ປິດກອງປະຊຸມສະພາແຫ່ງຊາດ ພ້ອມຮັບຮອງວິໄສທັດຮອດປີ 2030 , ຍຸດທະສາດຮອດປີ 2025 ແລະ ແຜນພັດທະນາເສດຖະກິດສັງຄົມ ແຫ່ງຊາດ 5 ປີຄັ້ງທີ VIII
ໃນຕອນບ່າຍວັນສຸກທີ 22 ເມສາ 2016 ໄດ້ມີພິທີປິດກອງປະຊຸມຄັ້ງປະຖົມມະລຶກຂອງສະພາແຫ່ງຊາດຊຸດທີ VIII ທີ່ຫໍສະພາແຫ່ງຊາດ ນະຄອນຫຼວງວຽງຈັນ ພາຍໃຕ້ການເປັນປະທານ ຂອງທ່ານ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດ, ໂດຍການໃຫ້ກຽດເຂົ້າຮ່ວມຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ, ທ່ານ ດຣ.ທອງລຸນ ສີສຸລິດ ກຳມະການກົມການເມືອງສູນກາງພັກ ນາຍົກລັດຖະມົນຕີ; ມີບັນດາຜູ້ນຳຂັ້ນສູງພັກ – ລັດ, ອະດິດການນຳຂັ້ນສູງ,ບັນດາສະມາຊິກສະພາແຫ່ງຊາດແຕ່ລະເຂດເລືອກຕັ້ງໃນຂອບເຂດທົ່ວປະເທດ ແລະ ແຂກທີ່ຖືກເຊີນເຂົ້າຮ່ວມ.
ທ່ານ ປະທານກອງປະຊຸມໄດ້ກ່າວປິດກອງວ່າ: ກອງປະຊຸມຄັ້ງປະຖົມມະລືກ ສະພາແຫ່ງຊາດຊຸດທີ VIII ໄດ້ດຳເນີນແຕ່ວັນທີ 20ຢ່າງເຄັ່ງຮ້ອນ ແລະ ເຕັມໄປດ້ວຍບັນຍາກາດອັນຟົດຟື້ນ ແຫ່ງການເສີມຂະຫຍາຍສິດປະຊາທິໄປໄຕ, ຕະຫຼອດໄລຍະເວລາ ດຳເນີນກອງປະຊຸມ 3 ວັນຜ່ານມາ ສະມາຊິກສະພາແຫ່ງຊາດ ໄດ້ຍົກສູງຄວາມຮັບຜິດຊອບການເມືອງຂອງຕົນ ສຸມທຸກສະຕິປັນຍາຄົ້ນຄວ້າ ພິຈາລະນາ ແລະ ຕົກລົງຮັບຮອງເອົາບັນຫາສຳຄັນຂອງຊາດ ດ້ວຍຄວາມເປັນເອກະພາບສູງ ຄື: ກອງປະຊຸມໄດ້ຮັບຟັງການລາຍງານຜົນການເລືອກຕັ້ງສະມາຊິກສະພາແຫ່ງຊາດຊຸດທີVIII ແລະ ສະມາຊິກສະພາປະຊາຊົນແຂວງ, ນະຄອນຫຼວງ ແລະ ຢັ້ງຢືນຄຸນລັກສະນະຂອງສະມາຊິກສະພາແຫ່ງຊາດຊຸດທີ VIII; ພິຈາລະນາ ແລະ ຮັບຮອງເອົາໂຄງປະກອບກົງຈັກ ແລະ ບຸກຄະລາກອນຂອງສະພາແຫ່ງຊາດ ຊຸດທີ VIII; ພິຈາລະນາ ແລະ ຮັບຮອງເອົາການເລືອກຕັ້ງປະທານປະເທດ ແຫ່ງ ສປປ ລາວ, ປະທານສະພາແຫ່ງຊາດ, ນາຍົກລັດຖະມົນຕີ, ບັນດາຮອງປະທານສະພາແຫ່ງຊາດ ແລະ ຄະນະປະຈຳສະພາແຫ່ງຊາດ.
ກອງປະຊຸມໄດ້ ໄດ້ຮັບຮອງການແຕ່ງຕັ້ງປະທານ, ຮອງປະທານກຳມາທິການ ແລະ ເລຂາທິການສະພາແຫ່ງຊາດຊຸດທີ VIII , ຮັບຮອງໂຄງປະກອບກົງຈັກຂອງລັດຖະບານ ແລະ ສະມາຊິກລັດຖະບານຊຸດໃໝ່ຕາມການສະເໜີຂອງທ່ານ ນາຍົກລັດຖະມົນຕີ; ພ້ອມດຽວກັນເລືອກຕັ້ງ ຫົວໜ້າອົງການໄອຍະການປະຊາຊົນສູງສຸດ ແລະ ປະທານສານປະຊາຊົນສູງສຸດ ຖືກຕ້ອງຕາມຂັ້ນຕອນ ຂອງກົດໝາຍ ຮັບປະກັນມາດຕະຖານເງື່ອນໄຂ ແລະ ສອດຄ່ອງກັບຄວາມມຸ່ງມາດປາດຖະໜາ ຂອງປະຊາຊົນບັນດາເຜົ່າ; ພິຈາລະນາ ແລະ ຮັບຮອງເອົາວິໄສທັດຮອດປີ 2030 , ຍຸດທະສາດຮອດປີ 2025 ແລະ ແຜນພັດທະນາເສດຖະກິດສັງຄົມ ແຫ່ງຊາດ 5 ປີຄັ້ງທີ VIII(2016 – 2020), ແຜນງົບປະມານແຫ່ງລັດ 5ປີ (2016 – 2020); ພິຈາລະນາ ແລະ ຮັບຮອງບົດລາຍງານຂອງສະພາແຫ່ງຊາດກ່ຽວກັບວິໄສທັດຮອດປີ 2030 , ຍຸດທະສາດຮອດປີ 2025 ແລະ ທິດທາງແຜນການ 5 ປີຂອງສະພາແຫ່ງຊາດຊຸດທີ VIII(2016 – 2020), ແຜນການສ້າງ ແລະ ປັບປຸງກົດໝາຍ 5ປີ ຂອງສະພາແຫ່ງຊາດຊຸດທີ VIII (2016 – 2020).
ຂ່າວຈາກ: ຂ່າວເສດຖະກິດ-ການຄ້າ