ຈາກການເອົາໃຈໃສ່ຈັດຕັ້ງປະຕິບັດໜ້າທີ່ວຽກງານຂອງຕົນ ໃນການດຳເນີນທຸລະກິດ ໂດຍປະກອບສ່ວນເຂົ້າໃນການຄຸ້ມຄອງຮັກສາ ແລະ ບໍລິຫານຮຸ້ນຂອງລັດຖະບານຢູ່ໃນບັນດາໂຄງການ ທີ່ລັດວິສາຫະກິດຖືຮຸ້ນລາວ (ລຮລ) ເຂົ້າຮ່ວມຖືຮຸ້ນ ແລະ ເຮັດວຽກກັບບັນດາຂາຮຸ້ນຕ່າງໆຢ່າງເປັນເຈົ້າການ ກໍ່ຄືການມີສ່ວນຮ່ວມໃນການເອົາໃຈໃສ່ຕິດຕາມກວດກາ ບັນດາໂຄງການລົງທຶນຂອງລັດຖະບານຢ່າງຕັ້ງໜ້າ ເຊິ່ງເຮັດໃຫ້ການດຳເນີນທຸລະກິດຂອງ ລຮລ ໄລຍະ 6 ເດືອນ ຕົ້ນປີ 2015 ມີລາຍຮັບເພີ່ມຂຶ້ນ ເທົ່າກັບ 55,5%.
ທ່ານ ດຣ. ສົມບູນ ມະໂນລົມ ຜູ້ອຳນວຍການລັດວິສາຫະກິດຖືຮຸ້ນລາວ ກ່າວວ່າ: ໃນໄລຍະ 6 ເດືອນຕົ້ນປີ 2015 ຜ່ານມາ ການດຳເນີນທຸລະກິດຂອງ ລຮລ ເຫັນວ່າ ໄດ້ມີຜົນສຳເລັດຫຼາຍດ້ານ ເປັນຕົ້ນແມ່ນ ການຈັດຕັ້ງປະຕິບັດວຽກງານໃນ 4 ໂຄງການທີ່ ລຮລ ເຂົ້າຮ່ວມຖືຮຸ້ນຄື: ໂຄງການໄຟຟ້ານ້ຳເທີນ 2 ໄຟຟ້າ ຄວາມຮ້ອນຫົງສາ ໄຟຟ້າເຊປຽນ-ເຊນ້ຳນ້ອຍ ແລະ ໂຄງການໄຟຟ້ານ້ຳງຽບ 1 ນອກຈາກນັ້ນ ຍັງມີໂຄງການທຸລະກິດຂີ້ເທົ່າລອຍໃນໂຄງການຫົງສາທີ່ ລຮລ ດຳເນີນການຈັດຕັ້ງປະຕິບັດເອງ ເຊິ່ງມາຮອດປັດຈຸບັນ ການກະກຽມວຽກງານຕ່າງໆ ເພື່ອຮອງຮັບການຊື້-ຂາຍຂີ້ເທົ່າລອຍຢ່າງເປັນທາງການ ແມ່ນປະຕິບັດໄດ້ປະມານ 70% ໃນໄລຍະ 6 ເດືອນຕົ້ນປີ 2015 ລຮລ ມີລາຍຮັບເງິນປັນຜົນຈາກໂຄງການໄຟຟ້ານ້ຳເທີນ 2 ຈຳນວນ 7 ລ້ານໂດລາສະຫະລັດ ທຽບໃສ່ແຜນ 6 ເດືອນຕົ້ນປີແມ່ນລື່ນແຜນການ 55,5% (ຕົວເລກເງິນປັນຜົນຂອງ ລຮລ ແຕ່ປີ 2011 ຮອດປັດຈຸບັນມີທັງໝົດ 105.214.357 ໂດລາ) ແລະ ໄດ້ປະຕິບັດພັນທະອາກອນຕ່າງໆໃຫ້ແກ່ລັດຖະບານ ຈຳນວນ 1.884.530 ໂດລາ ໃນນັ້ນ ປະກອບມີອາກອນ ເງິນປັນຜົນ 7 ແສນໂດລາ ອາກອນກຳໄລ 1.041.566 ໂດລາ ແລະ ເງິນປັນຜົນກຳໄລຂອງປີ 2014 ຈຳນວນ 142.964 ໂດລາ ພ້ອມນັ້ນ ກໍ່ໄດ້ຊຳລະໜີ້ເງິນກູ້ໃນໂຄງການໄຟຟ້ານ້ຳເທີນ 2 ທັງຕົ້ນທຶນ ແລະ ດອກເບ້ຍ ຈຳນວນ 4.953.390 ໂດລາ ອີກທັງໄດ້ຖອກເງິນຮຸ້ນເຂົ້າໃນໂຄງການໄຟຟ້າຄວາມຮ້ອນຫົງສາ ເຊປຽນ-ເຊນ້ຳນ້ອຍ ແລະ ໂຄງການໄຟຟ້ານ້ຳງຽບ 1 ຕາມຊັດສ່ວນການຖືຮຸ້ນເປັນເງິນທັງໝົດ 30.819.448 ໂດລາສະຫະລັດ ນອກຈາກ 4 ໂຄງການດັ່ງກ່າວ ລຮລ ຍັງໄດ້ປະຕິບັດສຳເລັດຫຼາຍໜ້າວຽກ ເພື່ອຮອງຮັບໃນການດຳເນີນທຸລະກິດຂີ້ເທົ່າລອຍ ໃນໂຄງການໄຟຟ້າຫົງສາ ເປັນຕົ້ນແມ່ນ ການກໍ່ສ້າງຫ້ອງທົດລອງ-ຫໍພັກພະນັກງານ ການຈັດຊື້-ຂາຍ ຈັດຫາອຸປະກອນວິໄຈຂີ້ເທົ່າລອຍ ແລະ ວຽກງານດ້ານການຕະຫຼາດ ເພື່ອແນໃສ່ຊຸກຍູ້-ສົ່ງເສີມການຈັດຕັ້ງປະຕິບັດໂຄງການຕ່າງໆ ໃຫ້ມີຜົນສຳເລັດ ແລະ ສ້າງລາຍຮັບເຂົ້າງົບປະມານຂອງລັດ ປະກອບສ່ວນເຂົ້າໃນການພັດທະນາເສດຖະກິດຂອງຊາດ ໃຫ້ມີຄວາມເຂັ້ມແຂງ.
ແຫລ່ງຂ່າວ:
