ໂຄງການກໍ່ສ້າງເສັ້ນທາງເບຕົງເສີມ ເຫຼັກ ແຕ່ 4 ແຍກໄຟແດງດົງໂດກຫາ 4 ແຍກ ໄຟແດງຕານມີໄຊ ແມ່ນໂຄງການໜຶ່ງທີ່ກຳລັງຂຸ້ນຂ້ຽວສຸມໃສ່ປະຕິບັດໜ້າວຽກຢ່າງຫ້າວຫັນ ເພື່ອເຮັດໃຫ້ການສັນຈອນໄປ-ມາມີຄວາມສະດວກປອດໄພ, ຫຼ້າສຸດ ເຈົ້າຂອງໂຄງການເຜີຍດຽວນີ້ ໜ້າວຽກໂດຍລວມຄືບໜ້າແລ້ວ 40%, ພ້ອມຢືນຢັນໂຄງການຈະສຳເລັດທັນຕາມແຜນການ.
ທ່ານ ຫຸມພັນ ພະດວງເດດ ຫົວໜ້າໂຄງການກໍ່ສ້າງເສັ້ນທາງດັ່ງກ່າວໃຫ້ສຳພາດວ່າ: ໂຄງການດັ່ງກ່າວ ແມ່ນ ໄດ້ເລີ່ມລົງມືມາແຕ່ຕົ້ນເດືອນຕຸລາ 2015 ແລະຜ່ານການຈັດຕັ້ງປະຕິບັດໜ້າວຽກ ຕ່າງໆ ໃນໄລຍະຜ່ານມາຈົນຮອດປະຈຸ ບັນ ເຫັນວ່າ ໂດຍລວມແລ້ວໂຄງການມີຄວາມຄືບໜ້າ 40%, ໃນນີ້ ໜ້າວຽກທີ່ສຳເລັດ 100% ປະກອບມີວຽກວາງທໍ່ລະບາຍນໍ້າ, ວຽກອະນາໄມ, ບຸກເບີກແລວທາງ ແລະວຽກເທເບຕົງເບື້ອງຂວາມືໄດ້ຈຳນວນໜຶ່ງ.
ປະຈຸບັນ ໂຄງການພວມເລັ່ງໃສ່ຫຼາຍໜ້າວຽກເປັນຕົ້ນແມ່ນສືບຕໍ່ເທເບຕົງໜ້າທາງເບື້ອງຂວາ ສະເພາະເລນທີ 3 ແຕ່ໜ້າມະຫາວິທະຍາໄລແຫ່ງຊາດໄປຫາ 4 ແຍກໄຟແດງຕານມີໄຊໃຫ້ສຳເລັດ, ພ້ອມທັງກະກຽມປະສົມຊີມັງກັບຊາຍຮອງພື້ນ ເພື່ອຈະໄດ້ເລີ່ມເທເບຕົງເບື້ອງຊ້າຍ ແລະຈະເລີ່ມເປີດເສັ້ນທາງໃຫ້ລົດສັນຈອນໃນບາງຊ່ວງທີ່ຄົບອາຍຸຂອງການນຳໃຊ້ເສັ້ນທາງ, ສ່ວນໜ້າວຽກອື່ນໆແມ່ນພວມດຳເນີນການຢູ່ຕົ້ນຕໍການປູທາງຄົນຍ່າງ.
ທ່ານຫົວໜ້າໂຄງການຍັງໃຫ້ຮູ້ອີກວ່າ: ໜ້າວຽກທີ່ທາງໂຄງການປະຕິບັດ ໄດ້ໃນປະຈຸບັນທຽບໃສ່ແຜນການທີ່ວາງ ໄວ້ເບື້ອງຕົ້ນໃຫ້ສຳເລັດທ້າຍເດືອນມິຖຸນາຂອງປີນີ້ ແມ່ນຊ້າກວ່າແຜນການເລັກນ້ອຍ ເນື່ອງຈາກການຍົກຍ້າຍສິ່ງກີດ ຂວາງເຊັ່ນ: ທໍ່ນໍ້າປະປາ, ສາຍເຄເບີນ ແລະຍົກຍ້າຍເສົາໄຟ ໃນເບື້ອງຕົ້ນມີຄວາມຫຍຸ້ງຍາກ ແລະແກ່ຍາວ, ແນວໃດກໍດີ ທາງໂຄງການຈະສືບຕໍ່ຂຸ້ນຂ້ຽວປະຕິບັດໃຫ້ສຳເລັດທັນກັບແຜນການແນ່ນອນ ໂດຍສະເພາະໜ້າວຽກເທເບຕົງ, ສ່ວນວຽກປະດັບປະດາຕາມເສັ້ນທາງຄາດວ່າຈະສຳເລັດຊ້າກວ່າແຜນເລັກນ້ອຍ.
ໂຄງການກໍ່ສ້າງເສັ້ນທາງເບຕົງເສີມເຫຼັກແຕ່ 4 ແຍກໄຟແດງ 450 (ດົງໂດກ) ໄປຫາ 4 ແຍກໄຟແດງຕານມີໄຊ ແມ່ນໂຄງການໜຶ່ງທີ່ນອນຢູ່ໃນໂຄງການປັບປຸງຕາໜ່າງເສັ້ນທາງ ແລະລະບົບລະບາຍນໍ້າຂອງນະຄອນຫຼວງວຽງຈັນ ທີ່ໄດ້ເລີ່ມລົງມືກໍ່ສ້າງໃນວັນທີ 1 ຕຸລາ 2015, ໂດຍທາງຈະປູດ້ວຍເບຕົງເສີມເຫຼັກໜາປະມານ 23 ຊັງຕີ, ຍາວທັງໝົດ 2,5 ກິໂລແມັດ, ກວ້າງ 28 ແມັດ, ໃນນີ້ ປະກອບມີທາງຄົນຍ່າງເບື້ອງລະ 2 ແມັດ, ດອນກາງ, 2,70 ແມັດ, ພ້ອມນັ້ນ ຍັງມີ 6 ຊ່ອງຈະລາຈອນ, ໄຟເຍືອງທາງຄົບຊຸດ, ສະເລ່ຍມູນຄ່າການລົງທຶນແມ່ນ 10,5 ລ້ານໂດລາ ຫຼື ປະມານ 84 ຕື້ກວ່າກີບ ໂດຍແມ່ນບໍລິສັດຈີນຢຸນານເປັນຜູ້ຮັບເໝົາໂຄງການ.
ທີ່ມາ: