ພິທີມອບ-ຮັບໜ້າທີ່ລັດຖະມົນຕີກະຊວງການເງິນລະຫວ່າງທ່ານ ລຽນທີແກ້ວ ຜູ້ເກົ່າທີ່ຖືກຍົກຍ້າຍໃຫ້ໄປຮັບໜ້າທີ່ໃໝ່ຢູ່ກະຊວງກະສິກໍາ ແລະ ປ່າໄມ້ແລະ ທ່ານ ສົມດີ ດວງດີ ຮອງນາຍົກລັດ ຖະມົນຕີ, ລັດຖະມົນຕີກະຊວງການເງິນຜູ້ໃໝ່, ໄດ້ຈັດຂຶ້ນໃນຕອນເຊົ້າວັນທີ 25 ເມສານີ້ທີ່ກະຊວງດັ່ງກ່າວ, ໂດຍການໃຫ້ກຽດເຂົ້າຮ່ວມຂອງທ່ານນາຍົກລັດຖະມົນຕີ ທອງລຸນ ສີສຸລິດ, ມີບັນດາລັດ ຖະມົນຕີ, ຄະນະພັກ ແລະ ພະນັກງານຫລັກແຫລ່ງອ້ອມຂ້າງກະຊວງການເງິນເຂົ້າຮ່ວມເປັນຈໍານວນຫລາຍ, ໂດຍປະຕິບັດຕາມການຕົກລົງຂອງກົມການເມືອງສູນກາງພັກ, ສະພາແຫ່ງຊາດ ແລະ ລັດຖະດໍາລັດຂອງປະທານປະເທດແຫ່ງ ສປປ ລາວ, ຊຶ່ງກ່ອນຈະມາຮັບໜ້າທີ່ລັດຖະມົນຕີການເງິນຄັ້ງນີ້ທ່ານ ສົມດີ ດວງດີ ແມ່ນເປັນລັດຖະມົນຕີກະຊວງແຜນການ ແລະ ລົງທຶນ.
ໃນໂອກາດນີ້, ທ່ານາຍົກລັດຖະມົນຕີ ທອງລຸນ ສີສຸລິດ ໄດ້ໂອ້ລົມຊີ້ນໍາ, ຊຶ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຜົນສຳເລັດທີ່ກະຊວງການເງິນໄດ້ສູ້ຊົນຜ່ານຜ່າ ພາຍໃຕ້ການຊີ້ນໍາ-ນໍາພາຂອງທ່ານລັດຖະມົນຕີຜູ້ເກົ່າພ້ອມຄະນະ,ໂດຍສະເພາະແມ່ນເອົາໃຈໃສ່ແກ້ໄຂບັນຫາທີ່ເຄັ່ງຮ້ອນທາງດ້ານການເງິນ-ງົບປະມານຂອງຊາດທີ່ມີຄວາມຫຍຸ້ງຍາກໄດ້ຜ່ອນຄາຍດີຂຶ້ນເປັນລໍາດັບ ເປັນ ຕົ້ນ: ແກ້ໄຂເງິນເດືອນພະນັກງານ-ລັດຖະກອນ, ເງິນອຸດໜູນໃນສົກປີ 2013-2014, ແກ້ໄຂບັນຫາໜີ້ສີນຕ່າງປະເທດ, ໜີ້ສີນການລົງທຶນຂອງລັດຕ່າງໆໃຫ້ຫລຸດຜ່ອນລົງ, ປັບປຸງໂຄງສ້າງ ແລະ ຄຸ້ມຄອງລາຍຮັບ-ລາຍຈ່າຍງົບປະມານ,ປັບປຸງກົນໄກ ແລະ ລະບຽບກົດໝາຍໃນການຈັດເກັບລາຍຮັບໃຫ້ຮັດກຸມ, ພ້ອມທັງເນັ້ນວ່າການມອບ-ຮັບໜ້າທີ່ລັດຖະມົນຕີການເງິນຄັ້ງນີ້ເປັນເລື່ອງປົກກະຕິໃນການປັບປຸງ,ຊັບຊ້ອນລະບົບການຈັດຕັ້ງຂອງລັດຖະບານ ເພື່ອໃຫ້ສອດຄ່ອງກັບຄວາມຮຽກຮ້ອງ
ຕ້ອງການຂອງໜ້າທີ່ການເມືອງໄລຍະໃໝ່ ແລະ ສອດຄ່ອງກັບການພັດທະນາເສດຖະກິດ-ສັງຄົມແຫ່ງຊາດໃນຍຸກເຊື່ອມໂຍງພາກພື້ນ ແລະ ສາກົນ. ໃນທ່າມກາງສະພາບເສດຖະກິດຂອງໂລກຍັງບໍ່ທັນຟື້ນຕົວດີ, ຂະນະດຽວກັນການເຂົ້າເປັນປະຊາຄົມເສດຖະກິດອາຊຽນ (AEC) ກໍນັບມື້ມີການແຂ່ງຂັນສູງ,ຈຶ່ງມີທັງຂໍ້ສະດວກ, ກາລະໂອກາດ ແລະສິ່ງທ້າທາຍຫລາຍປະການ, ຊຶ່ງພວກຈະຕ້ອງໄດ້ພ້ອມກັນສູ້ຊົນຜ່ານຜ່າໃຫ້ໄດ້, ຊຶ່ງໜຶ່ງໃນນັ້ນກໍແມ່ນບັນຫາການເງິນ-ງົບປະມານທີ່ປະເທດເຮົາ
ພວມພະເຊີນຢູ່ໃນປັດຈຸບັນ. ສະນັ້ນ ຮຽກຮ້ອງໃຫ້ທ່ານຮອງນາຍົກລັດຖະມົນຕີ, ລັດຖະມົນຕີການເງິນຜູ້ໃໝ່ພ້ອມໝູ່ຄະນະພັກກະຊວງດັ່ງກ່າວຈົ່ງໄດ້ສືບຕໍ່ເອົາໃຈໃສ່ບັນຫາສໍາຄັນຈໍານວນໜຶ່ງຄື:ແກ້ໄຂບັນຫາການຂາດດຸນງົບປະມານ, ຄົ້ນຄວ້າມາດຕະການກະຕຸ້ນການເກັບລາຍຮັບງົບປະມານໃຫ້ໄດ້ຫລາຍ ແລະ ອັນສໍາຄັນແມ່ນໃຫ້ເພີ່ມທະວີການຕິດຕາມກວດກາບັນດາແຫລ່ງລາຍຮັບ ແລະ ການ ເຄື່ອນໄຫວຂອງພະນັກງານລັດຖະກອນໃນຂະແໜງການເງິນເພື່ອໃຫ້ເຄື່ອນໄຫວຖືກຕ້ອງຕາມລະ ບຽບກົດໝາຍ, ມີຄວາມໂປ່ງໃສ ແລະ ແກ້ໄຂປະກົດການຫຍໍ້ທໍ້ຕ່າງໆໃນຂະແໜງການເງິນໃຫ້ຫລຸດຜ່ອນລົງເທື່ອລະກ້າວ.
ຂ່າວຈາກ: ໜັງສືພິມ ລາວພັດທະນາ