Homeຂ່າວການພັດທະນາກົມວິຈິດສິນຊີ້ ການ​ປະຕິສັງຂອນພະທາດຫຼວງ​ ຈະ​​ຮັກສາ​ໄວ້​ເອກະລັກ​​ເດີມ ສີລະປະລ້ານຊ້າງ!

ກົມວິຈິດສິນຊີ້ ການ​ປະຕິສັງຂອນພະທາດຫຼວງ​ ຈະ​​ຮັກສາ​ໄວ້​ເອກະລັກ​​ເດີມ ສີລະປະລ້ານຊ້າງ!

Published on

ທ່ານ ບຸນ​ສະໜອງ ສີ​ຫາ​ລາດ  ຫົວໜ້າ​ກົມ​ວິຈິດ​ສິນ, ກະຊວງຖະ​ແຫຼງຂ່າວ ວັດທະນະທຳ ​ແລະ​ ທ່ອງ​ທ່ຽວ, ​ທັງ​ເປັນ​ຫົວໜ້າ​ຝ່າຍ​ເຕັກນິກ​ ການ​ປະຕິສັງຂອນ​ພະທາດ​ຫຼວງ,​ ໃຫ້​ສຳພາດ​ຕໍ່​ນັກ​ຂ່າວ​ພວກ​ເຮົາ​ໃນ​ວັນ​ທີ 5 ​ເມສາ​ນີ້​ວ່າ: ​ດັ່ງ​ທີ່​ພວກ​ເຮົາຮູ້​ນຳ​ກັນ ພະທາດ​ຫຼວງ​ໄດ້​ຮັບ​ການ​ສ້າງ​ຕັ້ງ​ມາ​ ເປັນ​​ເວລາ​ຫຼາຍ​ຮ້ອຍ​ປີ​ແລ້ວ, ອັນເປັນ​ສູນ​ລວມທາງ​ດ້ານ​ວັດທະນະທຳ ​ແລະ ປະຫວັດສາດ​ຂອງ​ຊາດ​ລາວ​ເຮົາ, ທີ່​ບົ່ງ​ບອກ​ເຖິງ​ສີ​ລະ​ປະ, ລວດລາຍ​ຕ່າງໆ​ທາງ​ດ້ານ​ສະຖາ​ປັດຕະຍະ​ກຳ​ລາວ​ລ້ານ​ຊ້າງ​ ອັນເປັນ​ເອກະລັກ​ຂອງ​ຊາດ​, ທັງ​ເປັນສູນລວມທາງດ້ານຈິດໃຈ ແລະ ເປັນ​ບ່ອນ​ສັກກາລະ​ບູຊາ​ ຂອງ​ປວງ​ຊົນ​ລາວ​ທັງ​ຊາດ​ແຕ່​ໃດໆ​ມາ ​ແລ​ະ ​ມັນໄດ້ ສ່ອງແສງ​ເຖິງຄວາມເປັນຊາດລາວ ຈົນມາເຖິງປັດຈຸບັນນີ້ ແລະ ເຖິງ​ວ່າ​ໄລຍະ​ຜ່ານ​ມາ ທາດຫຼວງ​ຈະ​ໄດ້​ຮັບ​ການ​ປະຕິສັງ​ຂອນ​ແລ້ວ​ຫຼາຍ​ຄັ້ງ​ ​ແລະ ມີຄວາມສວຍ​ງາມ​ຈົນ​ເຖິງ​ທຸກ​ວັນ​ນີ້, ແຕ່​ກໍ​ເປັນ​ເວລາ​ຫຼາຍ​ປີ​ມາ​ແລ້ວ, ​ແຕ່ວັດ​ສະດຸ​ທີ່​ໃຊ້ໃນ​ການ​ປະຕິສັງຂອນ​ໃນ​​ໄລຍະ​ກ່ອນ​ ຍັງ​ອີງ​ໃສ່​ທຳ​ມະ​ຊາດ​ເປັນ​ຕົ້ນຕໍ ຈຶ່ງ​ເຮັ​ດ​ໃຫ້​ບໍ່​ມີຄວາ​ມທົນ​ທານ ເຮັດ​ໃຫ້​ພະ​ທາດຫຼວງ​​ມີ​ສະພາບ​ສຳ​ຫຼຸດ, ຊຸມ​ໂຊມ​ຫຼາຍ​ພໍ​ສົມຄວນ​ໃນ​ປັດຈຸບັນ, ​ແຕ່ຍ້ອນເຫັນໄດ້ຄວາມສຳຄັນຂອງພະທາດຫຼວງ ແລະ ທັງເປັນການກະກຽມໃຫ້ແກ່ ການສະເຫຼີມສະຫຼອງ ພະທາດຫລວງວຽງຈັນຄົບຮອບ 450 ປີ, ພັກ ແລະ ລັດຖະບານ ຈຶ່ງໄດ້ມີທິດທີ່ຈະປະຕິຂັງຂອນພະທາດຫຼວງຄືນໃໝ່​ ໃຫ້​ມີ​ຄວາມ​ສວຍ​ງາມ ​ແລະ ຄົງ​ທົນ​ກວ່າ​ເກົ່າ ​​ແລະ ທັງຮັບປະກັນ ການປົກປັກຮັກສາ​​ໄວ້​ຊຶ່ງລວດລາຍ, ດອກດວງ ແລະ ເອກະລັກຄົງເດີມ, ທີ່​ບົ່ງ​ບອກ​​ເຖິງ​ສີ​ລະ​ປະ, ວັດທະນະ​ທຳ ທີ່​ເປັນ​ມູນ​ເຊື້ອ​ຂອງລາວ​ເຮົາ​ ມາ​ແຕ່​ບູຮານນະ​ການ ແລະ ມາຮອດດຽວນີ້ ການກະກຽມ​ໃຫ້​ແກ່​ການ​ປະຕິສັງຂອນ ແມ່ນພວມຢູ່ໃນຂັ້ນຕອນປຶກສາ​ຫາລື​ກັບ​ຫລາຍ​ພາກສ່ວນ, ລວມ​ເຖິງ​ການ​ຮັບ​ຟັງ​ຄວາມ​ຄິດ​ເຫັນ​ຈາກ​ປະຊາຊົນ,​ ເພື່ອ​ຈະແຕ່ງຕັ້ງອະນຸກຳມະການຮັບຜິດຊອບ, ເພື່ອສຳຫຼວດຄືນຢ່າງລະອຽດ ບ່ອນທີ່ຊຸດໂຊມ, ກ່ອນທີ່ຈະເລີ່ມການປະຕິສັງຂອນ ​​ແລະ ກໍ​ເປັນ​ໜ້າ​ຍິນ​ດີທີ່ປັດຈຸບັນ ໄດ້​ມີຫຼາຍພາກສ່ວນ, ບໍລິສັດ, ຫ້າງ​ຮ້ານ, ລວມ​ເຖິງ​ບຸກຄົນ ​ໄດ້ມີການປະກອບສ່ວນດ້ານ​ປັດໃຈວັດຖຸ,​ ເງິນ​ຄຳເຂົ້າໃນການປະຕິສັງຂອນຄັ້ງນີ້ແລ້ວ ຈຳນວນ​ໜຶ່ງ, ​ເຖິງ​ຢ່າງ​​ໃດ​ກໍ​ຕາມ​ສຳລັບການປະຕິສັງຂອນຄັ້ງນີ້ ກໍຍາກໃຫ້ເປັນດັ່ງທຸກໆຄັ້ງທີ່ຜ່ານມາ ໂດຍປວງຊົນລາວທັງຊາດໄດ້ມີສ່ວນຮ່ວມ, ດັ່ງ​ສະ​ໄໝ​​​ເຈົ້າ ​ໄຊເສດ​ຖາທິລາດ ເຄີຍ​ນຳພາ​ປະຊາຊົນ​ ບູລະນະ​ມາ​ແລ້ວ​ນັ້ນ, ດັ່ງນັ້ນ ຈຶ່ງຂໍເຊີນຊວນປະຊາຊົນລາວບັນດາເຜົ່າ ໃນຂອບເຂດທົ່ວປະເທດ, ຄົນລາວທີ່ຢູ່ຕ່າງປະເທດ, ລວມທັງຄົນເຊື້ອຊາດລາວທີ່ຢູ່ຕ່າງປະເທດ ຈົ່ງໄດ້ປະກອບສ່ວນວັດຖຸປັດໃຈ ເຂົ້າໃນການປະຕິສັງຂອນ ພະທາດຫຼວງຄັ້ງນີ້ ໃຫ້ສໍາເລັດຢ່າງ​ຈົບງາມ, ເພື່ອໃຫ້ພະພາດຫຼວງມີ​ຄວາມ​ສວຍ​ງາມ ​ແລະ ຄົງຢູ່ຄູ່ບ້ານ, ຄູ່ເມືອງເຮົາຕະຫຼອດໄປ, ຫົວໜ້າກົມດັ່ງກ່າວ ໃຫ້ຮູ້ຕື່ມວ່າ: ການປະຕິສັງຂອນຄັ້ງນີ້, ຈະ​ຖື​ເອົາ​ການຮັບປະກັນ ຄວາມໂປງໃສ່​ເປັນ​ຫຼັກ, ​ໂດຍທາງຄະນະຮັບຜິດຊອບ ​ໄດ້​ມີ​ການ​ແຕ່ງ​ຕັ້ງ​ໜ່ວຍ​ງານ​ຮັບຜິດຊອບ​ໃນ​ການກວດກາ ຢ່າງລະອຽດທຸກຂັ້ນຕອນ ແລະ ທຸກການປະກອບສ່ວນຂອງສັງຄົມ, ເພື່ອຄວາມບໍລິສຸດຍຸຕິທຳ ສົມ​ກັບ​ຄຳ​ເວົ້າ​ທີ່​ວ່າ​ປວງ​ຊົນ​ລາວ​ທັງ​ຊາດ​ເປັນ ຜູ້​ສ້າງ​ພະທາດ​ຫຼວງ​ຂຶ້ນ​ມາ.

