ຂປລ. ປະຊາຊົນ ຜູ້ໃຊ້ລົດໃຊ້ຖະໜົນ ຈົ່ງອົດທົນລໍຄອຍອີກບໍ່ດົນ ກໍຈະມີການລົງມື ກໍ່ສ້າງເສັ້ນທາງ ແຕ່ສາມແຍກ ໜອງບຶກ-ໄຟອຳນາດ ສີ່ແຍກຕານມີໄຊ ເພາະວ່າໃນປັດຈຸບັນ ກະຊວງແຜນການ ແລະ ການລົງທຶນ ກັບກະຊວງການເງິນ ພວມດຳເນີນການ ປະເມີນລາຄາ ນັບທັງຂໍ້ມູນ ທາງດ້ານມາດຕະຖານ ເຕັກນິກຕ່າງໆ ໃນການກໍ່ສ້າງ ໂດຍຄາດວ່າ ຈະແມ່ນບໍລິສັດ ລາວເວີນກຣຸບ ເປັນຜູ້ຮັບເໝົາ ແລະ ລົງທຶນກ່ອນ.
ທ່ານ ເດດໄຊສົງຄາມ ທຳມະວົງ ຫົວໜ້າພະແນກ ໂຍທາທິການ ແລະ ຂົນສົ່ງ ນະຄອນ ຫລວງວຽງຈັນ, ເປີດເຜີຍວ່າ: ເມື່ອສຳເລັດ ການປະເມີນລາຄາ ບໍລິສັດ ລາວເວີນ ກຣຸບ ກໍຈະດຳເນີນການລົງມືກໍ່ສ້າງ ເສັ້ນທາງດັ່ງກ່າວທັນທີ ເຊິ່ງມີໄລຍະທາງ ຍາວປະມານ 8 ກິໂລແມັດ ດ້ວຍມາດຕະ ຖານເຕັກນິກ ດຽວກັນກັບເສັ້ນທາງ ແຕ່ສີ່ແຍກໄຟອຳນາດ ຕານມີໄຊ-ໄຟອຳນາດດົງໂດກ ປູດ້ວຍເບຕົງເສີມເຫລັກ. ເນື່ອງຈາກເສັ້ນທາງສາຍນີ້ ເປັນສາຍສຳຄັນ ທີ່ມີພາຫະນະບັນທຸກໜັກ ທຽວໄປມາຢ່າງຫລວງຫລາຍ ຈຶ່ງຕ້ອງມີການຄຳນວນ ເຖິງຄຸນນະພາບ ແລະ ມາດຕະຖານ ດ້ານເຕັກນິກໃຫ້ມີຄວາມຮັບປະກັນ ລວມທັງມູນຄ່າການກໍ່ສ້າງ ກໍນັບວ່າສູງສົມຄວນ. ສະນັ້ນ, ທາງພາກລັດ ກໍຕ້ອງດຳເນີນ ການສຶກສາຢ່າງຮອບຄອບ ທັງຮັບປະກັນຄຸນນະພາບ ໃຫ້ສາມາດນຳໃຊ້ ໄດ້ຍາວນານ.
ທ່ານ ກ່າວຕື່ມວ່າ: ບໍ່ພຽງແຕ່ເສັ້ນທາງ ໜອງບຶກ-ຕານມີໄຊເທົ່ານັ້ນ, ລັດຖະບານ ຍັງໄດ້ມີການປັບປຸງກໍ່ສ້າງ ເສັ້ນທາງຊອຍໃຫຍ່ ທີ່ເຊື່ອມຕໍ່ໃນ ນະຄອນຫລວງວຽງຈັນ ຈຳນວນ 27 ເສັ້ນ ໃນມູນຄ່າຫລາຍກວ່າ 23 ລ້ານໂດລາສະຫະລັດ ເຊິ່ງຈະໃຫ້ສຳເລັດກ່ອນ ສປປ ລາວ ຮັບກຽດເປັນເຈົ້າພາບ ກອງປະຊຸມສຸດຍອດອາຊຽນ ໃນທ້າຍປີນີ້. ເພື່ອອຳນວຍຄວາມສະດວກ ໃນການສັນຈອນ ແກ້ໄຂລົດຕິດແອອັດ ເຮັດໃຫ້ຕົວເມືອງ ມີຄວາມເປັນລະບຽບຮຽບຮ້ອຍ ແລະ ມີເສັ້ນທາງທີ່ສວຍງາມ.
ແຫລ່ງຂ່າວ:
