ມູນນິທິສົ່ງເສີມການສຶກສາ ສປປ.ລາວ ຮ່ວມກັບ ໂຮງຮຽນມັດທະຍົມສົມບູນ (ມສ) ວຽງຈັນ ໄດ້ສໍາເລັດການຈັດກິດຈະກໍາເຝິກອົບຮົມ ວາທະສິລະປະຂັ້ນພື້ນຖານ ປະຈໍາສົກຮຽນ 2015-2016 ເປັນປີທີ 3 ໃຫ້ແກ່ນັກຮຽນພາຍໃນໂຮງຮຽນ ມສ.ວຽງຈັນ ແລະ ໂຮງຮຽນ ມສ.ມິດຕະພາບລາວ-ຫວຽດນາມ ເປັນເວລາ 6 ເດືອນ ເຊິ່ງເລີ່ມປະຕິບັດການຮຽນ-ການສອນ ໃນທຸກໆເຊົ້າວັນເສົາ ມາແຕ່ເດືອນຕຸລາ 2015 – ເດືອນມີນາ 2016 ໂດຍມີຜູ້ເຂົ້າເຝິກອົບຮົມທັງໝົດຫຼາຍກວ່າ 50 ຄົນ.
ພິທີມອບ-ຮັບໃບຢັ້ງຢືນ ໃຫ້ແກ່ນັກຮຽນທີ່ສໍາເລັດການເຝິກອົບຮົມ ວາທະສິລະປະຂັ້ນພື້ນຖານ ປະຈໍາສົກຮຽນ 2015-2016 ໄດ້ຈັດຂຶ້ນໃນຕອນເຊົ້າວັນທີ 02 ເມສາ 2016 ທີ່ສະໂມສອນໂຮງຮຽນ ມສ.ວຽງຈັນ ນະຄອນຫຼວງວຽງຈັນ ເຊິ່ງໃຫ້ກຽດເຂົ້າຮ່ວມ ແລະ ມອບໃບຢັ້ງຢືນໃນຄັ້ງນີ້ໂດຍທ່ານ ພູທອນ ແສງດາວົງ ຮອງຫົວໜ້າພະແນກສຶກສາທິການ ແລະ ກີລານະຄອນຫຼວງວຽງຈັນ ມີຄະນະອໍານວຍການ ຄະນະບໍລິຫານງານມູນນິທິສົ່ງເສີມການສຶກສາ ສປປ.ລາວ ບັນດາຄູ-ອາຈານ ນັກຮຽນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ຂະນະທີ່ຜູ້ອໍານວຍການໂຮງຮຽນ ມສ.ວຽງຈັນ ກໍໄດ້ກ່າວວ່າ ຍ້ອນມູນນິທິສົ່ງເສີມການສຶກສາໃຫ້ການສະໜັບສະໜູນມາແຕ່ສົກຮຽນ 2013-2014 ແລະ ສົກຮຽນ 2015-2016 ກໍເປັນປີ 3 ແລ້ວ ຈິ່ງເຮັດໃຫ້ການຮຽນ-ການສອນວາທະສິລະປະໃນຄັ້ງນີ້ ປະສົບຜົນສໍາເລັດຕາມລະດັບຄາດໝາຍ ເຊິ່ງກໍເຫັນໄດ້ວ່າ ນັກຮຽນທີ່ຜ່ານການເຝິກອົບຮົມມີຄວາມກ້າສະແດງອອກເຊິ່ງຄວາມສາມາດ ຈາກຄົນບໍ່ກ້າເວົ້າກໍສາມາດເວົ້າໄດ້ເກັ່ງ ມີຄວາມຮູ້ ຄວາມເຂົ້າໃຈແຈ້ງກ່ຽວກັບຈຸດປະສົງເປົ້າໝາຍ ເນື້ອຫາ ແລະ ສາລະຂອງເລື່ອງທີ່ຈະເວົ້າເຖິງ ຮູ້ຈັກວາງກິລິຍາທ່າທີຖືກຕາມງານພິທີການເຫຼົ່ານັ້ນ ໂດຍສະເພາະການເປັນພິທີກອນ ການປາຖະກະຖາ ການກ່າວໄຂງານພິທີການ ແລະ ອື່ນໆ ເຊິ່ງນັກຮຽນຫຼາຍຄົນມີສົນໃຈ ແລະ ກະຕືລືລົ້ນ ເອົາໃຈໃສ່ຮຽນເປັນປົກກະຕິ ການເຂົ້າ-ອອກຫ້ອງຮຽນຖືກໂມງ ສ່ວນເວລາຮຽນນັກຮຽນກໍມີສ່ວນຮ່ວມໃນການເຮັດກິດຈະກໍາຕ່າງໆຈິ່ງໄດ້ມາເຊິ່ງຜົນສໍາເລັດຢ່າງດີ.
ຂ່າວ/ພາບ: ເທບພະວົງ
ຂ່າວຈາກ: ວິທະຍຸ-ໂທລະພາບນະຄອນຫຼວງ