ເພື່ອເຮັດໃຫ້ສັງຄົມມີຄວາມສະຫງົບ, ປົກປ້ອງສິດຜົນປະໂຫຍດຂອງຜູ້ຊົມໃຊ້ໃຫ້ໄດ້ຮັບຄວາມເປັນທຳທາງດ້ານລາຄາ, ປະລິມານ ແລະຄຸນນະພາບ ໂດຍສະເພາະແມ່ນສິນຄ້າທີ່ມີຄວາມຈຳເປັນ ແລະມີຜົນກະທົບໄວຕໍ່ຊີວິດການເປັນຢູ່ຂອງປະຊາຊົນເປັນຕົ້ນແມ່ນສິນຄ້າສະບຽງອາຫານປະເພດຊີ້ນງົວ, ຄວາຍ, ໝູ, ເຫັດ, ເປັດ,ໄກ່, ປາ, ພືດຜັກ ແລະເຄື່ອງດື່ມຕ່າງໆກະຊວງອຸດສາຫະກຳ ແລະການຄ້າ (ອຄ) ຈິ່ງໄດ້ອອກແຈ້ງການໃຫ້ພະແນກ ອຄ ທົ່ວປະເທດເອົາໃຈໃສ່ລົງຕິດຕາມ, ກວດກາ, ຄຸ້ມຄອງແກ້ໄຂກ່ຽວກັບສະພາບການປັ່ນປ່ວນ, ກັກຕຸນ ແລະສວາຍໂອກາດຂຶ້ນລາຄາສິນຄ້າໃນໄລຍະເທສະການບຸນປີໃໝ່ລາວ ປະຈຳປີ ພສ 2559 ທີ່ຈະມາເຖິງທັງຮັບປະກັນໃຫ້ໄດ້ການສະໜອງຢ່າງພຽງພໍກັບຄວາມຕ້ອງການຂອງສັງຄົມ.
ແຈ້ງການດັ່ງກ່າວແມ່ນສະບັບເລກທີ 0804/ຫອຄ.ຄພນ ເຊັນລົງວັນທີ 5 ເມສາ 2016 ໂດຍທ່ານຫົວໜ້າຫ້ອງການກະຊວງ ອຄ ຊຶ່ງເນື້ອໃນອັນທຳອິດແມ່ນໃຫ້ພະແນກອຸດສາຫະກຳ ແລະການຄ້າທົ່ວປະເທດເປັນເຈົ້າການສືບຕໍ່ຈັດຕັ້ງປະຕິບັດຢ່າງເຂັ້ມງວດຕໍ່ກັບແຈ້ງການສະບັບເລກທີ 2402/ອຄ.ຄພນ, ລົງວັນທີ 01 ທັນວາ 2015 ກ່ຽວກັບໃຫ້ເອົາໃຈໃສ່ຊີ້ນຳໃນການຕິດຕາມ, ກວດກາ, ຄຸ້ມຄອງ, ແກ້ໄຂກ່ຽວກັບສະພາບການປັ່ນປ່ວນ, ກັກຕຸນ ແລະສວຍໂອກາດຂຶ້ນລາຄາສິນຄ້າໃນໄລຍະເທສະການງານບຸນປະເພນີຕ່າງໆ.
ບົນພື້ນຖານແຈ້ງການສະບັບດັ່ງກ່າວ ໃຫ້ບັນດາພະແນກອຸດສາຫະກຳ ແລະການຄ້າແຂວງ, ນະຄອນຫຼວງອອກແຈ້ງການສະເພາະເຖິງບັນດາຫ້ອງການອຸດສາຫະກຳ ແລະການຄ້າເມືອງ ແລະຜູ້ປະກອບການທຸລະກິດຊາວຄ້າຂາຍໃນຂອບເຂດແຂວງຕົນກ່ຽວກັບການຫ້າມສວຍໂອກາດຂຶ້ນລາຄາສິນຄ້າຕາມລຳພັງໃຈໃນໄລຍະບຸນປີໃໝ່ລາວ ພສ 2559 ຢ່າງຮີບດ່ວນ.
ເປັນເຈົ້າການຄຸ້ມຄອງ ແລະຕິດຕາມບັນດາຕົວແທນຈຳໜ່າຍ ແລະລູກຄ້າຂອບເຂດທົ່ວປະເທດຂອງຜະລິດຕະພັນເບຍລາວ, ນໍ້າດື່ມ ແລະນໍ້າອັດລົມຕາມ ແຈ້ງການຂອງບໍລິສັດເບຍລາວ ເລກທີ 314, ລົງວັນທີ 31 ມີນາ 2016 ກ່ຽວກັບແຈ້ງການການເກັບແຮສະບັບທີ 2 ໃນໄລຍະເທສະການບຸນປີໃໝ່ລາວຢ່າງເຂັ້ມງວດ.
