ສຳນັກຂ່າວຕ່າງປະເທດ ລາຍງານໃນວັນທີ 5 ເມສາຜ່ານມານີ້ວ່າ ທ່ານ ເທັນເຊັນ ອະດີດປະທານາທິບໍດີມຽນມາ ໄດ້ເຂົ້າພິທີອຸປະສົມບົດ ຫລື ບວດ ເປັນພະສົງ ເມື່ອວັນຈັນທີ 4 ເມສາ 2016 ໂດຍກະຊວງຖະແຫລງຂ່າວມຽນມາ ໄດ້ເຜີຍແຜ່ຜ່ານທາງເຟສບຸກວ່າ ອະດີດປະທານາທິບໍດີ ເທັນເຊັນ ຈະໃຊ້ເວລາຢູ່ທີ່ວັດທຳດິປາຕິ ໃກ້ກັບເມືອງມັນດະເລ ເປັນເວລາ 5 ວັນ.
ທັງນີ້ ທ່ານ ເທັນເຊັນ ໄດ້ຮັບການແຕ່ງຕັ້ງເປັນປະທານາທິບໍດີມຽນມາ ໃນປີ 2011 ແລະ ໃນເດືອນພະຈິກປີ 2015 ຜ່ານມານີ້ ມຽນມາໄດ້ມີການຈັດເລືອກຕັ້ງທົ່ວໄປຂຶ້ນ ໂດຍພັກສັນນິບາດຊາດ ເພື່ອປະຊາທິປະໄຕ ຫລື NLD ຂອງທ່ານ ນາງ ອອງຊານ ຊູຈີ ໄດ້ຮັບໄຊຊະນະຈາກການເລືອກຕັ້ງ ແລະ ໄດ້ມີການສົ່ງມອບອຳນາດ ໃຫ້ແກ່ ທ່ານ ຖິ່ນຈໍ ປະທານາທິບໍດີມຽນມາຄົນໃໝ່ ເມື່ອອາທິດທີ່ຜ່ານມານີ້.