ເພື່ອເປັນການຕອບສະໜອງກັບຄວາມຮຽກຮ້ອງຕ້ອງການໃນການອຳນວຍຄວາມສະດວກດ້ານການຄົມມະນາຄົມຂົນສົ່ງທາງອາກາດທີ່ນັບມື້ມີການຂະຫຍາຍຕົວ ແລະ ເພື່ອເປັນການຮອງຮັບນັກທ່ອງທ່ຽວ, ພໍ່ແມ່ປະຊາຊົນ, ນັກທຸລະກິດທີ່ຕ້ອງການລົງທຶນຢູ່ເຂດໃຕ້ສຸດຂອງປະເທດລາວ, ທັງເປັນການເປີດນຳໃຊ້ສະໜາມບິນອັດຕະປືທີ່ເປັນສະໜາມບິນສາກົນແຫ່ງໃໝ່ເພື່ອຕ້ອນຮັບບຸນປີໃໝ່ລາວ ສະນັ້ນ; ລັດວິສາຫະກິດການບິນລາວ ກຽມເປີດຖ້ຽວບິນຮອບປະຖົມມະລືກ ລະຫວ່າງ ວຽງຈັນ-ອັດຕະປື ໃນວັນທີ 9 ເມສາ 2016 ໂດຍໃຊ້ເຮືອບິນ ATR 72-600 ຫລັງຈາກທີ່ກະກຽມຄວາມພ້ອມມາດົນ ທັງເປັນການຕອບສະໜອງການເດີນທາງໃນໄລຍະບຸນປີໃຫມ່ລາວທີ່ຈະມາເຖິງທ່ານ ແສງປະເສດ ມະທຸຈັນ ຮອງອຳນວຍການວິສາຫະກິດການບິນລາວ ໃຫ້ຮູ້ວ່າ: ການບິນລາວຈະໄດ້ເປີດເສັ້ນບິນໃໝ່ ລະຫວ່າງ ວຽງຈັນ-ອັດຕະປື ໃນວັນທີ 9 ເມສາ 2016 ນີ້ ເປັນຖ້ຽວບິນຮອບປະຖົມມະລືກ ສຳລັບເສັ້ນບິນ ວຽງຈັນ-ອັດຕະປື ອອກເດີນທາງທຸກໆວັນ ອັງຄານ ແລະ ວັນເສົາ ເວລາ 8:00 ຮອດອັດຕະປື 9:45 ໂມງເຊົ້າ ໃນລາຄາເລີ່ມຕົ້ນເປີດໃຫມ່ໄປ-ກັບ 990, 000 ກີບ ເຊິ່ງປັດຈຸບັນກໍ່ມີຜູ້ໂດຍສານຈຳນວນໜຶ່ງໄດ້ຈອງປີ້ ເພື່ອເດີນທາງໄປໃນຮອບທຳອິດນີ້.

ທ່ານ ໜູກອນ ແກ້ວບົວວັນ ຫົວໜ້າຫ້ອງການຄຸ້ມຄອງສະໜາມບິນແຂວງອັດຕະປື ວ່າ: ພວກເຮົາມີຄວາມພ້ອມເຕັມທີ່ໃນການຮອງຮັບການໃຫ້ບໍລິການຖ້ຽວບິນດັ່ງກ່າວ.
ສະໜາມບິນສາກົນ ແຂວງອັດຕະປືໄດ້ເປີດນຳໃຊ້ຢ່າງເປັນທາງການ ແຕ່ວັນທີ 30 ພຶດສະພາ 2015ພາຍຫຼັງທີ່ໄດ້ລົງມືກໍ່ສ້າງແຕ່ກາງປີ 2013 ເປັນຕົ້ນມາ ດ້ວຍມູນຄ່າເກືອບ 300 ຕື້ກີບ ໂດຍໄດ້ຮັບການສະໜອງສິນເຊື່ອ ແລະ ລົງທຶນຈາກບໍລິສັດຫຸ້ນສ່ວນຮວ່າງ ແອງຢາລາຍສສ. ຫວຽດນາມ

(ຫນັງສືພິມ ເສດຖະິກດ-ການຄ້າ ສະບັບວັນສຸກທີ 8 ເມສາ 2016)