ສະໜາມບິນບຣັສເຊລພ້ອມແລ້ວໃນທາງເຕັກນິກໃນການເປີດໃຫ້ບໍລິການອີກ ຫຼັງເກີດເຫດໂຈມຕີດ້ວຍລະເບີດຂ້າຕົວຕາຍເມື່ອອາທິດທີ່ຜ່ານມາ ແຕ່ຍັງບໍ່ມີຖ້ຽວບິນກ່ອນຄຳວັນສຸກທີ 1 ເມສາເປັນຢ່າງຊ້າ.
ສຳນັກຂ່າວຕ່າງປະເທດລາຍງານຈາກນະຄອນຫຼວງບຣັສເຊລປະເທດແບນຊິກເມື່ອວັນທີ 31 ມີນາ ວ່າອາຄານຜູ້ໂດຍສານຂາອອກຂອງສະໜາມບິນຊາເວນເທມນະຄອນຫຼວງບຣັສເຊລ ຊຶ່ງໄດ້ຮັບຄວາມເສຍຫາຍຢ່າງໜັກຈາກເຫດໂຈມຕີດ້ວຍລະເບີດຂ້າຕົວຕາຍ ເມື່ອວັນອັງຄານທີ 22 ມີນາທີ່ຜ່ານມາ ສີມືກຸ່ມກໍ່ການຮ້າຍໄອເອສຈາກນັ້ນມາໃນອາທິດນີ້ໄດ້ເລີ່ມມີການທົດສອບລະບົບກວດກາຜູ້ໂດຍສານຊົ່ວຄາວ.
ຖະແຫຼງການຂອງບໍລິສັດທ່າອາກາດສະຍານບຣັສເຊລລະບຸວ່າ ບໍລິສັດທ່າອາກາດສະຍານບຣັສເຊລໄດ້ຮັບສັນຍານໄຟຂຽວຈາກໜ່ວຍດັບເພີງແລະອົງການການບິນພົນລະເຮືອນແບນຊິກວ່າ ສາມາດກັບມາໃຫ້ບໍລິການໄດ້ແລ້ວບາງສ່ວນສຳລັບສະໜາມບິນຊາເວນເທມຊຶ່ງໃນທາງເຕັກນິກຖືວ່າພ້ອມແລ້ວ ສຳລັບເປີດໃຫ້ບໍລິການອີກ ສຳລັບຖ້ຽວບິນໂດຍສານແລະລະບົບຊົ່ວຄາວສຳລັບການກວດກາຜູ້ໂດຍສານ.
ແນວໃດກໍ່ຕາມ ບໍລິສັດທ່າອາກາດສະຍານບຣັສເຊລຍັງບໍ່ໄດ້ຕັດສິນໃຈແບບເປັນທາງການສຳລັບກຳນົດວັນເປີດໃຫ້ບໍລິການອີກ ແລະກໍ່ຍັງບໍ່ມີຖ້ຽວບິນໂດຍສານທີ່ສະໜາມບິນຊາເວນເທມຈົນກວ່າຈະເຖິງຄໍ່າວັນສຸກທີ 1 ເມສາເປັນຢ່າງຊ້າ.
ການກວດກາຜູ້ໂດຍສານຊົ່ວຄາວຈະໃຊ້ໃນສ່ວນຂອງດ້ານນອກອາຄານຜູ້ໂດຍສານຊຶ່ງສາມາດຮອງຮັບຈຳນວນຜູ້ໂດຍສານຂາອອກໄດ້ຊົ່ວໂມງລະ 800 ຄົນ ຫຼືຄິດເປັນ 20% ຂອງສັກກະຍະພາບປົກກະຕິຂອງສະໜາມບິນຂະນະທີ່ຜູ້ໂດຍສານຂາເຂົ້າກໍ່ສາມາດເຂົ້າໄປເຖິງສ່ວນຂອງພື້ນທີ່ຮັບກະເປົ໋າເຄື່ອງ ແລະອາຄານຜູ້ໂດຍສານຂາເຂົ້າໄດ້ຕາມປົກກະຕິເພາະໄດ້ຮັບຄວາມເສຍຫາຍເລັກນ້ອຍ ແລະໄດ້ຮັບການປົວແປງໃຫ້ກັບມາໃຊ້ໄດ້ອີກ.