ຂປລ. ກະຊວງວິທະຍາສາດ ແລະ ເຕັກໂນໂລຊີ (ກວຕ) ຈະຈັດງານມະຫາກຳຊັບສິນທາງປັນຍາ ແລະ ສະເຫລີມສະຫລອງ ວັນຊັບສິນທາງປັນຍາໂລກ ໃນວັນທີ 26 ເມສາ ເຖິງ ວັນທີ 1 ພຶດສະພາ 2016 ທີ່ຈະມາເຖິງນີ້ ໂດຍມີຄຳຂວັນວ່າ “ການສົ່ງເສີມຊັບສິນທາງປັນຍາ ເພື່ອພັດທະນາເສດຖະກິດ-ສັງຄົມ ແບບຍືນຍົງ”.
ພິທີຖະແຫລງຂ່າວ ກ່ຽວກັບການຈັດງານດັ່ງກ່າວ ໄດ້ມີຂຶ້ນໃນວັນທີ 5 ເມສາ ນີ້ ໂດຍທ່ານ ສຈ.ດຣ. ບໍ່ວຽງຄຳ ວົງດາລາ ລັດຖະມົນຕີວ່າການກະຊວງວິທະຍາສາດ ແລະ ເຕັກໂນໂລຊີ ໃຫ້ຮູ້ວ່າ: ງານມະຫາກຳດັ່ງກ່າວ ຈະມີການວາງສະແດງ ຜົນງານຊັບສິນທາງປັນຍາຂອງລາວ ແລະ ສາກົນ ພ້ອມດຽວກັນ ຍັງຈະມີການຈັດກິດຈະກຳ ແລະ ໂຄສະນາເຜີຍແຜ່ ສ້າງຈິດສຳນຶກຄວາມຮູ້ ທາງດ້ານຊັບສິນທາງປັນຍາ ເພື່ອສ້າງຄວາມເຂົ້າໃຈ ແລະ ສາມາດເຂົ້າເຖິງ ຂໍ້ມູນຂ່າວສານ ແລະ ເຫັນໄດ້ຄວາມສຳຄັນ ຂອງວຽກງານຊັບສິນທາງປັນຍາ ຕໍ່ການພັດທະນາເສດຖະກິດ–ສັງຄົມ ແລະ ວັດທະນະທຳ. ນອກນັ້ນ ເຈົ້າຂອງຜົນງານ, ຜູ້ປະກອບການ ແລະ ຜູ້ສົນໃຈທັງພາຍໃນ ແລະ ຕ່າງປະເທດ ຈະໄດ້ມີໂອກາດພົບປະ, ແລກປ່ຽນບົດຮຽນ, ວາງສະແດງຜົນງານ, ຜະລິດຕະພັນທາງດ້ານຊັບສິນທາງປັນຍາ ແລະ ພູມປັນຍາທ້ອງຖິ່ນຂອງຕົນ ໃຫ້ມວນຊົນທັງພາຍໃນ ແລະ ຕ່າງປະເທດ ໄດ້ເບິ່ງ, ໄດ້ຊົມ. ພາຍໃນງານ ຈະໄດ້ເຊື້ອເຊີນທັງພາກລັດ ແລະ ເອກກະຊົນລາວ, ສະຖານທູດ, ອົງການຈັດຕັ້ງສາກົນ, ປະເທດສະມາຊິກອາຊຽນ ແລະ ປະເທດອື່ນໆ ເຂົ້າຮ່ວມວາງສະແດງ ອີກດ້ວຍ.
ໃນໂອກາດການຈັດງານ ມະຫາກຳຊັບສິນທາງປັນຍາ ກໍຈະຈັດໃຫ້ມີການສະເຫລີມສະຫລອງ ວັນຊັບສິນທາງປັນຍາໂລກ ວັນທີ 26 ເມສາ ຄົບຮອບ 16 ປີ. ໃນປີນີ້ ອົງການຊັບສິນທາງປັນຍາໂລກ ໄດ້ວາງຄຳຂວັນ ໃຫ້ແກ່ການສະເຫລີມສະຫລອງ ໃນທົ່ວໂລກວ່າ “ການປະດິດສ້າງລະບົບດິຈິຕອນ ແມ່ນວັດທະນະທຳ ແຫ່ງຈິນຕະນາການໃໝ່” ເຊິ່ງເປັນການໃຫ້ຄວາມສຳຄັນ ແລະ ຊຸກຍູ້ສົ່ງເສີມການປະດິດສ້າງ ແລະ ນຳໃຊ້ລະບົບດິຈິຕອນ ໃນເຕັກໂນໂລຊີ ຂໍ້ມູນຂ່າວສານ ແລະ ການພັດທະນາເສດຖະກິດ–ສັງຄົມ ໃນຍຸກໃໝ່, ໃນການສະເຫລີມສະຫລອງໃນປີນີ້ ຢູ່ ສປປ ລາວ ຈະມີການຈັດພິທີໂຮມຊຸມນຸມ, ຈັດສຳມະນາ ເຜີຍແຜ່ວຽກງານຊັບສິນທາງປັນຍາ ເພື່ອສ້າງຈິດສຳນຶກໃຫ້ມວນຊົນ ທັງສູນກາງ ແລະ ທ້ອງຖິ່ນໄດ້ຮັບຮູ້. ໃນລະຫວ່າງວັນທີ 26-30 ເມສາ 2016 ກົມຊັບສິນທາງປັນຍາ ຈະໄດ້ໃຫ້ຄຳປຶກສາ ແລະ ຈະໄດ້ມີການສຳມະນາກ່ຽວກັບວຽກງານຊັບສິນທາງ ປັນຍາ ແລະ ຈະໄດ້ແນະນຳ ກ່ຽວກັບການຈົດທະບຽນ ຊັບສິນອຸດສາຫະກຳ ແລະ ການແຈ້ງຂໍ້ມູນລິຂະສິດ, ສິດກ່ຽວຂ້ອງກັບລິຂະສິດ ແລະ ຈັດພິທີທຳລາຍສິນຄ້າປອມ ຫລື ສິນຄ້າລອກລຽນແບບ. ນອກນັ້ນ, ກົມຊັບສິນທາງປັນຍາ ຍັງຈະໄດ້ບໍລິການຮັບໃບຄຳຮ້ອງຂໍຈົດທະບຽນ ຊັບສິນອຸດ ສາຫະກຳ ແລະ ຄຳຮ້ອງຂໍແຈ້ງຂໍ້ມູນລິຂະສິດ. ໃນທຸກຄືນຕະຫລອດການຈັດງານ ກໍຈະມີການສະແດງສິລະປະພື້ນ ເມືອງ ແລະ ສາກົນ ເຊິ່ງຈະມີການຮ່ວມສະແດງຂອງນັກສິລະປິນ ຈາກພາຍໃນ ແລະ ຕ່າງປະເທດ.
ແຫລ່ງຂ່າວ:
