ວັນ​ທີ 22 ເມ­ສາ​ຜ່ານ​ມາ ທີ່​ກອງ​ປະ­ຊຸມ​ສະ­ພາ​ຄັ້ງ​ປະ­ຖົມ​ມະ​ລືກ​ຂອງ​ສະ­ພາແຫ່ງ​ຊາດຊຸດ​ທີ VIII ທ່ານ ນາງ ສີ­ໃສ ລື​ເດດ​ມູນ​ສອນ ຮອງ​ປະ­ທານ​ສະ­ພາ​ແຫ່ງ​ຊາດໄດ້​ຂຶ້ນ​ລາຍ​ງານ​ກ່ຽວ​ກັບແຜນ­ການ​ສ້າງ ແລະ​ ປັບ­ປຸງ​ກົດ­ໝາຍ 5 ປີ (2016-2020) ຂອງ​ສະ­ພາ​ແຫ່ງ​ຊາດ​ຊຸດ​ທີ VIII ເພື່ອ​ໃຫ້​ບັນ­ດາ​ສະ­ມາ­ຊິກ​ສະ­ພາ​ປະ­ກອບ​ຄຳ​ຄິດ​ຄຳເຫັນ ແລະ​ຮັບ­ຮອງ​ເອົາ.

ສຳ­ລັບ​ການ​ລາຍ​ງານ​ດັ່ງ­ກ່າວ​ມີ​ເນື້ອ​ໃນ​ລະ­ບຸ​ວ່າ:ກົດ­ໝາຍ​ທີ່​ຈະ​ສ້າງ ແລະ​ປັບ­ປຸງ​ໃນ​ໄລຍະ 5 ປີ ແຕ່​ປີ 2016-2020 ທີ່​ສະ­ພາແຫ່ງ​ຊາດ ແລະ​ລັດ­ຖະ­ບານ​ໄດ້​ເປັນ​ເອກະ​ພາບ​ກັນ​ມີ​ທັງ​ໝົດ 105 ສະ­ບັບ, ໃນນັ້ນ ກົດ­ໝາຍ​ສ້າງ​ໃໝ່ 50 ສະ­ບັບ ແລະ ກົດ­ໝາຍ​ປັບ­ປຸງ 55 ສະ­ບັບ, ຊຶ່ງ​ແບ່ງອອກ​ເປັນ 5 ຂົງ­ເຂດ​ຄື: ກົດ­ໝາຍ​ໃນ​ຂົງ ເຂດ​ການ​ປົກ­ຄອງ ແລະ​ ຍຸ­ຕິ​ທຳ​ມີ 21 ສະ ບັບ, ໃນ​ນີ້​ກົດ­ໝາຍ​ສ້າງ​ໃໝ່ 5 ສະ­ບັບປະ­ກອບ​ມີ: ປະ­ມວນ​ກົດ­ໝາຍ​ອາ­ຍາ, ປະມວນ​ກົດ­ໝາຍ​ແພ່ງ, ກົດ­ໝາຍ​ວ່າ​ດ້ວຍການ​ຄຸ້ມ​ຄອງ​ພົນ­ລະ­ເມືອງ, ກົດ­ໝາຍວ່າ​ດ້ວຍ​ລັດ­ຖະ­ກອນ​ຕຸ­ລາ­ການ ແລະ​ກົດໝາ­ຍວ່າ​ດ້ວຍ​ການ​ສຳ​ຫຼວດ​ວັດ­ແທກ, ຖ່າຍ​ພາບ​ທາງ​ອາ­ກາດ, ການ​ສ້າງ​ແຜນທີ່, ທີ່​ເຫຼືອ​ແມ່ນ​ກົດ­ໝາຍ​ປັບ­ປຸງ.

