ຄວາມຄອງຄອຍຂອງຜູ້ສັນຈອນໄປມາ ແລະ ຜູ້ທີ່ອາໃສຢູ່ບໍລິເວນໃກ້ເສັ້ນທາງນັບແຕ່ໄຟແດງບ້ານຕານມີໄຊຫາໄຟແດງບ້ານໜອງບຶກຈະມີຂ່າວດີໃນໄວໆນີ້, ພາຍຫລັງລັດຖະບານໄດ້ລິງເຫັນບໍລິສັດທີ່ມີຄວາມສາມາດມາກໍ່ສ້າງເສັ້ນທາງສາຍນີ້ໃຫ້ມີການລົງທຶນກ່ອນ.
ທ່ານຫົວໜ້າພະແນກໂຍທາທິການ ແລະ ຂົນສົ່ງນະຄອນຫລວງວຽງຈັນເດດສົງຄາມ ທໍາມະວົງ ໃຫ້ຮູ້ເມື່ອບໍ່ດົນມານີ້ວ່າ: ຜ່ານການຄົ້ນຄວ້າຂອງລັດຖະບານກໍຄືພາກສ່ວນກ່ຽວຂ້ອງເຫັນວ່າຜູ້ທີ່ຈະມາຮັບເໝົາລົງທຶນກໍ່ສ້າງເສັ້ນທາງດັ່ງກ່າວແມ່ນບໍລິສັດລາວເວີນກລຸບ, ເພາະເປັນບໍລິສັດທີ່ມີປະສົບການ, ມີທ່າແຮງດ້ານກົນຈັກ-ພາຫະນະ ແລະ ມີຄວາມເຂັ້ມແຂງດ້ານທຶນຮອນທີ່ຈະມາກໍ່ສ້າງ ແລະ ປັດຈຸບັນແມ່ນຍັງຢູ່ໃນຂັ້ນຕອນການ
ປະເມີນຫົວໜ່ວຍລາຄາ ແລະ ມູນຄ່າຂອງການກໍ່ສ້າງຈາກກະຊວງແຜນການ ແລະ ການລົງທຶນ ແລະ ກະຊວງການເງິນ, ເຊິ່ງເສັ້ນທາງດັ່ງກ່າວມີໄລຍະທາງຍາວເກືອບ 10 ກິໂລແມັດນັ້ນໃຫ້ມີມາດຕະຖານ-ເຕັກນິກຄືກັນກັບເສັ້ນທາງແຕ່ໄຟແດງບ້ານຕານມີໄຊຫາໄຟແດງດົງໂດກທີ່ພວມກໍ່ສ້າງຢູ່ໃນຂະນະນີ້. ທ່ານຫົວໜ້າພະແນກດັ່ງກ່າວໃຫ້ຮູ້ຕື່ມວ່າ:ກ່ອນໜ້ານີ້ລັດຖະບານກໍໄດ້ອະນຸມັດເງິນປະມານ 23 ລ້ານໂດລາສະຫະລັດ ເພື່ອປັບປຸງເສັ້ນທາງຮ່ອມ, ທາງຊອຍໃນຕົວເມືອງຈໍານວນ 27 ເສັ້ນ, ຊຶ່ງຈະໃຫ້ສໍາເລັດກ່ອນກອງປະຊຸມສຸດຍອດອາຊຽນທີ່ ສປປ ລາວ ໄດ້ຮັບກຽດເປັນເຈົ້າພາບຈັດຂຶ້ນໃນທ້າຍປີນີ້.
ສໍາລັບເສັ້ນທາງແຕ່ໄຟແດງຕານມີໄຊຫາໄຟແດງໜອງບຶກປັດຈຸບັນແມ່ນ ມີສະພາບເປ່ເພຢ່າງໜັກໜ່ວງ, ຊຶ່ງມີທັງຂຸມໃຫຍ່ນ້ອຍຢັງຢາຍສຸດສາຍທາງ, ອັນໄດ້ສ້າງຄວາມຫຍຸ້ງຍາກລໍາບາກໃຫ້ແກ່ການສັນຈອນ ແລະ ການດໍາລົງຊີວິດຂອງຜູ້ທີ່ມີເຮືອນຊານບ້ານຊ່ອງຢູ່ບໍລິເວນແຄມເສັ້ນທາງດັ່ງກ່າວຕ້ອງໄດ້ສູດດົມເອົາຂີ້ຝຸ່ນຖ້າຝົນຕົກລົງມາກໍມີຂີ້ຕົມ. ສະນັ້ນ ການຍືນມືເຂົ້າມາຂອງບໍລິສັດລາວເວີນນັບວ່າເປັນຂ່າວດີເພື່ອຈະແກ້ໄຂສະພາບຫຍຸ້ງຍາກດັ່ງກ່າວໃຫ້ຕົກໄປ ແລະ ເປັນການປະກອບສ່ວນຊ່ວຍໃຫ້ນະໂຍບາຍ 6 ສ, ໂດຍສະເພາະ ສ ສະອາດ ຂອງນະຄອນຫລວງວຽງຈັນປະກົດຜົນເປັນຈິງເທື່ອລະກ້າວ.
ແຫລ່ງຂ່າວຈາກ: 