ຕາມການໃຫ້ສຳພາດຂອງທ່ານ ບຸນທຶງ ພົງສະຫວັດ ຄະນະປະຈຳພັກເມືອງ ຮອງປະທານອົງການພັດທະນາ ແລະບໍລິຫານຕົວເມືອງ ໄດ້ແຈ້ງໃຫ້ຮູ້ໃນວັນທີ 7 ເມສາ 2016 ວ່າ: ຕະຫຼອດໄລຍະ 5 ປີຜ່ານມາ (2011-2015) ອົງການບໍລິຫານ ແລະພັດທະນາຕົວເມືອງ ໄດ້ຮັບງົບປະມານໃນການພັດທະນາພື້ນຖານໂຄງລ່າງ ໂດຍສະເພາະ ໂຄງການຂະຫຍາຍເສັ້ນທາງໃນເທສະບານເມືອງ ປະກອບມີ 23 ໂຄງການ, ມູນຄ່າ 72 ຕື້ກວ່າກີບ, ໃນນັ້ນ ໄດ້ກໍ່ສ້າງສຳເລັດແລ້ວ 23 ໂຄງການ ເຊິ່ງປະກອບມີ: ໂຄງການເຂດບ້ານໂພນສະຫວ່າງໃຕ້ ທາງ 4 ເສັ້ນ, ໂພນສະຫວ່າງເໜືອ 3 ເສັ້ນ, ບ້ານສອນໄຊ 2 ເສັ້ນ, ບ້ານຫົວເມືອງເໜືອ 1 ເສັ້ນ, ບ້ານອຸດົມວິໄລ 5 ເສັ້ນ, ໂພນສະຫວັນ 4 ເສັ້ນ, ໂພນສະອາດ 3 ເສັ້ນ, ສອນໄຊ 2 ເສັ້ນ, ທ່າເມືອງ 1 ເສັ້ນ, ໂພນສະຫວາດ 2 ເສັ້ນ, ສຸນັນທາ 1 ເສັ້ນ, ສະໜາມໄຊ 3 ເສັ້ນ, ສະພານໃຕ 2 ເສັ້ນ, ດົງດຳດວນ 4 ເສັ້ນ, ໜອງເດີ່ນ 1 ເສັ້ນ ແລະບ້ານໝໍເມືອງ 1 ເສັ້ນ, ລວມມີໄລຍະທາງທັງໝົດ 33.582 ແມັດ. ໃນນັ້ນມີທາງ ບຸກເບີກໃໝ່ 1 ເສັ້ນ, ຍາວ 528 ແມັດ, ທາງຍົກລະດັບດິນແດງ 7 ເສັ້ນ, ຍາວ 10.443 ແມັດ, ທາງປູຢາງຊັນໜຶ່ງ 26 ເສັ້ນ, ຍາວ 20.279 ແມັດ, ທາງປູຍາງສອງຊັ້ນ 1 ເສັ້ນ, ຍາວ 240 ແມັດ ແລະທາງເບຕົງເສີມເຫຼັກ 5 ເສັ້ນ, ຍາວ 2.092 ແມັດ. ໂດຍແມ່ນບໍລິສັດ ສະຫວັນຄຳ ກໍ່ສ້າງ ຂົວ-ທາງ ຈຳກັດ ເປັນຜູ້ຮັບເໝົາກໍ່ສ້າງ.
ປະຈຸບັນ ໂຄງການກໍ່ສ້າງ ກຳລັງສຸມໃສ່ ປູຢາງຊັ້ນໜຶ່ງເສັ້ນທາງເຂດບ້ານສະໜາມໄຊ 3 ເສັ້ນ, ເຊິ່ງເປັນອີກເສັ້ນທາງໜຶ່ງທີ່ມີຄວາມສຳຄັນ ໃນການລະບາຍລົດ ເຊິ່ງເສັ້ນທາງດັ່ງກ່າວນີ້ ເປັນເສັ້ນທາງເຊື່ອມຕໍ່ໃສ່ທາງເລກ 9 ຢູ່ເຂດກິໂລແມັດທີ 7 ມາເຊື່ອມຕໍ່ໃສ່ເສັ້ນທາງຟ້າງຸ່ມ (ທາງໄປ ມ.ຂ) ເຊິ່ງເປັນເສັ້ນທາງໃໝ່ນອກເມືອງ ເພື່ອລະບາຍລົດທີ່ແອອັດຕາມຕົວເມືອງ ແລະຄາດວ່າຈະໃຫ້ສຳເລັດກ່ອນປີໃໝ່ລາວ 2559 ຢ່າງແນ່ນອນ.
ໃນໂອກາດດັ່ງກ່າວ ທ່ານ ບຸນທຶງ ພົງສະຫວັດ ຍັງໄດ້ຝາກມາເຖິງຜູ້ໃຊ້ລົດ ໃຊ້ຖະໜົນ ແລະເຈົ້າໜ້າທີ່ ທີ່ກ່ຽວຂ້ອງ ຈົ່ງພ້ອມກັນເປັນຫູ ເປັນຕາ, ກວດກາໃນການໃຊ້ລົດບັນທຸກນ້ຳໜັກເກີນ ແລະຜູ້ປະກອບການ ກໍ່ບໍ່ຄວນໃສ່ນ້ຳໜັກຫຼາຍຈົນເກີນໄປ ເພາະເສັ້ນທາງດັ່ງກ່າວ ເປັນເສັ້ນທາງປູຢາງຊັ້ນດຽວ ບໍ່ສາມາດຮັບນ້ຳໜັກຫຼາຍເກີນໄປ ຈະເຮັດໃຫ້ເສັ້ນທາງເປ້ເພ ແລະສູນເສຍງົບປະມານໃນການສ້ອມແປງຕື່ມອີກ.
ຂ່າວຈາກ: ສະຫວັນພັດທະນາ ຂ່າວ / Savanhphuttana News