ທັງນີ້ ໃຫ້ລາຍງານຜົນການຈັດຕັ້ງປະຕິບັດແຈ້ງການເພີ່ມເຕີມສະບັບດັ່ງກ່າວໃຫ້ກົມການຄ້າພາຍໃນ, ກະຊວງອຸດສາຫະກຳ ແລະການຄ້າຊາບເປັນແຕ່ລະໄລຍະ ເພື່ອເປັນຂໍ້ມູນໃນການຄົ້ນຄວ້າ, ປັບປຸງບັນດາລະບຽບການໃຫ້ແທດເໝາະກັບສະພາບການໃນແຕ່ລະໄລຍະ.
ແນວໃດກໍດີ ພາຍຫຼັງໄດ້ຮັບແຈ້ງການສະບັບນີ້ ບັນດາແຂວງໃນຂອບເຂດທົ່ວປະເທດກໍໄດ້ເອົາໃຈໃສ່ຈັດຕັ້ງປະຕິບັດຢ່າງຈິງຈັງເປັນຕົ້ນແມ່ນແຂວງບໍລິຄຳໄຊໂດຍຜູ້ສື່ຂ່າວປະຈຳແຂວງລາຍງານໃຫ້ຮູ້ວ່າ: ໃນວັນທີ 5-6 ເມສາ 2016 ເຈົ້າໜ້າທີ່ກວດກາສິນຄ້າຂະແໜງການຄ້າພາຍໃນພະແນກ ອຄ ຂອງແຂວງ, ເມືອງ ໄດ້ສົມທົບກັບເຈົ້າໜ້າທີ່ ປກສ, ສາທາເມືອງປາກຊັນລົງກວດການຂຶ້ນ-ລົງຂອງສິນຄ້າອຸປະໂພກ, ບໍລິໂພກພ້ອມທັງກວດສິນຄ້າອາຫານທະເລນຳເຂົ້າ, ສິນຄ້າໝົດອາຍຸການນຳໃຊ້ໃນທ້ອງຕະຫຼາດ ແລະຫ້າງຮ້ານໃນທົ່ວເທສະບານ ເມືອງປາກຊັນ.
ຜ່ານການລົງເທື່ອນີ້ເຫັນວ່າ ລາຄາຊີ້ນຄວາຍແມ່ນ 70 ພັນກີບຕໍ່ກິໂລ, ຊີ້ນງົວແມ່ນ 75 ພັນກີບຕໍ່ກິໂລ, ຊີ້ນໝູແມ່ນ 30 ພັນກີບຕໍ່ກິໂລ, ປານິນ 20 ພັນກີບຕໍ່ກິໂລ, ໄກ່ລາດປອກ 60 ພັນກີບຕໍ່ກິໂລ, ໄກ່ພັນປອກ 40 ພັນກີບຕໍ່ກິໂລ, ເປັດປອກ 50 ພັນກີບຕໍ່ກິໂລ.
ໃນໂອກາດດຽວກັນເຈົ້າໜ້າທີ່ສາທາກໍໄດ້ໃຊ້ນຳຢາກວດສານພິດໃນອາຫານທະເລ ແລະໄດ້ກວດພົບສານພິດເຈືອປົນໃນອາຫານຈຳນວນໜຶ່ງ ສ່ວນສິນຄ້າທີ່ ຄະນະກຳມະການທີ່ໄດ້ກວດພົບດັ່ງກ່າວ ແມ່ນໄດ້ຢຶດໄປເກັບໄວ້ຢູ່ພະແນກອຸດສາຫະກຳ ແລະການຄ້າແຂວງ ເພື່ອລໍຖ້າຜູ້ປະກອບການນຳໄປປ່ຽນແທນນຳບໍລິສັດ ຖ້າຫາກກາຍກຳນົດ 10 ວັນຄະນະກຳມະການຈະມີການກຳຈັດທຳລາຍຕາມລະບຽບການ.
ສ່ວນຜູ້ປະກອບການແມ່ນໄດ້ສຶກສາອົບຮົມການເມືອງແນວຄິດໃຫ້ຮັບຮູ້ ແລະເຂົ້າໃຈເຖິງລະບຽບກົດໝາຍ ແລະ ບັນດານິຕິກຳທີ່ກ່ຽວຂ້ອງ ແລະເຮັດບົດບັນທຶກໄວ້ເປັນຫຼັກຖານ, ຖ້າກວດພົບອີກຄັ້ງຕໍ່ໄປຈະປະຕິບັດຕາມລະບຽບຫຼັກການທີ່ມີ.
ທີ່ມາ: