ສຳນັກຂ່າວຕ່າງປະເທດ ລາຍງານໃນວັນທີ 6 ເມສາຜ່ານມານີ້ວ່າ ທາງການອິນໂດເນເຊຍ ໄດ້ທຳລາຍເຮືອປະມົງຕ່າງດ້າວ ທີ່ຍຶດໄດ້ຈາກການລ່ວງລ້ຳເຂົ້າມາຫາປາ ໃນເຂດນ່ານນ້ຳຂອງປະເທດ ໂດຍຜິດກົດໝາຍ ຈຳນວນ 23 ລຳ ຊຶ່ງໃນນັ້ນເປັນເຮືອປະມົງຫວຽດນາມ 13 ລຳ ແລະ ມາເລເຊຍ 10 ລຳ.
ການທຳລາຍເຮືອດັ່ງກ່າວ ແມ່ນດຳເນີນການໂດຍກອງທັບເຮືອ ແລະ ເຈົ້າໜ້າທີ່ຝ່າຍພົນລະເຮືອນອິນໂດເນເຊຍ ໂດຍຕະຫລອດໄລຍະຜ່ານມາ ທາງການອິນໂດເນເຊຍ ໄດ້ມີການທຳລາຍເຮືອປະມົງຕ່າງດ້າວຜິດກົດໝາຍ ທີ່ຍຶດມາໄດ້ ທັງໝົດ 174 ລຳແລ້ວ ແລະ ຍັງເຫລືອອີກ 20 ລຳ ກຳລັງຢູ່ໃນຂັ້ນຕອນການພິຈາລະນາ.
ທັງນີ້ ການທຳລາຍເຮືອປະມົງຕ່າງດ້າວ ທີ່ລ່ວງລ້ຳເຂົ້າມາຫາປາຢ່າງຜິດກົດໝາຍ ແມ່ນເປັນນະໂຍບາຍຂອງ ປະທານາທິບໍດີ ໂຈໂກ ວິໂດໂດ ແຫ່ງ ອິນໂດເນເຊຍ ທີ່ຕ້ອງການສະຫງວນນ່ານນ້ຳຂອງປະເທດ ໃຫ້ແກ່ຄົນຮຸ່ນຫລັງ ໄດ້ໃຊ້ປະໂຫຍດ.
