ກະຊວງປ້ອງກັນຄວາມສະຫງົບ ໄດ້ຈັດພິທີປະກາດໂຍກຍ້າຍນາຍຕຳຫລວດຂັ້ນສູງ ໄປຮັບໜ້າທີ່ໃໝ່ຢູ່ຫ້ອງວ່າການລັດຖະບານ ໃນວັນທີ 7 ເມສາ 2016 ເພື່ອສືບຕໍ່ຊີ້ນຳ-ນຳພາວຽກງານພັກ-ວຽກງານວິຊາສະເພາະໃຫ້ໄດ້ຮັບໝາກຜົນໃນຕໍ່ໜ້າ, ໃຫ້ກຽດເຂົ້າຮ່ວມຂອງ ພົນຕີ ສິນທະວົງ ໄຊຍະກອນ ຮອງລັດຖະມົນຕີກະຊວງ ປກສ, ມີບັນດາຄະນະພັກ-ຄະນະບັນຊາ ພ້ອມພະນັກງານ-ນັກຮົບອ້ອມຂ້າງກະຊວງ.
ພັນເອກ ຄຳກິ່ງ ຜຸຍຫລ້າມະນີວົງ ຮອງຫົວໜ້າກົມໃຫຍ່ການເມືອງ ປກສ ຂຶ້ນອ່ານຄຳສັ່ງຂອງນາຍົກລັດຖະມົນຕີແຫ່ງ ສປປ ລາວ ສະບັບເລກທີ 09/ນຍ, ລົງວັນທີ 25 ມີນາ 2016 ວ່າດ້ວຍການໂຍກຍ້າຍນາຍຕຳຫລວດຂັ້ນສູງຂອງກະຊວງ ປກສ ໂດຍອີງໃສ່ຄວາມຮຽກຮ້ອງຕ້ອງການ ຂອງໜ້າທີ່ວຽກງານຢູ່ຫ້ອງວ່າການລັດຖະບານ; ອີງຕາມກົດໝາຍ ວ່າດ້ວຍ ລັດຖະບານແຫ່ງ ສປປ ລາວ ສະບັບເລກທີ 02/ສພຊ, ລົງວັນທີ 6 ພຶດສະພາ 2003; ອີງຕາມໜັງສືສະເໜີຂອງ ຄະນະຈັດຕັ້ງສູນກາງພັກ ສະບັບເລກທີ 90/ຄຈສພ, ລົງວັນທີ 22 ມີນາ 2016 ຈຶ່ງໄດ້ປະກາດໂຍກຍ້າຍ ພັນເອກ ຄຳລາວັນ ຈັນທະລາວັນ ຮອງຫົວໜ້າຫ້ອງວ່າການ ກະຊວງປ້ອງກັນຄວາມສະຫງົບ ໄປຮັບໜ້າທີ່ໃໝ່ຢູ່ຫ້ອງວ່າການລັດຖະບານ ເພື່ອເຮັດໃຫ້ກົງຈັກການຈັດຕັ້ງ ມີຄວາມໜັກແໜ້ນທາງດ້ານການເມືອງ-ແນວຄິດ, ເຂັ້ມແຂງທາງດ້ານການຈັດຕັ້ງ ແລະ ສາມາດຕອບສະໜອງໄດ້ ກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່.
ໃນໂອກາດດຽວກັນ, ພົນຕີ ສິນທະວົງ ໄຊຍະກອນ ໄດ້ເນັ້ນໃຫ້ຜູ້ທີ່ໄດ້ຮັບໜ້າທີ່ໃໝ່ໃນຄັ້ງນີ້ ຈົ່ງເພີ່ມທະວີເອົາໃຈໃສ່ໃນການຄົ້ນຄວ້າຮໍ່າຮຽນທິດສະດີ ແລະ ພຶດຕິກຳການນຳພາ-ຄຸ້ມຄອງພັກ-ລັດ ເພື່ອປັບປຸງຕົນເອງ ແລະ ການຈັດຕັ້ງໃຫ້ມີຄວາມໜັກແໜ້ນເຂັ້ມແຂງ; ເອົາໃຈໃສ່ຊອກໃຫ້ເຫັນ-ເບິ່ງໃຫ້ເຫັນພາວະວິໄສ ແລະ ຕັດສິນໃຈໃຫ້ຖືກກັບນະໂຍບາຍ ປະຕິບັດໃນການຄົ້ນຄວ້າພິຈາລະນາ ແກ້ໄຂບັນຫາຢ່າງເຂັ້ມງວດ, ພ້ອມທັງເປັນແບບຢ່າງນຳໜ້າ, ນຳພາບັນຊາ ແລະ ກວດກາໃຫ້ແທດເຖິງຮາກຖານຕົວຈິງ ແລະ ຕັ້ງໜ້າເຕົ້າໂຮມຄວາມສາມັກຄີພາຍໃນ ໃຫ້ກາຍເປັນປຶກແຜ່ນ ແລະ ຍາດແຍ່ງການຊ່ວຍເຫລືອຈາກສາກົນ ໃຫ້ກວ້າງຂວາງ ເພື່ອເຮັດໃຫ້ການປະຕິບັດວຽກງານວິຊາສະເພາະມີຜົນສຳເລັດຕາມຄາດໝາຍ, ມີຄວາມເປັນລະບຽບຮຽບຮ້ອຍ ເພື່ອຕອບສະໜອງຄວາມຮຽກຮ້ອງຕ້ອງການໃນໜ້າທີ່ການເມືອງໃນໄລຍະໃໝ່.
ແຫລ່ງຂ່າວ:
