ນາຍົກລັດຖະມົນຕີໄທ ທີ່ອາດສາມາດຖືກປົດອອກຈາກຕຳແໜ່ງໄດ້ ຖ້າຖືກຕັດສິນວ່າມີຄວາມຜິດນັ້ນ
ໄດ້ໄປປະກົດຕົວຕໍ່ໜ້າສານລັດຖະທຳມະນູນ ທີ່ບາງກອກ ໃນມື້ນີ້ເພື່ອຕໍ່ສູ້ຄະດີ ຊຶ່ງທ່ານນາງໄດ້ກ່າວປະຕິເສດຕໍ່ຂໍ້ກ່າວຫາຕ່າງໆ
ໂດຍເວົ້າວ່າ:“ຮຽນສານທີ່ເຄົາລົບ ກ່ອນອື່ນ ຂ້າພະເຈົ້າຕ້ອງຂໍຖືໂອກາດປະຕິເສດ ຕໍ່ຂໍ້ກ່າວຫາທັງໝົດ ຕ້ານຂ້າພະເຈົ້ານັ້ນ.”
ຂໍ້ກ້າວຫາເຫລົ່ານັ້ນ ແມ່ນກ່ຽວຂ້ອງກັບການສັບປ່ຽນ ຜູ້ທີ່ດຳລົງຕຳແໜ່ງຫົວໜ້າຄວາມໝັ້ນຄົງແຫ່ງຊາດຂອງທ່ານນາງ
ໃນປີ 2011 ຊຶ່ງພວກຕຳໜິຕິຕຽນທ່ານນາງກ່າວວ່າ ເປັນການເຄື່ອນໄຫວທີ່ບໍ່ຖືກຕ້ອງສອດຄ່ອງກັບລັດຖະທຳມະນູນ
ແລະມີເປົ້າໝາຍເພື່ອສ້າງຜົນປະໂຫຍດໃຫ້ແກ່ພັກເພື່ອໄທ ຂອງທ່ານນາງເອງ.
ໃນຄະດີນຶ່ງອີກຕ່າງຫາກ ຄະນະກຳມະການຕໍ່ຕ້ານການທຸຈະລິດຂອງໄທ ໄດ້ກ່າວຫາ ທ່ານນາງວ່າ ປ່ອຍປະລະເລີຍໜ້າທີ່
ກ່ຽວກັບໂຄງການຈຳນຳເຂົ້າຂອງໄທ ທີ່ພວກວິພາກວິຈານກ່າວວ່າ ເປັນການສິ້ນເປືອງແລະເປັນການສໍ້ລາດບັງຫຼວງ.
ນາຍົກລັດຖະມົນຕີໄທ ໄດ້ຜ່ານຜ່າການປະທ້ວງ ທີ່ມີຈຸດປະສົງຈະໂຄ່ນລົ້ມລັດຖະບານຂອງທ່ານນາງ
ເປັນເວລາຫຼາຍໆເດືອນຜ່ານມາແລ້ວ ແຕ່ວ່າຄະດີຄວາມໃນສານລັດຖະທຳມະນູນຄັ້ງນີ້
ແມ່ນເປັນການທ້າທາຍໃໝ່ ຕໍ່ການປົກຄອງປະເທດຂອງທ່ານນາງ.