ສຳນັກຂ່າວຕ່າງປະເທດ ລາຍງານໃນວັນທີ 20 ເມສາຜ່ານມານີ້ວ່າ ທ່ານ ວິນມິ້ນ ປະທານສະພາຜູ້ແທນປະຊາຊົນມຽນມາ ໄດ້ອອກມາກ່າວວ່າ ລັດຖະບານມຽນມາ ກຳລັງພິຈາລະນາປັບຫລຸດ ອັດຕາເບ້ຍລ້ຽງຕ່າງໆຂອງ ສະມາຊິກຄະນະລັດຖະບານ ແລະ ລັດຖະກອນທົ່ວປະເທດ ເພື່ອປະຢັດງົບປະມານບໍລິຫານຂອງພາກລັດລົງ ຊຶ່ງເປັນນະໂຍບາຍຂອງລັດຖະບານໃໝ່ ທີ່ນຳໂດຍພັກສັນນິບາດຊາດ ເພື່ອປະຊາທິປະໄຕ ຫລື NLD ຂອງທ່ານ ນາງ ອອງຊານ ຊູຈີ ທີ່ມີທັງໝົດ 21 ກະຊວງ ແລະ ມີລັດຖະມົນຕີທັງໝົດ 20 ຄົນ ເມື່ອທຽບກັບລັດຖະບານຊຸດກ່ອນ ທີ່ມີກະຊວງທັງໝົດ 36 ກະຊວງ ແລະ ມີລັດຖະມົນຕີຫລາຍກວ່າ 100 ຄົນ.

ທ່ານ ວິນມິ້ນ ກ່າວວ່າ ” ພວກເຮົາປະຢັດງົບປະມານຂອງລັດ ໄດ້ຫລາຍກວ່າ 5 ຕື້ຈາດ ແລະ ພວກເຮົາກຳລັງພິຈາລະນາ ຕັດຫລຸດເບ້ຍລ້ຽງ ເພື່ອຊ່ວຍປະຢັດເງິນໃຫ້ຊາດຫລາຍຂຶ້ນ ” ພ້ອມນັ້ນ ທ່ານຍັງໄດ້ກ່າວເສີມອີກວ່າ ” ເນື່ອງຈາກປະເທດຂອງເຮົາ ເປັນປະເທດທີ່ທຸກຍາກ ເຮົາຕ້ອງຫລຸດຄ່າໃຊ້ຈ່າຍຂອງລັດຖະບານ ແລະ ພິຈາລະນາປັບຫລຸດໃຫ້ຫລາຍຂຶ້ນ “