ນັບແຕ່ວັນທີ 13-16 ເມສາ 2016, ຊຶ່ງເປັນມື້ທີ່ປວງຊົນລາວທັງຊາດໃນທົ່ວປະເທດໄດ້ພ້ອມກັນສະເຫລີມສະຫລອງບຸນປີໃໝ່ລາວ ຢ່າງຄຶກຄື້ນມ່ວນຊື່ນ ຕາມຮີດຄອງປະເພນີ ແລະ ວັດທະນະທຳອັນດີງາມຂອງຊາດ, ເຊິ່ງໃນວັນທີ13 ເມສາ ເປັນມື້ສັງຂານລ່ວງ ນັບແຕ່ເວລາ 13:00 ໂມງ ຊາວພຸດ ແລະປະຊາຊົນລາວ ຢູ່ນະຄອນຫລວງວຽງຈັນ ກໍຄື ຢູ່ບັນດາແຂວງໃນທົ່ວປະເທດຕ່າງກໍໄດ້ຈັດກິດຈະກຳສຳຄັນຕ່າງໆທາງພຸດທະສາສະໜາ ເປັນຕົ້ນ ຢູ່ຕາມວັດວາອາຣາມແຕ່ລະແຫ່ງ ໄດ້ນຳເອົາພະພຸດທະຮູບ ລົງປະດິດສະຖານໄວ້ທີ່ຫໍສົງເພື່ອເປີດໂອກາດໃຫ້ຊາວພຸດທັງຫລາຍ ແລະ ປະຊາຊົນລາວບັນດາເຜົ່າໄດ້ຫົດສົງຕາມຮີດຄອງປະເພນີ ອັນດີງາມທີ່ມີມາແຕ່ດຶກດຳບັນ.
ສຳລັບການສະເຫລີມສະຫລອງ ບຸນປະເພນີສຳຄັນດັ່ງກ່າວ ສະເພາະຢູ່ນະຄອນຫລວງວຽງຈັນ ໄດ້ຈັດກິດຈະກຳສຳຄັນທາງປະເພນີເປັນຕົ້ນ: ຂະບວນແຫ່ພະພຸດທະຮູບມິ່ງບ້ານມິ່ງເມືອງ, ຂະບວນການນຳນະຄອນຫລວງວຽງຈັນ ແລະ ເຖົ້າແກ່ແນວໂຮມ ເຊິ່ງນຳໂດຍທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫລວງວຽງຈັນ,ຂະບວນນາງສາວນະຄອນຫລວງວຽງຈັນ ພສ 2559 (ນາງສັງຂານ ທັງ 7 ເຊິ່ງເປັນຕົວແທນໃຫ້ລູກສາວຂອງພະຍາກະບິນລະພົມ), ພ້ອມນັ້ນ ຍັງມີຂະບວນສິລະປະດົນຕີມະໂຫລີພື້ນເມືອງລາວ ແລະ ຂະບວນມວນຊົນຊາວນະຄອນຫລວງວຽງຈັນ ເຂົ້າຮ່ວມຢ່າງຫລວງຫລາຍ. ຂະບວນແຫ່ດັ່ງກ່າວ ແມ່ນໄດ້ເລີ່ມຈາກວັດອິນແປງ ແຫ່ໄປຕາມຖະໜົນເສດຖາທິລາດ ໄປຫາໄຟແດງໂຮງໝໍມະໂຫສົດ ລ້ຽງອອກໃສ່ເສັ້ນທາງຟ້າງຸ່ມ ຜ່ານສວນສາທາ ລະນະເຈົ້າອານຸວົງ ໄປຫາວົງວຽນປາກປ່າສັກ ແລ້ວກັບຄືນຫາວັດອິນແປງ, ເຊິ່ງໃນລະຫວ່າງການແຫ່ຂະບວນໂດຍມີທ່ານດຣ. ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ເຈົ້າຄອງນະຄອນຫລວງວຽງຈັນ ພ້ອມດ້ວຍການນຳພັກ-ລັດ ໄດ້ລໍຖ້າໃຫ້ການຕ້ອນຮັບ ແລະ ຊົມຂະບວນດັ່ງກ່າວທີ່ຜາມຕໍ່ໜ້າວົງວຽນນ້ຳພຸ, ສ່ວນຢູ່ຫາດແຄມຂອງກໍໄດ້ມີກິດຈະກຳສະແດງປະຕິມະກຳຊາຍ ແລະ ງານເດີນແບບຜ້າຝ້າຍລາວ, ເຊິ່ງໄດ້ຮັບຄວາມສົນໃຈຈາກນັກທ່ອງທ່ຽວ ແລະ ມວນຊົນເປັນຢ່າງດີ.
ສຳລັບວັນທີ 14-15-16 ເມສານີ້, ປະຊາຊົນລາວທົ່ວປະເທດໄດ້ພ້ອມກັນສືບຕໍ່ສະຫລອງບຸນດັ່ງກ່າວຢ່າງມ່ວນຊື່ນ, ໂດຍໄດ້ຫົດສົງພະຢູ່ຕາມວັດຕ່າງທ ແລະ ຫົດສົງນ້ຳຢ່າງຄຶກຄື້ນມ່ວນຊື່ນຕາມເສັ້ນທາງສຳຄັນເປັນຕົ້ນ:ຖະໜົນເສດຖາທິລາດ, ເຈົ້າຟ້າງຸ່ມ ແລະ ສະຖານທີ່ອື່ນໆ. ນອກນັ້ນ ບາງຄອບຄົວຍັງໄດ້ມີພິທີບາສີສູ່ຂວັນ, ສົມມາຜູ້ຊົງຄຸນວຸດທິ, ພໍແມ່-ເຖົ້າແກ່ອາວຸໂສ ເພື່ອສະແດງຄວາມຮູ້ບຸນຄຸນ ກະຕັນຍູກະຕະເວທີຕໍ່ຜູ້ມີພະຄຸນ ເພື່ອສົ່ງທ້າຍປີເກົ່າ ແລະ ຕ້ອນຮັບປີໃໝ່ ບົນຈິດໃຈແຫ່ງຄວາມເບີກບານມ່ວນຊື່ນ, ຮັກສາໄດ້ຮີດຄອງປະເພນີອັນດີງາມທີ່ເປັນເອກກະລັກຂອງຊາດໃຫ້ຄົງຢູ່ຕະຫລອດການ.
ຂ່າວຈາກ: 