ກົມໃຫຍ່ຕຳຫລວດກະຊວງປ້ອງກັນຄວາມສະຫງົບໄດ້ອອກແຈ້ງການເຖິງພໍ່ແມ່ປະຊາຊົນ, ພະນັກງານ,ທະຫານ, ຕຳຫລວດ ແລະ ຜູ້ໃຊ້ລົດໃຊ້ຖະໜົນກ່ຽວກັບການສະເຫລີມສະຫລອງບຸນປີໃໝ່ລາວ ພສ 2559 ໃຫ້ມີຄວາມເປັນລະບຽບຮຽບຮ້ອຍ, ມີຄວາມເບີກບານມ່ວນຊື່ນ ແລະ ສາມາດຫລີກລ້ຽງການສູນເສຍທາງດ້ານສຸຂະພາບ, ຊີວິດ ແລະ ຊັບສິນ, ຊຶ່ງໄດ້ລະບຸວ່າ: ໃຫ້ຜູ້ທີ່ໃຊ້ລົດໃຊ້ຖະໜົນປະຕິບັດກົດລະບຽບຈະລາຈອນຢ່າງເຂັ້ມງວດ; ຫ້າມດື່ມສິ່ງມຶນເມົາແລ້ວຂັບຂີ່ລົດ; ຫ້າມແລ່ນລົດໄວເກີນກຳນົດ, ຫ້າມບັນທຸກຂົນສົ່ງສິນຄ້າໜັກ ແລະ ຄົນໂດຍສານເກີນກຳນົດ; ຫ້າມເອົາຖັງນ້ຳຕ່າງໃສ່ລົດທຸກປະເພດຫົດ-ສາດນ້ຳໃສ່ກັນຢ່າງເດັດຂາດ; ຫ້າມແລ່ນລົດເປັນພຶງເປັນແພ ແລະ ແຂ່ງຂັນຕາມສາຍທາງຕົວເມືອງຢ່າງເດັດຂາດ, ຊຶ່ງປີຜ່ານມາໄດ້ສ້າງຜົນເສຍຫາຍເຖິງສຸຂະພາບ, ຊີວິດ ແລະ ຊັບສິນຂອງພໍ່ແມ່
ປະຊາຊົນຫລາຍພໍສົມຄວນ ມັນໄດ້ສະແດງອອກໃນປີ 2015 ມີອຸປະຕິເຫດເພີ່ມຂຶ້ນໃນໄລຍະສະຫລອງບຸນປີໃໝ່ເຖິງ278 ກໍລະນີ, ພາຫະນະເປ່ເພ 509 ຄັນ, ມີຜູ້ໄດ້ຮັບບາດເຈັບ 452 ຄົນ, ເສຍຊີວິດ 38 ຄົນ. ສະນັ້ນ ໃນປີ 2016 ນີ້ພວກເຮົາທຸກຄົນໃນສັງຄົມ, ໂດຍສະເພາະຜູ້ໃຊ້ລົດໃຊ້ຖະໜົນຄວນໄດ້ເອົາໃຈໃສ່, ມີສະຕິໃນການຂັບຂີ່ທຸກຄັ້ງ, ໃສ່ໝວກກັນກະທົບ, ບໍ່ຂັບຂີ່ລົດດ້ວຍຄວາມໄວທີ່ກຳນົດໄວ້ຕາມເສັ້ນທາງຕ່າງໆ ເພື່ອສະກັດກັ້ນ ແລະ ປ້ອງກັນການເກີດອຸປະຕິເຫດໃນໄລຍະປີໃໝ່ລາວທີ່ຈະມາເຖິງນີ້, ພ້ອມທັງຊ່ວຍຫລຸດຜ່ອນຈຳນວນຂອງອຸປະຕິເຫດ ແລະ ຈຳນວນຂອງຜູ້ເສຍຊີວິດໃນໄລຍະດັ່ງກ່າວນຳອີກ.
ຂ່າວຈາກ: 