ຕາມ​ຂ່າວ​ຫວຽດນາມ​ລາຍ​ງານ​ຈາກ​ນະຄອນຫຼວງ​ຮ່າ​ໂນ້ຍຂອງ​ຫວຽດນາມ​ວ່າ ກອງ​ປະຊຸມ​ສະພາ​ແຫ່ງ​ຊາດ​ຂອງ​ຫວຽດນາມ​ມີ​ມະຕິ​ສຽງ​ສ່ວນ​ຫຼາຍ 95,5% ​ເລືອ​ກທ່ານ ນາງ ຫງວຽນ ຖິ ກິມ ​ເງິນ(Nguyen Thi Kim Ngan) ​ໃຫ້​ດຳລົງ​ຕຳ​ແໜ່​ງປະ​ທານ​ສະພາ ສ້າງ​ປະຫວັ​ດສາດ​ເປັນ​ແມ່ຍິງ​ຄົນ​ທຳ​ອິດ​ທີ່​ໄດ້​ຮັບ​ການ​ຄັດ​ເລືອກ​ໃຫ້​ດຳ​ລົງ​ຕຳ​ແໜ່​ງ ດັ່ງກ່າວ ຊຶ່ງ​ຖື​ວ່າ​ເປັນ​ໄປ​ຕາມ​ຄວາມ​ຄາດ​ໝາຍ ຫຼັງ​ຈາກ​ທ່ານ​ນາງ ຫງວຽນ ຖິ ກິມ​ເງິນ ອາຍຸ 61 ປີ ​​ໄດ້​ຮັບ​ການ​ເລືອກ​ຕັ້ງ​ໃຫ້​ເຂົ້າ​ສູ່​ທຳນຽບ 1 ​ໃນ 16 ສະມາ​ຊິກ​ຂອງ​ຄະນະ​ກຳມະການ​ປະຈຳ​ກົມ​ການ​ເມືອງ​ທີ່​ກອງ​ປະຊຸມ​ໃຫຍ່​ໃນ​ເດືອນ​ມັງກອນ​ທີ່​ຜ່ານ​ມາ.

ຂະນະ​ດຽວ​ກັນ​ໃນ​ກອງ​ປະຊຸມ​ມີ​ກຳນົດ​ລົງມະຕິ​ໃຫ້​ທ່ານ ​ເຈືອງ​ ເຕິ​ນ ຊາງ (Truong Tan Sang) ປະທານ​ປະ​ເທດ​ຂອງ​ຫວຽດພົ້ນ​ຈາກ​ຕຳ​ແໜ່​ງ ​ແລະ ​ແຕ່ງ​ຕັ້ງທ່ານ ພົນ​ເອກ ​ເຈິ່ນ ດາຍ ​ກວາງ(Tran Dai Quang) ລັດຖະມົນຕີ​ວ່າການ​ກະຊວງ​ຄວາມ​ໝັ້ນ​ຄົງ​ພາຍ​ໃນໃຫ້​ເຂົ້າ​ມາ​ຮັບ​ຕຳ​ແໜ່​ງ​ແທນ​ຢ່າງ​ເປັນ​ທາງ​ການ​ໃນ​ວັນ​ທີ 30 ມີນາ​ເຊັ່ນ​ກັນ ​ແລະ ການ​ລົງມະຕິ​ໃຫ້​ທ່ານ ຫງວຽນ ​ເຕິ​ນ ຢຸງ(Nguyen Tan Dung) ພົ້ນ​ຈາກ​ຕຳ​ແໜ່​ງນ່າຈະ​ມີ​ຂຶ້ນ​ໃນ​ອາທິດ​ໜ້າ ​ໂດຍ​ຜູ້​ທີ່​ໄດ້​ຮັບ​ຕຳ​ແໜ່​ງ​ແທນ​ຄື​ທ່ານ ຫງວຽນ ຊວນ​ຟຸກ(Nguyen Xuan Phuc) ຮອງ​ນາຍົກລັດຖະມົນ ຕີຄົນປະຈຸ​ບັນ ຊຶ່ງ​ຈະ​ມີການ​ແຕ່ງ​ຕັ້ງ​ຜູ້​ດຳລົງຕຳ​ແໜ່​ງສຳຄັນ​ທາງ​ການ​ເມືອງ​ທັງ​ໝົ​ດພາຍ​​ໃນ​ອາທິດ​ໜ້າ ຈະ​ຖື​ເປັນ​ການ​ສຳ​ເລັດ​ຂະ​ບວນການ​ລົງມະຕິ​ຂອງ​ກອງ​ປະຊຸມ​ໃຫຍ່ພັກ​ກອມ​ມູນິດ​ຫວຽດນາມ​ໃນ​ຮອບ​ນີ້​ຢ່າງ​ເປັນ​ທາ​ງການ.