ສຳນັກຂ່າວຕ່າງປະເທດ ລາຍງານໃນວັນທີ 6 ເມສາຜ່ານມານີ້ວ່າ ທ່ານ Staffan de Mistura ທູດ​ພິ​ເສດ​ຂອງ​ສະຫະ​ປະຊາ​ຊາດ​ກ່ຽວ​ກັບ​ຊີຣີ ໄດ້ເຂົ້າພົບປະຫາລືກັບ ທ່ານ ເຊີເກ ລາບຣອບ ລັດຖະມົນຕີການຕ່າງປະເທດຣັດເຊຍ ທີ່ນະຄອນຫລວງມົດສະກູ ເມື່ອວັນທີ 5 ເມສາ 2016 ຜ່ານມາ ເພື່ອກະ​ກຽ​​ມ​ໃຫ້ແກ່ ການເປີດຮອບ​ເຈລະຈາ​ສັນຕິພາບ​ທີ່ຈະ​ມາ​ເຖິງ​ ລະ​ຫວ່າງ​ບັນດາຝ່າຍທີ່​ເຂົ້າ​ຮ່ວມການ​ສູ້​ຮົບ​ຢູ່ຊີຣີ ຊຶ່ງ​ອາດຈະ​ໄດ້​​ສືບ​ຕໍ່​ຄືນ​ໃໝ່ ໃນ​ວັນ​ທີ 11 ເມສານີ້ ທີ່ນະຄອນເຊີ​ແນ​ວ ປະ​ເທດສະ​ວິດ.

ກ່ອນ​ໜ້າ​ນັ້ນ, ທ່ານ Mistura ​ໃຫ້​ຮູ້​ວ່າ ທ່ານຈະ​ເລີ່​ມດຳ​ເນີນ​ການ​ເຈລະຈາ​ຮອບໃໝ່ ​ໃນ​ວັນ​ທີ 11 ເມສາ ດ້ວຍ​ການ​ພົບ​ປະ​ກັບ ​ບັນດາ​ຜູ້ຕາງໜ້າ​ຂອງ​ຄະນະ​ກຳມະການ​ເຈລະຈາ​ຂັ້ນ​ສູງ (HNC) ແລະ ສຳພັນ​ທະ​ມິດ​​ຫລາຍ​ກຸ່ມຝ່າຍ​ຄ້ານ​ຢູ່ຊີຣີ.