປັນພາຄີສົນທິສັນຍາ ວ່າດ້ວຍການຮ່ວມມືດ້ານສິດທິບັດ, ປີ 2012 ເປັນພາຄີສົນທິສັນຍາເບີນ ວ່າດ້ວຍການປົກປ້ອງສິລະປະວັນນະກໍາ, ເປັນເຈົ້າການສ້າງ ແລະ ປັບປຸງກົດໝາຍ ວ່າດ້ວຍຊັບສິນທາງປັນຍາ ແລະ ໄດ້ສ້າງລະບຽບການ ເພື່ອຈັດຕັ້ງປະຕິບັດກົດໝາຍດັ່ງກ່າວ ໃຫ້ສອດຄ່ອງກັບລະບຽບທາງການ ດ້ານຊັບສິນທາງປັນຍາຂອງສາກົນ. ທີ່ສໍາຄັນ ໄດ້ສ້າງເງື່ອນໄຂໃຫ້ ສປປ ລາວ ໄດ້ເຂົ້າເປັນສະມາຊິກ ອົງການການຄ້າໂລກ ໃນວັນທີ 2 ມີນາ 2013 ແລະ ສ້າງເງື່ອນໄຂຮອງຮັບ ໃຫ້ແກ່ການເຂົ້າຮ່ວມ ປະຊາຄົມເສດຖະກິດອາຊຽນ ກໍຄືການເຊື່ອມໂຍງເສດຖະກິດ ກັບພາກພື້ນ ແລະ ສາກົນ.
ແຫລ່ງຂ່າວ:
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!