ອ່ານຕໍ່ຈາກມື້ວານນີ້
ຫຼັງຈາກກັບມາຈາກງານລ້ຽງກິນເຂົ້າສາມັກຄີຂອງນັກຮຽນບັນຊີພາກເຊົ້າ ແລະ ພາກແລງແລ້ວ ທີ່ຫ້ອງນອນຂອງນ້າ. ນ້າ ໄດ້ນັ່ງຢູ່ທີ່ໂຕະຮຽນໜັງສືໃນຫ້ອງນອນລາວຈັບປືມບັນທຶກຂຶ້ນມາຈາກລີ້ນຊັກກ້ອງໂຕະ ແລ້ວຂຽນບັນທຶກເຫດການທີ່ເກີດຂຶ້ນກັບຕົນເອງໃນມື້ນີ້ ໃນເວລາຂຽນໜ້າຂອງສັນຈອນກໍ່ໄຫລເຂົ້າມາໃນຫົວຂອງລາວ ນ້ານັ່ງຍີ້ມໃຈລອຍບຶດໜຶ່ງລາວກໍ່ຄິດໄດ້ ລາວໄດ້ເອົາມືເຄາະຫົວຕົວເອງເບົາໆແລ້ວຈົ່ມພືມພຳຄ່ອຍໆວ່າ: ບ້າແຮງແລ້ວ..ນ້າເອີ້ຍ! ສະຕີ! ສະຕິ ຈົ່ງກັບມາ.
ຄ່ຳວັນໃໝ່ທີ່ໂຮງຮຽນ ຫຼັງຈາກເລີກຮຽນທັງສາມສາວໄດ້ຍີນລົມກັນກ່ອນແຈກຢາຍກັນກັບເຮືອນ
ວັນ: ວັນເສົານີ້ເຮົາໄປຄົ້ນຄ້ວາບົດຮຽນກັນດີບໍ່ ເພາະໃກ້ຈະເສັງພາກຮຽນ 1 ລະໃດ
ນ້າ: ອື້! ກະດີຄືກັນ ແຕ່ເຮົາຕ້ອງມີຕົວຊ່ວຍສອນເພີ້ມເຮົານຳໃດ ເພາະສາມຄົນເຮົານິຄົງຈະບໍ່ໄຫວ ເບິ່ງໜ້າຜູ້ໃດກະພໍແຮງ ມີແຕ່ຄົນຮຽນ… ໝົດທຸກຄົນ
ນິງ: ບໍ່ຢາກ! ຊວນສັນຈອນໄປສອນເພີ້ມບັນຊີໃຫ້ເຮົາກະໄດ້ ລາວຮຽນເກັ່ງໃດ໋ທ້າວນິ
ວັນ ແລະ ນ້າແນມເບິ່ງໜ້າ ນິງດ້ວຍຄວາມຕົກໃຈ ແລ້ວເວົ້າອອກໄປພ້ອມກັນວ່າ: ສັນຈອນຫັ້ນໃດ໋ ຮຽນເກັ່ງ
ນິງແນມເບິ່ງໜ້າທັງສອງຄົນແລ້ວຕອບໄປວ່າ: ແມ່ນແລ້ວ! ແຟນເຂົາຢູ່ຫ້ອງດຽວກັບລາວ ບອກວ່າ ທ້າວສັນຈອນຮຽນເກັ່ງທີ່ສຸດໃນຫ້ອງເລີຍ
ວັນ: ດີເລີຍ! ຊັ້ນວັນເສົານີ້ຊວນທ້າວສັນຈອນໄປຕິວໜັງສືທີ່ເຮືອນເຂົາເນາະ! ນ້າ ໂຕໂທຊວນເດີ້
ນ້າ: ອ້າວ… ແລ້ວເປັນຫຍັງຕ້ອງເປັນເຂົາທີ່ໂທຊວນ ພວກເພິ່ນຄືບໍ່ຊວນລາວ
ນິງ: ເພິ່ນນັ້ນລະຊວນດີແລ້ວ! ເພາະເພິ່ນລົມກັບລາວຮູ້ເລື່ອງກ່ວາພວກເຂົາ ໂອເຄຕາມນີ້ເດີ້ສ່ຽວ! ບ່າຍ ເດິກລະກັບເຮືອນກ່ອນ
ເວົ້າແລ້ວ ນິງ ກັບ ວັນກໍ່ຟ້າວຍ່າງລົງໄປຫາຄອກລົດ ນ້າກໍ່ຟ້າວຍ່າງຕາມຫຼັງ ພໍຮອດເຮືອນນ້າກໍ່ຟ້າວຈັບໂທລະສັບຂຶ້ນມາໂທຊວນສັນຈອນທັນທີ ສີໜ້າຂອງນ້າຕອນທີ່ລົມໂທລະສັບກັບສັນຈອນນັ້ນລຸ້ນຄຳຕອບສຸດຂີດ ພໍແຕ່ສັນຈອນ ຕອບຄຳວ່າຕົກລົງເທົ່ານັ້ນນ້າດີໃຈສຸດໆ ເມື່ອວາງສາຍ ນ້າກະໂດດໂລດເຕັ້ນດ້ວຍຄວາມດີໃຈ.