 

ແຫລ່ງຂ່າວ:

ລພນ

ບົດຄວາມຫຼ້າສຸດ

ເຝົ້າລະວັງ-ຮັບມື ພະຍາດອີໂບລາ ຫົວໜ້າກົມຄວບຄຸມພະຍາດຕິດຕໍ່ ລາຍງານສະພາບການລະບາດຂອງພະຍາດອີໂບລາທີ່ເກີດຂຶ້ນໃນທະວີບອາຟຣິກາ (ລາວແມ່ນມີຄວາມສ່ຽງຕໍ່າ)

ໃນວັນທີ 03 ມິຖຸນາ 2026 ທີ່ຜ່ານມາ ທ່ານ ປອ. ດຣ ພອນປະດິດ ສັງໄຊຍະລາດ ຫົວໜ້າກົມຄວບຄຸມພະຍາດຕິດຕໍ່ ລາຍງານກ່ຽວກັບສະພາບການລະບາດຂອງພະຍາດອີໂບລາທີ່ເກີດຂຶ້ນໃນບັນດາປະເທດຢູ່ທະວີບອາຟຣິກາ. ພະຍາດອີໂບລາເປັນພະຍາດທີ່ຕິດຕໍ່ຈາກສັດສູ່ຄົນ ແລະ ເປັນພະຍາດທີ່ຕິດຕໍ່ຈາກຄົນສູ່ຄົນໄດ້...

ມ້າງແກ້ງສະແກມເມີຈີນ ເຈົ້າໜ້າເມືອງໄຊທານີ ເຂົ້າມ້າງແກ້ງສະແກມເມີ ກັກຕົວຜູ້ກະທຳຜິດ 24 ຄົນ ບ້ານຂຸດສາມບາດ ເມືອງໄຊທານີ ນະຄອນຫຼວງວຽງຈັນ

ໂດຍປະຕິບັດຕາມທິດຊີ້ນໍາຂອງທ່ານລັດຖະມົນຕີ ກະຊວງປ້ອງກັນຄວາມສະຫງົບຢ່າງເຂັ້ມງວດ ແລະ ເດັດຂາດ ໃນການສຸມໃສ່ສະກັດກັ້ນ, ຕ້ານ ແລະ ແກ້ໄຂບັນຫາອາຊະຍາກຳທາງໂທລະຄົມ ຫຼື ອາຊະຍາກຳທາງລະບົບຄອມພິວເຕີ ກໍຄື ການປາບປາມພວກສໍ້ໂກງຊັບທາງໂທລະຄົມ ຫຼື ແກ້ງສະແກມເມີ. ຄຽງຄູ່ກັນນັ້ນ,...

ປະທານປະເທດ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ເດີນທາງເຖິງສະໜາມບິນສາກົນຊ່ຽວຊານ ນະຄອນຫາງໂຈ  ແຂວງເຈີ້ຈ່ຽງ  ສປ ຈີນ

ໃນວັນທີ 02 ມິຖຸນາ 2026, ສະຫາຍ ທອງລຸນ ສີສຸລິດ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ ພ້ອມດ້ວຍພັນລະຍາ ແລະ...