ແຂວງຫຼວງພະບາງສົມແລ້ວທີ່ເປັນເມືອງແຫ່ງການທ່ອງທ່ຽວຍອດນິຍົມຂອງໂລກຊຶ່ງໃນແຕ່ລະປີມີນັກທ່ອງທ່ຽວທັງພາຍໃນແລະຕ່າງປະເທດນັບຫຼາຍແສນຄົນໄດ້ເຂົ້າມາທ່ຽວຊົມຈົນກາຍເປັນສະເໜດຶງດູດນັກທ່ອງທ່ຽວຈາກທົ່ວທຸກມູມໂລກເດີນທາງມາຢ້ຽມຢາມເຫັນໄດ້ 6 ເດືອນຕົ້ນສົກປີນີ້ມີນັກທ່ອງທ່ຽວເຂົ້າມາທັງໝົດ 3 ແສນກວ່າຄົນ, ສາມາດສ້າງລາຍຮັບສູງເຖິງ 100 ກວ່າລ້ານໂດລາສະຫະລັດ.
ທ່ານ ສຸລິທິບ ໜໍ່ຄຸນຜົນ ຫົວໜ້າພະແນກຖະແຫຼງຂ່າວ, ວັດທະນະທຳແລະທ່ອງທ່ຽວແຂວງຫຼວງພະບາງໄດ້ໃຫ້ຮູ້ບໍ່ດົນນີ້ວ່າ: ໃນໄລຍະ 6 ເດືອນຕົ້ນສົກປີ 2015-2016 ນີ້ມີນັກທ່ອງທ່ຽວເຂົ້າມາທ່ຽວຊົມຫຼວງພະບາງທັງໝົດ 324.424 ຄົນ, ທຽບໃສ່ 6 ເດືອນຂອງສົກປີຜ່ານມາເພີ່ມຂຶ້ນ 28.843 ຄົນ, ເທົ່າກັບ 9,75%, ໃນນັ້ນມີນັກທ່ອງທ່ຽວສາກົນ 238.558 ຄົນ, ເພີ່ມຂຶ້ນ 20.485 ຄົນ, ເທົ່າກັບ 9,39% ແລະນັກທ່ອງທ່ຽວພາຍໃນມີ 85.866 ຄົນ, ເພີ່ມຂຶ້ນ 8.358 ຄົນ, ເທົ່າກັບ 10,78%, ສາມາດສ້າງລາຍຮັບຈາກການທ່ອງທ່ຽວໄດ້ທັງໝົດ 101.480.490 ໂດລາສະຫະລັດ.
ແນວໃດກໍດີເພື່ອເປັນການຮອງຮັບໃຫ້ແກ່ນັກທ່ອງທ່ຽວທີ່ເຂົ້າມາທ່ຽວຫຼວງພະບາງມີຄວາມສະດວກສະບາຍຂຶ້ນກວ່າເກົ່າທາງອຳນາດການປົກຄອງແຂວງຫຼວງພະບາງກໍຄືຂະແໜງການທ່ອງທ່ຽວແຂວງໄດ້ຈົກງົບປະມານແລະທຶນຊ່ວຍເຫຼືອຈາກສາກົນຈຳນວນໜຶ່ງປັບປຸງສະຖານທີ່ທ່ອງທ່ຽວຫຼາຍແຫ່ງທີ່ເຫັນວ່າຄວນປັບປຸງໃຫ້ດີເປັນຕົ້ນແມ່ນສິ່ງອຳນວຍຄວາມສະດວກໃຫ້ກັບນັກທ່ອງທ່ຽວ, ເສັ້ນທາງເຂົ້າຫາແຫຼ່ງທ່ອງທ່ຽວ, ປ້າຍບອກທາງແລະໂຄສະນາຜ່ານສື່ຕ່າງໆນອກນີ້ຍັງໄດ້ປັບປຸງແຫຼ່ງທ່ອງທ່ຽວຢູ່ຖ້ຳຕິ່ງເມືອງປາກອູແລະເມືອງຈອມເພັດແລະໃນໄລຍະອາກາດຮ້ອນໆແບບນີ້ສະຖານທີ່ທ່ອງທ່ຽວທີ່ນັກທ່ອງທ່ຽວເຂົ້າຊົມຫຼາຍທີ່ສຸດກໍແມ່ນນ້ຳຕົກຕາດແສ້ແລະນ້ຳຕົກຕາດກວາງຊີໂດຍອ້າຍມີພະນັກງານປະຈຳຢູ່ນ້ຳຕົກຕາດກວາງຊີໄດ້ໃຫ້ສຳພາດຕໍ່ທີມຂ່າວປະຈຳຫຼວງພະບາງພວກເຮົາຜ່ານທາງໂທລະສັບໃນວັນທີ 24 ມີນານີ້ຮູ້ວ່າ: ຊ່ວງອາກາດຮ້ອນໆແບບນີ້ມີນັກທ່ອງທ່ຽວຈາກທັງພາຍໃນແລະຕ່າງປະເທດເຂົ້າຊົມເປັນຈຳນວນຫຼວງຫຼາຍເພື່ອໄປພັກຜ່ອນອາບນ້ຳໃສເຢັນ, ສູດດົມອາກາດສົດໆຂອງທຳມະຊາດເຂດນ້ຳຕົກຕາດກວາງຊີ, ທ່ຽວຊົມເບິ່ງໝີອັນໜ້າຮັກນັບຫຼາຍຮ້ອຍຄົນໃນແຕ່ລະມື້ແລະວັນທີ່ມີນັກທ່ອງທ່ຽວຫຼາຍສຸດແມ່ນວັນເສົາ-ອາທິດນັກທ່ອງທ່ຽວເຂົ້າຊົມມື້ໜຶ່ງປະມານ 1.000 ກວ່າຄົນ.
ທີ່ມາ: 