ສຳນັກຂ່າວຕ່າງປະເທດ ລາຍງານໃນວັນທີ 31 ມີນານີ້ວ່າ ບໍລິສັດ ມີເດຍ ກຣຸບ (Midea Group) ຊຶ່ງເປັນລັດວິສາຫະກິດ ຜູ້ຜະລິດເຄື່ອງໃຊ້ໄຟຟ້າລາຍໃຫຍ່ທີ່ສຸດຂອງຈີນ ໄດ້ຕັດສິນໃຈເຂົ້າຊື້ກິດຈະການ ເຄື່ອງໃຊ້ໄຟຟ້າໃນເຄືອໂຕຊິບາ (TOSHIBA) ຂອງຍີ່ປຸ່ນ ດ້ວຍການເຂົ້າຊື້ຮຸ້ນເຖິງ 80% ພາຍໃນບໍລິສັດ TLSC ເຈົ້າຂອງເຄື່ອງໝາຍການຄ້າໂຕຊິບາ ໃນວົງເງິນ 473 ລ້ານໂດລາ ໂດຍທາງໂຕຊິບາ ຈະຍັງຖືຮຸ້ນພາຍໃນບໍລິສັດຂອງຕົນ ໃນສັດສ່ວນ 19.9% ເທົ່ານັ້ນ.
ໂຕຊິບາ ແມ່ນຊື່ກາໝາຍການຄ້າຜະລິດຕະພັນເຄື່ອງໃຊ້ໄຟຟ້າຍີ່ຫໍ້ດັງ ທີ່ມີຕັ້ງແຕ່ໝໍ້ຫຸງເຂົ້າ ໄປຈົນຮອດໂຮງງານໄຟຟ້າພະລັງງານນິວເຄລຍ ຊຶ່ງພາຍຫລັງການເຂົ້າຊື້ກິດຈະການດັ່ງກ່າວ ຈະເຮັດໃຫ້ບໍລິສັດ ມີເດຍ ກຣຸບ ຂອງຈີນ ໄດ້ຮັບອະນຸຍາດໃຫ້ຜະລິດເຄື່ອງໃຊ້ໄຟຟ້າ ພາຍໃຕ້ຍີ່ຫໍ້ ໂຕຊິບາ ເປັນເວລາ 40 ປີ ແລະ ເປັນເຈົ້າຂອງຊັບສິນທາງປັນຍາ ລວມແລ້ວຫລາຍກວ່າ 5,000 ລາຍການ ດ້ວຍການຖືຄອງສິດທິບັດທີ່ກ່ຽວຂ້ອງ.