ຮອດເຊົ້າວັນເສົາປະມານ 10:00ໂມງ ທີ່ເຮືອນວັນທີ່ໂຕະຫີນນ້າເຮືອນວັນທັງສີ່ຄົນໄດ້ພາກັນຄົ້ນຄວ້າຄຳຖາມເກົ່າບັນຊີຂອງປີກາຍ ນ້າ, ວັນ, ນິງ ເຫັນໂຈດຄຳຖາມໃດກະມືນຕຶບ ຄິດບໍ່ອອກ ແກ້ບໍ່ຖືກ ສ່ວນສັນຈອນແກ້ຄຳຖາມໄດ້ສະບາຍສະບາຍ ທັງສາມຄົນໄດ້ເບິ່ງວັນຈອນແກ້ໂຈດບັນຊີ ພ້ອມທັງໃຫ້ສັນຈອນອະທິບາຍໃຫ້ຟັງຢ່າງລະອຽດ ພວກເຂົາໄດ້ພາກັນຄົ້ນຄ້ວາບົດຮຽນຈົນຮອດ 17:00ໂມງແລງ ຈິ່ງພາກັນແຈກຢາຍກັບເຮືອນໃຜມັນ.
ທີ່ຫ້ອງນັ່ງຫຼິ້ນເຮືອນຂອງນ້າ ໃນຂະນະທີ່ນັ່ງເບິ່ງໂທລະທັດສຽງ line ມືຖືຂອງນ້າກໍ່ດັງຂຶ້ນ ນ້າໄດ້ຈັບມືຖືຂຶ້ນມາເປີດເບິ່ງ ເຫັນ line ຂອງສັນຈອນສົ່ງມາ ນ້າຮູ້ສຶກຕື່ນເຕັ້ນເພາະນີ້ເປັນຄັ້ງທຳອິດທີ່ສັນຈອນທັກມາຫາກ່ອນ ນ້າໄດ້ເປີດອ່ານ
line ສັນຈອນ: ຮຽນມື້ນີ້ເຂົ້າໃຈບໍ່!
line ນ້າ: ເຂົ້າໃຈຢູ່! ໃຄກ່ວາຄ້ອນທຸບຫົວ ອິອິ
line ສັນຈອນ: ກະດີ!
line ນ້າ: ເພິ່ນເຮັດຫຍັງຢູ່! ສິນອນລະບໍ່
line ສັນຈອນ: ກຳລັງຈະນອນ! ບ່າຍ
ນ້າເຮັດໜ້າເຊັງ ອຸສ່າວ່າສິຊວນລົມຕໍ່ ແຕ່ຖືກຕັດບົດກ່ອນແລ້ວ
line ນ້າ: ໂອເຄ! ຝັນດີ
ເມື່ອລົມກັບສັນຈອນແລ້ວໆ ນ້າກໍ່ປິດໂທລະສັບແລ້ວກໍ່ຂຶ້ນຫ້ອງນອນ ເໝືອນເດີມທຸກຄັ້ງທີ່ໄປພົບສັນຈອນນ້າຕ້ອງກັບມານອນຄິດ ນອນພິກໂຕໄປມາທີ່ບ່ອນນອນສະເໝີ ທີ່ຈິງສັນຈອນເປັນຊາຍໃນຝັນຂອງ ນ້າ ທຸກຄັ້ງທີ່ ນ້າຢູ່ໃກ້ລາວຈະຮູ້ສຶກມີຄວາມສຸກຫຼາຍ ແຕ່ອາການທີ່ສະແດງອອກມັນບໍ່ຄືກັບໃຈຄິດເລີຍ ນ້າຈະເຮັດເສີຍໆ ເໝືອນບໍ່ໄດ້ຄິດຫຍັງເວົ້າລົມທຳມະດາຄືໝູ່ທົ່ວໄປແຕ່ໃນໃຈແອບຫວັ່ນໆ
ເຫຼືອອີກໜຶ່ງອາທິດກ່ອນຮອດວັນເສັງພາກຮຽນ ສັນຈອນ, ວັນ, ນ້າ ແລະ ນິງ ໄດ້ພານັດພົບກັນທຸູກມື້ທີ່ເຮືອນວັນຫຼັງເລີກຮຽຕອນຄໍ່ມື້ລະ 1 ຊົ່ວໂມງ ສາເຫດທີ່ຕ້ອງເລືອກແຕ່ເຮືອນວັນ ເພາະເຮືອນເປັນຈຸດໃຈກາງຂອງເຮືອນ ນ້າ ແລະ ນິງ ສ່ວນສັນຈອນກໍ່ທຽວມາເອົາທັງສີ່ໄດ້ມີຄວາມສະໜິດສະໜົມກັບຫຼາຍຂຶ້ນ, ລົມກັນຫຼາຍຂຶ້ນ ກິນເຂົ້ານຳກັນຫຼາຍຂຶ້ນ ເຊິ່ງທຸກຄົນມີຄວາມສຸກ ໂດຍສະເພາະແມ່ນ ນ້າ ທີ່ມີຄວາມສຸກສຸດໆ ແຕ່ກໍ່ສຸກໃນໃຈບໍ່ເປີດເຜີຍຄືເກົ່າ
