ທ່ານ ທອງລຸນ ສີສຸລິດ ນາຍົກລັດຖະມົນຕີຄົນໃໝ່ແຫ່ງ ສປປ ລາວໄດ້ກ່າວບາງຕອນລະຫວ່າງກອງປະຊຸມຄັ້ງປະຖົມມະລືກຂອງສະພາແຫ່ງຊາດຊຸດທີ VIII ວ່າ: ຖ້າວ່າພວກເຮົາຈຳກັດໄດ້ ການລະເມີດວິໄນແຜນການ, ການເງິນ, ວິໄນເງິນຕາໃຫ້ດີກວ່າເກົ່າຈະເຮັດໃຫ້ການຄຸ້ມຄອງໜີ້ສິນ ແລະ ຈຳກັດການຮົ່ວໄຫລໄດ້ດີ ທັງພະຍາຍາມອັດຊ່ອງວ່າງ ທີ່ມີລັກສະນະເປັນການສະສົມ ເພື່ອຈຳກັດສະພາວະທົດຖອຍຂອງເສດຖະກິດ ເພື່ອບໍ່ໃຫ້ເປັນການກະທົບເຖິງເສດຖະກິດມະຫາພາກ; ການຄຸ້ມຄອງຊັບພະຍາກອນຂອງຊາດເປັນຕົ້ນແມ່ນ:

ແມ່ນການຈັດສັນ ແລະ ນຳໃຊ້ຊັບພະຍາກອນປ່າໄມ້, ບໍ່ແຮ່, ທີ່ດິນ ພວກເຮົາກຳລັງມີຄວາມທ້າທາຍເຖິງຄວາມຍືນຍົງ, ປະເຊີນກັບການອຸດຕັນ ອັນເນື່ອງມາຈາກກົນໄກ ແລະ ລະບຽບການຕ່າງໆ ທີ່ບໍ່ທະລຸໂລ່ງ ບໍ່ບຸກທະລຸພໍເທົ່າໃດ ເຊິ່ງເປັນສິ່ງກີດຂວາງ ອາດຈະນຳໄປສູ່ການຂາດຄວາມເຊື່ອໝັ້ນ ຕໍ່ຜູ້ປະກອບການ ແລະ ການຂະຫຍາຍຕົວຂອງທຸລະກິດ, ສ້າງສິ່ງຈຳກັດໃຫ້ແກ່ການປຸກລະດົມ ການມີສ່ວນຮ່ວມຂອງສັງຄົມ ເພື່ອສ້າງກຳລັງແຮງຊ່ວຍໜູນເຊິ່ງກັນ ແລະ ກັນ ເພື່ອແນ່ໃສ່ການສ້າງໄດ້ກຳລັງແຮງສັງລວມ ທີ່ຈະນຳເອົາການພັດທະນາຮອບດ້ານ ທີ່ເປັນຂະບວນຟົດຟື້ນນັ້ນ ຍັງເຮັດບໍ່ທັນໄດ້ຫລາຍເທົ່າທີ່ຄວນ ແລະ ຊັບພະຍາກອນມະນຸດເຮົາຍັງຂາດເຂີນ ຕອບສະໜອງບໍ່ທັນກັບຄວາມຕ້ອງການ ຂອງການພັດທະນາ ແລະ ການເຊື່ອມໂຍງ.

ຂ່າວຈາກ: ສຳນັກຂ່າວສານປະເທດລາວ