ຄຣິສເຕຍໂນ ໂຣນັລໂດ ປີກຕົວເກັ່ງຂອງ ຣີລ ມາດຣິດ ກາຍເປັນເຈົ້າຂອງສະຖິຕິໃໝ່ຂອງການຍິງປະຕູໄດ້ຫຼາຍທີ່ສຸດ 1 ລະດູການ ຫຼັງຍິງປະຕູທັງໝົດ 15 ລູກ ໃນການແຂ່ງຂັນບານເຕະ ຢູຟາ ແຊັມປ້ຽນລີກ ຫຼ້າສຸດສາມາດຍິງປະຕູໄດ້ໃນຮອບຕັດເຊຶອກທີ່ ຣີລ ມາດຣິດ ບຸກໄປຖະຫຼົ່ມ ບາເຢິນ 4-0 ເມື່ອວັນທີ 29 ເມສາທີ່ຜ່ານມາ ທຳລາຍສະຖິຕິເດີມທີ 14 ປະຕູຂອງ ລິໂອເນລ ເມສຊີ ໄປໄດ້ ແຖມຍັງເພີ່ມອີກ 1 ປະຕູໃນໄລຍະທ້າຍເກມຈົນເຮັດໃຫ້ເພີ່ມເປັນ 16 ປະຕູແລ້ວ.
ຄຣິສເຕຍ ໂນໂຣນັລໂດ ປີກຈອມຖະຫຼົ່ມປະຕູຂອງ ຣີລ ມາດຣິດ ສະໂມສອນແຫ່ງ ລາລີກາ ແອັດສະປາຍ ທຳລາຍສະຖິຕິການຍິງປະຕູຕໍ່ 1 ລະດູການໃນການແຂ່ງຂັນບານເຕະ ຢູຟາ ແຊັມປ້ຽນລີກ ທີ່ເປັນຂອງ ລິໂອເນລ ເມສຊີ ກອງໜ້າຂອງ ບາເຊໂລນາ ໄດ້ສຳເລັດ ຫຼັງຍິງເພີ່ມອີກ 2 ປະຕູ ໃນການແຂ່ງຂັນຮອບຮອງຊະນະເລີດນັດທີ 2 ທີ່ ຣີລ ມາດຣິດ ບຸກໄປຖະຫຼົ່ມ ແຊັມເກົ່າຢ່າງ ບາເຢິນ ມິວນິກ 4-0 ເຖິງສະໜາມ ອັລລິອັນ ອາຣີນາ ຜ່ານເຂົ້າຮອບຊີງຊະນະເລີດລວມ 2 ນັດເປັນ 5-0 ເມື່ອວັນທີ 29 ເມສາທີ່ຜ່ານມາ.
ກ່ອນໜ້ານີ້, ເມສຊີ ເປັນຜູ້ຄອງສະຖິຕິດັ່ງກ່າວ ດ້ວຍການຍິງປະຕູໄດ້ເຖິງ 14 ລູກຈາກການລົງສະໜາມ 11 ນັດໃນລະດູການ 2011-2012 ແຕ່ຫຼ້າສຸດ ໂຣນັລໂດ ທຳລາຍສະຖິຕິດັ່ງກ່າວໄດ້ແລ້ວ ດ້ວຍການຍິງ 1 ປະຕູນາທີ 34 ຊ່ວຍໃຫ້ຕົ້ນສັງກັດນຳຫ່າງເປັນ 3-0 ໃນການແຂ່ງຂັນນັດຫຼ້າສຸດ ຈົນເຮັດໃຫ້ຍອດລວມຂອງການຍິງປະຕູໃນ ຢູຟາ ແຊັມປ້ຽນລີກ ປະຈຳລະດູການນີ້ຂອງລາວເພີ່ມເປັນ 15 ປະຕູ.
ຍິ່ງໄປກວ່ານັ້ນ, ຫົວໜ້າທີມຊາດປ໊ອກຕຸຍການ ຍັງເພີ່ມສະຖິຕິລວມເປັນ 16 ປະຕູໄດ້ອີກ ຈາກການຍິງຈາກລູກຕັ້ງແຕະນອກເຂດໂທດເຂົ້າໄປໃນໄລຍະທ້າຍເກມຈົນເປັນລູກປິດທ້າຍໃຫ້ ຣີລ ມາດຣິດ. ນອກນັ້ນ, ອະດີດນັກເຕະຂອງ ແມນເຊັສເຕີ ຢູໄນເຕັດ ຍັງສາມາດທຳລາຍສະຖິຕິຂອງ ເມສຊີ ໄດ້ຈາກການລົງແຂ່ງຂັນໜ້ອຍກວ່າ 1 ນັດອີກດ້ວຍ.