ແລ້ວກໍ່ມາຮອດວັນສອບເສັງມື້ສຸດທ້າຍ ຫຼັງຈາກເສັງແລ້ວພວກເຂົາໄດ້ພາກັນໄປສະຫຼອງທີ່ຮ້ານອາຫານແຖວ 3 ແຍກປາກປ່າສັກ ບັນຍາກາດດີໆ ລົມເຢັນໆວິວງາມອາຫານແຊບ ຄົນກໍ່ມາກິນຫຼາຍ ແລ້ວກໍ່ບໍ່ພາດທີ່ ນິງ ກັບ ວັນຈະພາແຟນມາສະຫຼອງນຳ ວັນ ກັບ ນິງ ສະວີດຫວານແຫວ໊ວກັບແຟນແບບບໍ່ເກງໃຈ ນ້າ ກັບ ສັນຈອນເລີຍ ນ້າ ໄດ້ແຕ່ແນມເບິ່ງໃນໃຈອິດສາ ເລິກໆ ນ້າ ໄດ້ຈິນຕະນາການເຫັນຕົນເອງນັ່ງຈູຈີກັບສັນຈອນຢ່າງຫວານຊື່ນ ນັ່ງຍີ້ມໃຈລອຍຄົນດຽວ ສ່ວນ ສັນຈອນບໍ່ສົນໃຈໃຜກິນຢ່າງດຽວ ແລະ ກໍ່ຈັບເອົາກ້ອງຄູ່ໃຈອອກມາຖ່າຍຮູບຢ່າງດຽວໂດຍບໍ່ສົນໃຈສິ່ງອ້ອມຂ້າງເລີຍ
ໃນຕອນເຊົ້າຂອງວັນທັດມາ ວັນ ທີ່ກຳລັງນອນຍັງບໍ່ທັນຕື່ນໃນຫ້ອງນອນຂອງລາວ ສຽງໂທລະສັບກໍ່ດັງຂຶ້ນຈາກໂຕະນ້ອຍໃກ້ຫົວຕຽງ ລາວໄດ້ຕື່ນໃນສະພາບອິດເໝື່ອຍຫົວຟູຂຶ້ນມາຮັບສາຍກໍ່ປະກົດວ່າແມ່ນສຽງ ນິງ ທີ່ໂທມາຊວນໄປຫຼິ້ນ ແລະ ເລົ່າໂປຣແກຣມການໄປທ່ຽວໃນວັນພັກຮຽນ 1ອາທິດ ໃຫ້ຟັງ ວັນຕາຊື່ນຂຶ້ນແລ່ວຕອບຕົກລົງວ່າ ໄປ ຫຼັງຈາກວາງສາຍຈາກ ນິງແລ້ວວັນກໍ່ຟ້າວໂທຊວນ ນ້າ ແລ້ວ ນ້າ ກໍ່ຟ້າວໂທຊວນສັນຈອນທັນທີ ສະຫຼຸບວ່າທຸກຄົນຈະໄປທ່ຽວທີ່ວັງວຽງ
ມື້ເດີນທາງສັນຈອນໄດ້ມາຂຶ້ນລົດທີ່ເຮືອນວັນ ແລ້ວນິງ ກັບ ແຟນ ກໍ່ຂັບລົດມາຮັບເອົາສັນຈອນ, ວັນກັບແຟນຂອງວັນ ຈາກນັ້ນກໍ່ໄປຮັບເອົາ ນ້າທີ່ເຮືອນ ເມື່ອທຸກຄົນຂຶ້ນລົດຄົບແລ້ວກໍ່ພ້ອມອອກເດີນທາງການເດີນທາງແມ່ນຂັບລົດໄປເອງ ແຟນຂອງນິງເປັນໂຊເຟໃຈດີຂັບລົດໄປສຸດທາງ…
ການເດີນທາງໄປທ່ຽວຄັ້ງນີ້ຈະເຮັດໃຫ້ ນ້າ ເປີດເຜີຍຄວາມໃນໃຈກັບ ສັນຈອນ ຫຼື ບໍ່ ຫຼື ສັນຈອນ ຈະມີປະຕິກິລິຍາແນວໃດກັບນ້າ ເຮົາຕ້ອງມາລຸ້ນໄປພ້ອມກັນໃນມື້ອື່ນຕອນ ສີ່
ແຕ່ງໂດຍ: ປັອກເລັກ ລາວໂພສຕ໌