ສຳນັກຂ່າວຕ່າງປະເທດ ລາຍງານໃນວັນທີ 18 ເມສານີ້ວ່າ ເຈົ້າໜ້າທີ່ກູ້ໄພຍີ່ປຸ່ນ ຍັງຄົງເລັ່ງຄົ້ນຫາຜູ້ສູນຫາຍອີກ 9 ຄົນ ຈາກເຫດແຜ່ນດິນໄຫວ ຂະໜາດ 7.0 ຢູ່ເກາະຄິວຊູ ເມື່ອວັນເສົາທີ 16 ເມສາຜ່ານມາ ໂດຍປັດຈຸບັນ ລວມຍອດຜູ້ເສຍຊີວິດ ຈາກເຫດແຜ່ນດິນໄຫວຮຸນແຮງດັ່ງກ່າວ ແມ່ນຢ່າງໜ້ອຍ 42 ຄົນ ເຮັດໃຫ້ທີ່ຢູ່ອາໄສຂອງປະຊາຊົນ ຫລາຍກວ່າ 25,000 ຄົນ ຖືກທຳລາຍໂດຍແຜ່ນດິນໄຫວ ແລະ ດິນເຈື່ອນ.
ຂະນະດຽວກັນ ລັດຖະບານຍີ່ປຸ່ນ ໄດ້ສັ່ງອົບພະຍົບປະຊາຊົນອີກ ຫລາຍກວ່າ 110,000 ຄົນ ໃນແຂວງຄຸມາໂມໂຕະ ອອກຈາກພື້ນທີ່ສ່ຽງໄພ ເພື່ອໄປອາໄສຢູ່ບ່ອນພັກເຊົາຊົ່ວຄາວ ທີ່ທາງການຈັດຂຶ້ນ.
