ວັນທີ 22 ເມສາຜ່ານມາ ທີ່ຕະຫຼາດຫຼັກຊັບລາວ ໄດ້ມີພິທີເຊັນສັນຍາບົດບັນທຶກຄວາມເຂົ້າໃຈຫຼັກສູດ “ແຜນລາຍການຝຶກອົບຮົມ-ການທະນາຄານ ເພື່ອການລົງທຶນຢ່າງມືອາຊີບລາວ” ລະຫວ່າງ ທ່ານ ວັນຄຳ ວໍຣະວົງ ຜູ້ອຳນວຍການໃຫຍ່ຕະຫຼາດຫຼັກຊັບລາວ, ທ່ານ ຮສ. ສົມຈິດ ສຸກສະຫວັນ ຄະນະບໍດີຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດ ແລະ ທ່ານ ສົມພົບ ສັກພັນພະນົມ ຜູ້ອຳນວຍການໃຫຍ່ບໍລິສັດຫຼັກຊັບເອພີເອັມລາວ ຈຳກັດ ໂດຍໃຫ້ກຽດເຂົ້າຮ່ວມຂອງທ່ານ ນາງ ສາຍສະໝອນ ຈັນທະຈັກ ຫົວໜ້າສຳນັກງານຄະນະກຳມະການຄຸ້ມຄອງຫຼັກຊັບ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ການເຊັນບົດບັນທຶກຄວາມເຂົ້າໃຈຄັ້ງນີ້ເປັນຄັ້ງທີ 2 ນັບແຕ່ປີ 2014 ຊຶ່ງຜ່ານມາຫຼັກສູດແຜນການຝຶກອົບຮົມ-ການທະນາຄານ ເພື່ອການລົງທຶນຢ່າງມືອາຊີບລາວສຳລັບບຸກຄົນທົ່ວໄປທີ່ຕ້ອງການໃບຢັ້ງຢືນວິຊາຊີບທາງດ້ານນາຍໜ້າຄ້າຂາຍຫຼັກຊັບແມ່ນໄດ້ຈັດຂຶ້ນ 3 ຮຸ່ນແລ້ວ ໂດຍຫຼັກສູດດັ່ງກ່າວ ແມ່ນເປັນການຮ່ວມມືລະຫວ່າງຕະຫຼາດ ຫຼັກຊັບລາວ, ມະຫາວິທະຍາໄລແຫ່ງຊາດ ແລະບໍລິສັດຫຼັກຊັບເອພີເອັມລາວ ຈຳກັດ ຊຶ່ງໃນຫຼັກສູດນີ້ໄດ້ມີນັກສຳມະນາກອນເຂົ້າຮ່ວມທັງໝົດ 179 ທ່ານ ສາມາດສອບເສັງຜ່ານຫຼັກສູດ 64 ທ່ານ ເທົ່າກັບ 35,75%.
ດັ່ງທີ່ຮູ້ດີແລ້ວວ່າວຽກງານຕະຫຼາດທຶນເປັນວຽກງານໃໝ່ ຊຶ່ງຕ້ອງການຄວາມຮູ້-ຄວາມເຂົ້າໃຈໃນວຽກນີ້ ສະນັ້ນ ເນື້ອໃນຕົ້ນຕໍຂອງຫຼັກສູດຈະໃຫ້ປະໂຫຍດສູງສຸດແກ່ບັນດາທ່ານທີ່ເຂົ້າຮ່ວມຝຶກອົບຮົມໂດຍປະກອບມີການນຳສະເໜີກ່ຽວກັບພາບລວມການພັດທະນາຕະຫຼາດທຶນລາວ, ຄວາມສຳຄັນຂອງວຽກງານການກວດສອບພາຍນອກ, ກົດໝາຍ ວ່າດ້ວຍຫຼັກຊັບ ແລະ ລະບຽບການຕ່າງໆ ທີ່ກ່ຽວຂ້ອງກັບວຽກງານຫຼັກຊັບລວມໄປເຖິງການນຳສະເໜີພາບລວມການພັດທະນາຕະຫຼາດທຶນໄທ ແລະ ຜົນປະ ໂຫຍດຂອງການຈົດທະບຽນໃນຕະຫຼາດຫຼັກຊັບ.
ການເຊັນສັນຍາບົດບັນທຶກຄວາມເຂົ້າໃຈໃນຄັ້ງນີ້ເປັນການສືບຕໍ່ MOU ເພື່ອເປັນການເພີ່ມທະວີການຮ່ວມມືເພື່ອໃຫ້ສາມາດຊ່ວຍເຫຼືອເຊິ່ງກັນ ແລະກັນ ໂດຍຜ່ານການກຳນົດບັນດາຫຼັກສູດທີ່ຈຳເປັນແກ່ຜູ້ທີ່ມາເຂົ້າຮ່ວມຝຶກອົບຮົມວຽກງານຕະຫຼາດທຶນໃຫ້ສາມາດນຳໄປໃຊ້ໃນວຽກງານຕົວຈິງ ແລະ ຖືກຕ້ອງຕາມລະບຽບກົດໝາຍທີ່ໄດ້ວາງອອກ.
ທີ່ມາ: