ແຟນບານຂອງ ຣີລ ມາດຣິດ ໄດ້ຮັບຂ່າວບໍ່ຄ່ອຍດີປານໃດ ເມື່ອ ຄຣິສເຕຍໂນ ໂຣນັລໂດ ເກີດບາດເຈັບລະຫວ່າງການແຂ່ງຂັນໃນລີກນັດທີ່ບຸກໄປສະເໝີກັບ ຣີລ ບາຢາໂດລິດ 1-1 ເມື່ອວັນທີ 7 ພຶດສະພາທີ່ຜ່ານມາ ເຊິ່ງອາດຕ້ອງເສຍໂອກາດໃນການລົງຊ່ວຍຕົ້ນສັງກັດຍາດຊີງແຊັມ ຢູຟາແຊັມ ປ້ຽນລີກ.
ຄຣິສເຕຍໂນ ໂຣນັລໂດ ກອງໜ້າຕົວສໍາຄັນຊາວປ໊ອກຕຸຍການຂອງສະໂມສອນ ຣີລ ມາດຣິດ ອາດຈະເສຍໂອກາດລົງສະໜາມຊ່ວຍຕົ້ນສັງກັດໃນການແຂ່ງຂັນບານເຕະ ຢູຟາ ແຊັມປ້ຽນລີກ ຮອບຊີງຊະນະເລີດ ທີ່ຈະພົບກັບ ແອັດເລຕິໂກ ມາດຣິດ ໃນວັນເສົາທີ 24 ພຶດສະພານີ້ ຫຼັງຄາດກັນວ່າອາການບາດເຈັບທີຂາຂອງເຈົ້າຕົວກັບຄືນມາເກີດອາການອີກຄັ້ງ ລະຫວ່າງການແຂ່ງຂັນໃນ ລາລີກາ ແອັດສະປາຍ ນັດທີ່ ຣີລ ມາດຣິດ ບຸກໄປຢາມເຮັດໄດ້ພຽງສະເໝີກັບ ຣີລ ບາຢາໂດລິດ 1-1 ເມື່ອວັນທີ 7 ພຶດສະພາທີ່ຜ່ານມາ.
ຫົວໜ້າທີມຊາດປ໊ອກຕຸຍການ ອາຍຸ 29 ປີມີອາການບາດເຈັບມາຕັ້ງແຕ່ຕົ້ນການແຂ່ງຂັນ ຈົນຖືກປ່ຽນຕົວອອກ ນາທີໆ 9 ໂດຍໃຫ້ ອັລບາໂຣ ໂມຣາຕ້າ ລົງຫຼິ້ນແທນ ແຕ່ຕອນນີ້ຍັງບໍ່ເປັນທີ່ແນ່ນອນວ່າ ມັນຈະເປັນອາການບາດເຈັບບ່ອນເກົ່າທີ່ເຈົ້າຕົວໄດ້ຮັບໃນໄລຍະທ້າຍເດືອນເມສາທີ່ຜ່ານມານັ້ນ ຫຼືບໍ.
ບັນຫາບາດເຈັບດັ່ງກ່າວເຄີຍເຮັດໃຫ້ ໂຣນັລໂດ ພາດລົງຊ່ວຍ ຣີລ ມາດຣິກ ໃນການແຂ່ງຂັນ ຢູຟາ ແຊັມປ້ຽນລີກ ຮອບກ່ອນຮອງຊະນະເລີດນັດທີ 2 ທີ່ບຸກໄປຢາມ ດ໊ອດມູນ ເຊັ່ນດຽວກັນກັບເກມລີກທີ່ພົບກັບ ຣີລ ໂຊເຊຍດາດ ແລະ ອັລເມເຣຍ ລວມເຖິງ ໂຄປາ ເດລ ເຣ ຮອບຊີງຊະນະເລີດ ທີ່ຕົ້ນສັງກັດເສືອນເອົາຊະນະ ບາເຊໂລນາ 2-1 ໄດ້ແຊັມໄປຄອງ ເມື່ອວັນທີ 16 ເມສາທີ່ຜ່ານມາອີກດ້ວຍ.
ຕອນນີ້ຕ້ອງລໍຖ້າລຸ້ນເຍິ່ງວ່າອາການຂອງເຈົ້າຕົວອີກຄັ້ງ ເພາະນອກຈາກຈະມີລາຍການແຂ່ງຂັນ ຢູຟາ ແຊັມປ້ຽນລີກແລ້ວ ຣີລ ມາດຣິດ ຍັງມີລາຍການແຂ່ງຂັນໃນລີກສູງສຸດຂອງ ແອັດສະປາຍ ອີກ 2 ນັດທີ່ສຳຄັນອີກໄດ້ແກ່: ບຸກໄປຢາມ ເຊລຕາ ວີໂກ ວັນທີ 14 ພຶດສະພາ ແລະ ຕ້ອນຮັບ ເອສປັນຢອລ ວັນທີ 18 ພຶດສະພາ.
ໂດຍສະຖານະການຕອນນີ້ ຣີລ ມາດຣິດ ລຸ້ນແຊັມ ລາລີກາ ແອັດສະປາຍ ລໍາບາກ ເນື່ອງຈາກຕາມຫຼັງ ແອັດເລຕິໂກ ມາດຣິດ (ຜູ້ນໍາ) ແລະ ບາເຊໂລນາ (ອັນດັບ 2) ຢູ່ 4 ແລະ 1 ຄະແນນຕາມລຳດັບ ຂະນະທີ່ຕ້ອງລຸ້ນໃຫ້ທັນສອງທີມນຳສະເໝີ ຫຼື ເສຍໃນ 2 ນັດສຸດທ້າຍ ໂດຍສະເພາະ ບາເຊໂລນາ ຈະເປີດບ້ານຕ້ອນຮັບ ແອັດເລຕິໂກ ມາດຣິດ ໃນວັນທີ 18 ພຶດສະພາ ຖ້າລົງເອີຍດ້ວຍຜົນສະເໝີ ຫຼື ແອັດເລຕິໂກ ມາດຣິດ ເສຍກໍ່ອາດມີລຸ້ນແຊັມໄດ້ເຊັ່ນກັນ.