ເຈົ້າໜ້າທີ່ ປກສ ແຂວງຊຽງ ຂວາງໃຫ້ຮູ້ວ່າ: ໃນວັນທີ 10 ມິນາ 2016 ໄດ້ຮັບແຈ້ງຄວາມຈາກຜູ້ຖືກເສຍຫາຍຊື່ນາງ ຫຼ້ານາລີ ວ່າ: ຕົນເອງ ແລະ ລູກສາວ ໄດ້ຂີ່ລົດກະບະວີໂກແຊັມສີຂາວໜາຍເລກທະບຽນ 2315 ກຳແພງນະຄອນເພື່ອໄປດອງຢູ່ພັດຕະຄານຊຽງຂວາງໃໝ່ ເມື່ອໄປຮອດກໍໄດ້ຈອດລົດໄວ້ຕໍ່ໜ້າໂຮງຮຽນສອນຂັບລົດບົວສະຫວັນແລ້ວກໍເຂົ້າໄປໃນງານດອງພໍຮອດເວລາປະມານ 21:45 ໂມງ ໄດ້ອອກຈາກງານດອງມາຫາລົດ ເພື່ອຈະກັບເຮືອນແຕ່ປາກົດວ່າ: ລົດທີ່ຈອດໄວ້ນັ້ນບໍ່ເຫັນແລ້ວ ຫຼັງຈາກນັ້ນ ຈິ່ງໄດ້ແຕ່ງພະນັກງານວິຊາ ສະເພາະຕິດຕາມຈິ່ງສາມາສຶບຮູ້ໄດ້ວ່າ ທ້າວ ສາຍທອງ ໄດ້ນຳລົງມາຂາຍຢູ່ເຂດ ເດີ່ນກິລາມະຫາວິທະຍາໄລແຫ່ງຊາດ ຈາກນັ້ນ ຈິ່ງໄດ້ປະສານຫາກົມຕຳຫຼວດສືບຂ່າວຄະດີອາຍາເຂົ້າຈັບຕົວມາສອບສ່ວນຂະຫຍາຍຜົນ.
ທ້າວ ສາຍທອງ ສາລະພາບວ່າ: ຜ່ານມາຜູ້ກ່ຽວໄດ້ຮູ້ຈັກຮັກແພງກັບຄົນໃນຄອບຄົວຜູ້ຖືກເສຍຫາຍມາໄດ້ຫຼາຍປີ ມາຮອດທ້າຍເດືອນ 2 ປີ 2016 ລູກສາວຂອງຜູ້ຖືກເສຍຫາຍໄດ້ໂທລະສັບຫາຜູ້ກ່ຽວມາກິນເບຍນຳຢູ່ຮ້ານຂອງຜູ້ຖືກເສຍຫາຍມີໝູ່ຄູ່ນັ່ງກີນນຳກັນປະມານ 4-5 ຄົນໃນເວລາກີນນຳກັນຢູ່ນັ້ນຜູ້ກ່ຽວໃດ້ຫຼຽວເຫັນກະແຈລົດວິໂກທີ່ວາງຢູ່ໃນເທີງໂຕະໃນຮ້ານຂາຍເຄື່ອງ ຈາກນັ້ນ ຜູ້ກ່ຽວໄດ້ອອກໄປຫ້ອງນ້ຳກໍຍ່າງມາຈັບເອົາລູກກະແຈໃສ່ໃນຖົງເສື້ອ ແລ້ວນັ່ງດື່ມເບຍຕໍ່ຢູ່ອີກປະມານ 5 ນາທີຜູ້ກ່ຽວໄດ້ອອກຈາກຮ້ານ ເພື່ອນຳເອົາ ກຸນແຈທີ່ລັກມານັ້ນໄປຊ່ຽນຢູ່ໃນຮ້ານໄດ້ 1 ລູກ ໃນລາຄາ 30.000 ກີບ ແລ້ວເອົາລູກກະແຈດັ່ງກ່າວມາປະໄວ້ໃນ ຮ້ານຂອງຜູ້ຖືກເສຍຫາຍຄືເກົ່າ ໂດຍທີ່ ຜູ້ຖືກເສຍຫາຍບໍ່ຮູ້, ມາຮອດວັນທີ 9 ມີນາ 2016 ເວລາປະມານ 1:00 ໂມງກາງຄືນຜູ້ກ່ຽວໄດ້ໄປລັກລົດຄັນດັ່ງກ່າວທີ່ຈອດໃວ້ຢູ່ຂ້າງເຮືອນຂອງຜູ້ເສຍຫາຍໂດຍເອົາກຸນແຈທີ່ຊ່ຽນມານັ້ນຈະໄປໄຂປະຕູລົດແຕ່ບໍ່ໄດ້ເພາະສັນຍານກັນຂະໂມຍໄດ້ດັງຂຶ້ນກ່ອນແລ່ນກັບເຮືອນ.
