ໃນສັງຄົມປັດຈຸບັນ ພໍ່ແມ່ແຕ່ລະຄົນລ້ວນແຕ່ຢາກເຫັນລູກມີສຸຂະພາບທີ່ດີ ແລະ ມັກຈະຊອກອາຫານເສີມດີໆມາໃຫ້ລູກກິນ ເພື່ອສົ່ງເສີມການພັດທະນາການ ແລະ ທັກສະຕ່າງໆ ໂດຍສະເພາະດ້ານສະໝອງ. ແຕ່ທ່ານຮູ້ບໍ່ວ່າ ເຮົາບໍ່ຈຳເປັນຕ້ອງອາໃສອາຫານເສີມລາຄາແພງກໍ່ໄດ້ ເພາະອາຫານບຳລຸງສະໝອງເດັກທີ່ຈະແນະນຳຕໍ່ໄປ ທ່ານສາມາດຫາໄດ້ງ່າຍໆ.
ປາແຊວມອນ: ໃນຊີ້ນປາຊະນິດນີ້ອຸດົມໄປດ້ວຍກົດໄຂມັນ, ມີໂອເມກາ 3 DHA ແລະ EPAຊຶ່ງມີຄວາມຈຳເປັນສຳລັບການຈະເລີນເຕີບໂຕຂອງຮ່າງກາຍ ແລະ ສະໝອງ.
ໄຂ່: ໄຂ່ໜຶ່ງໜ່ວຍອຸດົມໄປດ້ວຍໂປຣຕີນ ສະເພາະໄຂ່ແດງຈະມີໂປຣຕີນຫຼາຍທີ່ສຸດ ປະໂຫຍດຈາກໄຂ່ກໍ່ຄື ຊ່ວຍໃນການບຳລຸງສະໝອງ, ບຳລຸງຮ່າງກາຍ ແລະ ຊ່ວຍຟື້ນຟູສຸຂະພາບອີກດ້ວຍ.
ເນີຍ: ໃນເນີຍຈະມີສານ ເລຊິຕິນ, ວິຕາມິນອີ ທີ່ມີຊ່ວຍຕໍ່ຕ້ານອະນຸມູນອິດສະຫຼະ, ບຳລຸງສະໝອງ ແລະ ເພີ່ມຄວາມຈື່ຈຳ.
ທັນຍາພືດເຊັ່ນ: ສາລີ, ເຂົ້າຫວີດ, ເຂົ້າກ້ອງ ຈະໃຫ້ພະລັງງານສູງ ແລະ ມີເສັ້ນໃຍທີ່ຊ່ວຍໃນການຄວບຄຸມລະດັບນ້ຳຕານໃນເລືອດ ແລະ ມີວິຕາມິນບີ ແລະ ຊ່ວຍເພີ່ມຄວາມຈື່ຈຳ ແລະ ບຳລຸງສະໝອງ.
ເຂົ້າໂອ໊ດ: ຖ້າຫາກເດັກກິນເຂົ້າໂອ໊ດເປັນປະຈຳສານອາຫານໃນເຂົ້າຊະນິດນີ້ຈະຊ່ວຍໃຫ້ສະໝອງ ແລະ ຮ່າງກາຍເຮັດວຽກໄດ້ຢ່າງເໝາະສົມເພາະມັນມີທັງວິຕາມິນບີ, ໂພແທັດຊຽມ ແລະ ທາດສັງກະສີ.
ຖົ່ວ: ເປັນແຫຼ່ງຂອງໂປຣຕີນ ແລະ ຄາໂບໄຮເດດ ຊ່ວຍເພີ່ມລະດັບພະລັງງານໃຫ້ຮ່າງກາຍໄດ້, ເສີມຄວາມຈື່ຈຳ, ບຳລຸງສະໝອງ.
ໝາກໄມ້ຕະກຸນເບີຣີ່ ເຊັ່ນ: ສະຕຣໍເບີຣີ່, ບຣູເບີຣີ່ ລ້ວນແຕ່ໃຫ້ປະໂຫຍດແກ່ຮ່າງກາຍຄື: ຊ່ວຍເລື່ອງຄວາມຈຳ, ລະບົບປະສາດສະໝອງ ເພາະວ່າໝາກໄມ້ພວກນີ້ມີທັງວິຕາມິນຊີ ແລະ ໂອເມກ້າ3.
ຜັກສີສົດ: ໃນຜັກສີສົດຈະມີແຮ່ທາດ ແລະ ວິຕາມິນຈຳນວນຫຼາຍ ມີທັງສານຕໍ່ຕ້ານອະນຸມູນອິດສະຫຼະ, ຊ່ວຍລະບົບພູມຄຸ້ມກັນ ແລະ ຮັກສາສະໝອງໃຫ້ແຂງແຮງ.
ນົມ ຫຼື ໂຍເກິດ: ເປັນອາຫານມີຄວາມຈຳເປັນ ຕໍ່ການຈະເລີນເຕີບໃຫຍ່ຂອງເນື້ອເຍື້ອຂອງສະໝອງ ແລະເອັນໄຊຊຶ່ງມີສ່ວນຊ່ວຍໃຫ້ຮ່າງກາຍມີຄວາມແຂງແຮງ ແລະ ຊ່ວຍໃນການພັດທະນາສະໝອງ.
ຊິ້ນບໍ່ຕິດມັນ: ການກິນຊີ້ນເປັນສິ່ງທີ່ດີ ແຕ່ຄວນກິນຊີ້ນບໍ່ຕິດມັນເພາະຖ້າກິນຊີ້ນທີ່ຕິດມັນຫຼາຍເກີນໄປອາດເຮັດໃຫ້ເກີດໂລກຕ່າງໆ ຕາມມາໄດ້. ໃນຊີ້ນທີ່ບໍ່ຕິດມັນ ມັກຈະມີເກືອແຮ່ ຊຶ່ງເປັນສິ່ງສຳຄັນຫຼາຍສຳລັບການເຕີບໃຫບ່ຂອງເດັກ.
ຂໍ້ມູນຈາກ: http://vtlaos.com/