ສຳນັກຂ່າວຕ່າງປະເທດ ລາຍງານໃນວັນທີ 5 ເມສານີ້ວ່າ ເຈົ້າໜ້າທີ່ສຳນັກງານຄຸ້ມຄອງ ຊັບພະຍາກອນທາງທະເລ ແລະ ຊາຍຝັ່ງຂອງໄທ ໄດ້ກວດພົບພື້ນທີ່ແນວປະກາລັງ ຢູ່ເກາະໄຂ່ນອກ ແລະ ເກາະໄຂ່ໃນ ເມືອງເກາະຍາວ ແຂວງພັງງາ ຊຶ່ງເປັນສະຖານທີ່ທ່ອງທ່ຽວຍອດນິຍົມແຫ່ງໜຶ່ງ ຢູ່ຟາກທະເລອັນດາມັນທາງພາກໃຕ້ຂອງປະເທດ ຖືກເສຍຫາຍແລ້ວ ຫລາຍກວ່າ 80% ຍ້ອນມີເຮືອໂດຍສານນັກທ່ອງທ່ຽວ ເດີນທາງເຂົ້າມາທຽບຈອດ ໃນຂອບເຂດບໍລິເວນດັ່ງກ່າວ ໃນແຕ່ລະມື້ແມ່ນບໍ່ຫລຸດ 60-70 ລຳ ຊຶ່ງສົ່ງຜົນກະທົບຕໍ່ສະພາບແວດລ້ອມ ຢ່າງໜັກໜ່ວງ.

ແນວໃດກໍຕາມ ທ່ານ ວັດຊະຣິນ ຖິ່ນຖາງ ເຈົ້າໜ້າທີ່ສຳນັກງານຄຸ້ມຄອງ ຊັບພະຍາກອນທາງທະເລ ແລະ ຊາຍຝັ່ງທີ 6 ພູເກັດ ໄດ້ກ່າວວ່າ ຈະມີການຊີ້ແຈງແກ່ຜູ້ປະກອບການເຮືອໂດຍສານ ເພື່ອຈັດສັນໃຫ້ເຂົ້າສູ່ລະບຽບການ ໂດຍຫາກຍັງພົບເຫັນອີກ ຈະຕ້ອງໄດ້ດຳເນີນການຕາມຂັ້ນຕອນ ເພື່ອແນໃສ່ກູ້ຄືນສະພາບແວດລ້ອມ ໃຫ້ກັບຄືນສູ່ພາວະປົກກະຕິໂດຍໄວ.