ມາຮອດວັນທີ 10 ມິນາ 2016 ຜູ້ກ່ຽວໄດ້ຊ້ອນລົດຈັກໝູ່ຊື່ທ້າວ ໝອນ ເພື່ອໄປກິນເບຍຢູ່ຮ້ານອາຫານລ້ານດາວຢູ່ເຂດຕະຫຼາດສວນພູຄຳພໍຂີ່ລົດຈັກໄປຮອດພັດຕະຄານຊຽງຂວາງໃໝ່ໄດ້ເຫັນລົດກະບະວິໂກຄັນດັ່ງກ່າວຈອດຢູ່ແຄມທາງໃກ້ກັບໂຮງຮຽນສອນຂັບລົດບົວສະຫັວນຈາກນັ້ນ, ຜູ້ກ່ຽວຂີ່ລົດຈັກມາຫາທ້າວ ໝອນ ໃຫ້ໄປສົ່ງຢູ່ເຮືອນແລ້ວກໍນຳເອົາກຸນແຈລົດທີ່ຕົນເອງຊ່ຽນໄວ້ນັ້ນຍ່າງອອກຈາກເຮືອນມາຫາລົດພໍມາຮອດຜູ້ກ່ຽວກໍໄດ້ ເອົາກຸນແຈທີ່ກຽມມາລັກເອົາລົດຄັນ ດັ່ງກ່າວ ແລ້ວຂັບລົດອອກໄປທາງເລກ 1d ແລ້ວໄປໃສ່ນ້ຳມັນຈຳນວນ 250.000 ກີບ ມຸ່ງໜ້າໄປແຂວງບໍລິຄຳໄຊ ພໍຮອດ 1:00 ໂມງ ຂອງວັນທີ 11 ຜູ້ກ່ຽວໄດ້ ໄປນອນພັກຢູ່ເມືອງປາກຊັນ ແຂວງບໍລິຄຳໄຊ ຕື່ນເຊົ້າມື້ຕໍ່ມາກໍໄດ້ປົດປ້າຍລົດອອກແລ້ວໄປລ້າງອັດສີດແລ້ວເອົາ ໄປຝາກໄວ້ຢູ່ທ່າເຮືອປາກຊັນ ເປັນເວລາ 10 ວັນ ຫຼັງຈາກນັ້ນ ຜູ້ກ່ຽວກໍໄດ້ກັບມາຊຽງຂວາງເພື່ອມາຕີດຕໍ່ຂາຍລົດຄັນ ດັ່ງກ່າວ ໃນລາຄາ 480.000 ບາດ ແຕ່ບໍ່ມີຜູ້ຊື້ວັນທີ 23 ມິນາ 2016 ຜູ້ກ່ຽວໄດ້ກັບໄປເອົາລົດຄັນດັ່ງກ່າວແລ້ວຂີ່ລົດມາຂາຍຢູ່ນະຄອນຫຼວງວຽງຈັນ ໂດຍນຳລົດມາຝາກໄວ້ເຮືອນໝູ່ ເພື່ອດັດແປງສະພາບລົດແລ້ວກໍຂັບຂີ່ລົດຄັນດັ່ງ ກ່າວກັບຄືນມາຂາຍຢູ່ຊຽງຂວາງອີກ.
ຕົກມາຮອດວັນທີ 27 ມີນາ 2016 ເວລາປະມານ 12:00 ໂມງ ຜູ້ກ່ຽວໄດ້ນຳລົດວິໂກຄັນດັ່ງກ່າວມາຂາຍຢູ່ເດີ່ນກີລາມະຫາວິທະຍາໄລແຫ່ງຊາດ ແຕ່ຍັງບໍ່ທັນໄດ້ຂາຍໃນເວລານັ່ງລໍຖ້າລູກຄ້າຢູ່ນັ້ນໄດ້ມີເຈົ້າໜ້າທີ່ເຂົ້າມາກັກຕົວພ້ອມກັບລົດຄັນດັ່ງກ່າວ.
ທີ່ມາ: 
ຕິດຕາມຂ່າວເສດຖະກິດ-ສັງຄົມລາວ ກົດໄລຄ໌ເລີຍ!