ໃນວັນທີ 4 ເມສານີ້, ກົມຕຳຫລວດຈະລາຈອນກະຊວງປ້ອງກັນຄວາມສະຫງົບຮ່ວມກັບບໍລິສັດລາວໂທລະຄົມໄດ້ຈັດງານຖະແຫລງຂ່າວແຜນການປະຕິບັດວຽກງານສະກັດກັ້ນການລ່ວງລະເບີດກົດລະບຽບທີ່ພາໃຫ້ເກີດອຸປະຕິເຫດຈະລາຈອນທາງບົກໃນໄລຍະປີໃໝ່ລາວ,ພ້ອມສ້າງຂະບວນການຮັບຕ້ອນວັນສ້າງຕັ້ງກຳລັງປ້ອງກັນຄວາມສະຫງົບຄົບຮອບ 55 ປີ,ໂດຍທ່ານ ຄຳຖະຫວາຍ ເພັດອຸໄລ ຫົວໜ້າກົມຕຳຫລວດຈະລາຈອນກະຊວງປ້ອງກັນຄວາມສະຫງົບ ແລະ ທ່ານ ສົມປະສົງ ສອນເພັດ ຫົວໜ້າພະແນກການຕະຫລາດບໍລິສັດລາວໂທລະຄົມເປັນຜູ້ຖະແຫລງ.
ທ່ານ ຄຳຖະຫວາຍ ເພັດອຸໄລ ແຈ້ງວ່າ: ເນື່ອງຈາກວ່າຈຳນວນພາຫະນະ ແລະ ຜູ້ຂັບຂີ່ໄດ້ເພີ່ມຂຶ້ນຢ່າງຫລວງຫລາຍໃນແຕ່ລະປີ,ເຊິ່ງເຮັດໃຫ້ການຈະລາຈອນແອອັດຢູ່ໃນຕົວເມືອງໃຫຍ່ ແລະ ກໍໃຫ້ເກີດອຸປະຕິເຫດຫລາຍຂຶ້ນ,ຢູ່ໃນແຕ່ລະແຂວງໃນທົ່ວປະເທດສົ່ງຜົນເສຍຫາຍຕໍ່ຊັບສິນ,ສຸຂະພາບ ແລະ ຊີວິດຂອງປະຊາຊົນເປັນຈຳນວນບໍ່ໜ້ອຍໃນແຕ່ລະປີ, ຍ້ອນຜູ້ໃຊ້ລົດໃຊ້ຖະໜົນລະເມີດກົດຈະລາຈອນ, ສະນັ້ນ ພວກເຮົາຈຶ່ງໄດ້ຮ່ວມມືກັນ ແລະຮຽກຮ້ອງໃຫ້ເຈົ້າໜ້າທີ່ 5 ຕົວເມືອງໃນນະຄອນຫລວງວຽງຈັນຄື:ເມືອງສີສັດຕະນາກ, ໄຊທານີ, ຈັນທະບູລີ, ສີໂຄດຕະບອງ ແລະ ເມືອງໄຊເສດຖາ, ຊຶ່ງພະແນກຈະລາຈອນນະຄອນຫລວງຈະໄດ້ມອບຄວາມຮັບພິຊອບຕາມພາລະບົດບາດຂອງໃຜມັນໃຫ້ເອົາໃຈໃສ່ຄວບຄຸມລະບຽບການຈະລາຈອນຢ່າງເຂັ້ມງວດ,ຄາດວ່າຈະໃຊ້ກຳລັງເຈົ້າໜ້າທີ່ຕຳຫລວດຢ່າງໜ້ອຍ 600 ນາຍເຂົ້າໃນວຽກງານດັ່ງກ່າວໃນຊ່ວງໄລຍະສົງການປີໃໝ່ລາວນີ້ໃຫ້ຮັບປະກັນຄວາມເປັນລະບຽບຮຽບຮ້ອຍ ແລະ ຄວາມສະຫງົບປອດໄພ.
ຂ່າວຈາກ: 