ສ່ວນ​ກົດ­ໝາຍ​ໃນ​ຂົງ­ເຂດ​ເສດ­ຖະ­ກິດມີ​ທັງ​ໝົດ 51 ສະ­ບັບ, ໃນ​ນີ້ກົດ­ໝາຍ ສ້າງ​ໃໝ່ 27 ສະ­ບັບ, ກົດ­ໝາຍ​ປັບ­ປຸງ 24 ສະ­ບັບ, ກົດ­ໝາຍ​ໃນ​ຂົງ­ເຂດ​ວັດ­ທະ­ນະທຳ-ສັງ­ຄົມ 29 ສະ­ບັບ, ໃນ​ນີ້​ກົດ­ໝາຍສ້າງ​ໃໝ່ 18 ສະ­ບັບ, ກົດ­ໝາຍ​ປັບ­ປຸງ 11 ສະ­ບັບ, ກົດ­ໝາຍ​ຂົງ­ເຂດ​ການ​ປ້ອງ​ກັນ ຊາດ-ປ້ອງ​ກັນ​ຄວາມ​ສະ­ຫງົບ 2 ສະ­ບັບ, ຊຶ່ງ​ແມ່ນ​ກົດ­ໝາຍ​ປັບ­ປຸງ​ທັງ​ສອງ​ສະ ບັບ, ກົດ­ໝາຍ​ຂົງ­ເຂດ​ການ​ຕ່າງ­ປະ­ເທດ 2 ສະ­ບັບ ໂດຍ​ສອງ​ສະ­ບັບ​ແມ່ນ​ກົດ­ໝາຍ ສ້າງ​ໃໝ່​ໝົດ.

ທ່ານ​ຮອງ​ປະ­ທານ​ສະ­ພາ​ກ່າວ​ຕື່ມ ວ່າ: ນອກ­ຈາກ​ບັນ­ດາ​ກົດ­ໝາຍ​ທີ່​ໄດ້​ກຳນົດ​ໄວ້​ຂ້າງ​ເທິງ​ນີ້​ແລ້ວເພື່ອ​ຮັບ­ປະ­ກັນໃຫ້​ແກ່​ການ​ຄຸ້ມ​ຄອງ, ການ​ປົກ­ຄອງ​ລັດ ກົດ­ໝາຍ​ທີ່​ສັກ­ສິດ​ຫາກ​ຂົງ­ເຂດ​ໃດ​ມີ ຄວາມ​ຈຳ­ເປັນ​ຕ້ອງ​ໄດ້​ສ້າງ ແລະ​ປັບ­ປຸງ ກົດ­ໝາຍ​ອື່ນ ກໍ​ສາ­ມາດ​ສະ­ເໜີ​ເພີ່ມ​ເຂົ້າໃນ​ແຜນ­ການ​ສ້າງ ແລະ​ປັບ­ປຸງ​ກົດ­ໝາຍປະ­ຈຳ​ປີ.

ແນວ­ໃດ​ກໍ​ດີຕໍ່​ກັບ​ແຜນ­ການ​ສ້າງ ແລະ​ປັບ­ປຸງ​ກົດ­ໝາຍ​ຈຳ­ນວນ 105 ສະບັບ​ທີ່​ໄດ້​ສະ­ເໜີ​ນັ້ນ​ມາ​ຮອດ​ຕອນ​ແລງ​ບັນ­ດາ​ສະ­ມາ­ຊິກ​ສະ­ພາ​ແຫ່ງ​ຊາດກໍ​ໄດ້​ທຳ​ການ​ຮັບ­ຮອງ​ເອົາ​ເປັນ​ທີ່​ຮຽບ​ຮ້ອຍໂດຍ​ມີ​ຄະ­ແນນ​ສຽງ​ເຫັນ​ດີ 144 ສຽງ, ໃນ​ຈຳ­ນວນ​ມີ­ໜ້າ​ທັງ​ໝົດ 148 ສຽງ ກວມເອົາ 97%, ບໍ່​ເຫັນ​ດີ 4 ສຽງ, ກວມ​ເອົາ 4 ສຽງ, ກວມ​ເອົາ 3%.

ທີ່ມາ: