ຂປລ. ໃນວັນທີ 25-29 ເມສາ ນິ້ ທີ່ຫໍປະຊຸມ ຫ້ອງວ່າການສູນກາງພັກ ສະຫາຍ ພັນຄໍາ ວິພາວັນ ຜູ້ປະຈໍາການ ຄະນະເລຂາທິການ ສູນກາງພັກ ຮອງປະທານປະເທດ ໄດ້ໃຫ້ກຽດ ເປັນປະທານ ໄຂບັ້ນດຳເນີນ ການເຊື່ອມຊຶມ ມະຕິກອງປະຊຸມໃຫຍ່ ຄັ້ງທີ X ຂອງພັກ ຊຸດທີ III ໃຫ້ແກ່ພະນັກງານຫລັກແຫລ່ງ ຂອງບັນດາກະຊວງ ອ້ອມຂ້າງສູນງກາງ ເພື່ອສ້າງຄວາມເຂົ້າໃຈ ເປັນເອກະພາບ ແລະ ເລິກເຊິ່ງຕໍ່ເນື້ອໃນຈິດໃຈ ທີ່ໄດ້ກຳນົດໄວ້ ໃນມະຕິສຳຄັນດັ່ງກ່າວ. ບົນພື້ນຖານສ້າງການຫັນປ່ຽນ ທາງດ້ານແນວຄິດ–ຈິນຕະນາ ການຢ່າງເປັນລະບົບ ແລະ ກ້າວໄປສູ່ ການເປັນເຈົ້າການຈັດຕັ້ງ ຜັນຂະຫຍາຍ ໃຫ້ເກີດໝາກຜົນຕົວຈິງ.
ສະຫາຍ ພັນຄໍາ ວິພາວັນ ໄດ້ຊີ້ນຳໃຫ້ ບັ້ນເຊື່ອມຊຶມມະຕິ X ຄັ້ງນີ້ ກາຍເປັນບັນຫາສຳຄັນ ໃນການເສີມຂະຫຍາຍ ສະຕິປັນຍາ, ຄວາມຮັບຜິດຊອບ ຂອງຖັນແຖວພະນັກງານ ຢູ່ຂັ້ນສູນກາງ ແລະ ທ້ອງຖິ່ນ ເພື່ອວິເຄາະໃຈ້ແຍກ ສະພາວະຄວາມເປັນຈິງ ຂອງພາລະກິດປົກປັກຮັກສາ ແລະ ສ້າງສາປະເທດຊາດ ຕາມທັດສະນະຂອງພັກ. ເພື່ອເຫັນແຈ້ງ ແລະ ເຂົ້າໃຈຢ່າງເລິກເຊິ່ງ ຕໍ່ບັນຫາຕ່າງໆ ໃນການຕີລາຄາຈຸດດີຜົນງານ, ດ້ານອ່ອນ, ຂໍ້ຄົງຄ້າງ, ເຂົ້າໃຈແຈ້ງ ແລະ ກໍາແໜ້ນບັນຫາຕົວຈິງ ທີ່ຕ້ອງໄດ້ແກ້ໄຂຢ່າງຮິບດ່ວນ, ຮັບປະກັນການບຸກທະລຸ ດ້ານແນວຄິດຈິນຕະນາການ, ກ້າວສູ່ການກະທໍາຕົວຈິງ ໃຫ້ມີການປ່ຽນແປງຈະແຈ້ງ, ສ້າງຄວາມພ້ອມແກ່ການ ແກ້ໄຂບັນຫາຕ່າງໆທີ່ເກີດຂຶ້ນ, ຕອບສະໜອງຄວາມຄອງຄອຍ ຂອງປະຊາຊົນ ເຮັດໃຫ້ການ ຜັນຂະຫຍາຍມະຕິ X ເປັນຂະບວນການຟົດຟື້ນ ແຂງແຮງ ແລະ ມີຜົນສຳເລັດ ຢ່າງເປັນຮູບປະທຳ, ສ້າງບາດລ້ຽວ ໃນການພັດທະນາປະເທດ, ນຳເອົາປະເທດຊາດຫລຸດພົ້ນ ອອກຈາກສະພາວະ ດ້ອຍພັດທະນາ ໃນປີ 2020, ສ້າງພື້ນຖານອັນໜັກແໜ້ນ ໃຫ້ແກ່ການພັດທະນາແບບຍືນຍົງ ສູ່ຈຸດໝາຍສັງຄົມນິຍົມ. ສິ່ງສຳຄັນເປັນການສະແດງ ເຖິງຄວາມຕັດສິນໃຈ ຂອງຄະນະນຳ ທີ່ຈະພ້ອມກັນ ຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍທົດສອບຕ່າງໆ ໃນຊຸມປີຕໍ່ໜ້າ ຢ່າງກ້າຫານເດັດຂາດ.
ສະຫາຍ ພັນຄໍາ ວິພາວັນ ໄດ້ຊີ້ນຳຕື່ມວ່າ: ບັ້ນເຊື່ອມຊຶມຄັ້ງນີ້ ໃຫ້ສຸມໃສ່ຄົ້ນຄວ້າ 5 ເອກະສານສຳຄັນ ທີ່ເປັນລັກສະນະ ສຳມະນາ ແລະ ເປີດກວ້າງປະຊາທິປະໄຕ ໃນການປະກອບ ຄຳຄິດຄຳເຫັນ, ພ້ອມກັນຕີລາຄາ ທັງເປັນເອກະພາບ ຕໍ່ກັບການຕັດສິນໃຈ ແກ້ບັນຫາ ໃຫ້ມີການຫັນປ່ຽນ ຢ່າງຈະແຈ້ງ ໂດຍສະເພາະ ຕໍ່ບັນຫາຄົງຄ້າງ ທີ່ສັງຄົມມີຄວາມເປັນຫ່ວງ ແລະ ຮຽກຮ້ອງໃຫ້ ມີການແກ້ໄຂໃນປັດຈຸບັນ ເພື່ອປັບປຸງຄວາມເຊື່ອໝັ້ນ ແລະ ສັດທາ ຂອງປະຊາຊົນ ຕໍ່ພັກເຮົາ. ສຳລັບບັນຫາສຳຄັນ ທີ່ໄດ້ມີການຄົ້ນຄວ້າ ເຊື່ອມຊຶມຄັ້ງນີ້ ແມ່ນມີລັກສະນະ ຍຸດທະສາດ ທີ່ຕິດພັນໂດຍກົງ ຕໍ່ຄວາມຮັບຜິດຊອບ ການເມືອງຂອງຄະນະນຳ ແຕ່ລະຂັ້ນ ໃນການສ້າງບາດລ້ຽວໃໝ່ ເພື່ອໃຫ້ການຊີ້ນຳນຳພາ ຂອງພັກໃນ 5 ປີ ຕໍ່ໜ້າ ມີຜົນສຳເລັດອັນຈົບງາມ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!