ເອເອຟພີລາຍງານວ່າ ເມື່ອວັນທີ 29 ມີນາ ເຫດການຈີ້ເຮືອບິນແອບບັສ ເອ 320 ຂອງສາຍການບິນເອຢິບ ຖ້ຽວບິນພາຍໃນປະເທດ ເອັມເອສ 181 ມີຄົນເທິງເຮືອບິນທັງໝົດ 81 ຄົນ ລະທຶກຢູ່ດົນເກືອບ 6 ຊົ່ວໂມງທີ່ປະເທດໄຊປຣັສ ກ່ອນລົງເອີຍຄົນຮ້າຍຖືກຈັບກຸມ ໂດຍບໍ່ມີໃຜໄດ້ຮັບອັນຕະລາຍ.
ຖ້ຽວບິນດັ່ງກ່າວ ບິນຈາກນະຄອນຫຼວງອະເລັກຊານເດຣຍ ໄປຍັງນະຄອນຫຼວງໄຄໂຣ ປະເທດເອຢິບ ແຕ່ຖືກຄົນຮ້າຍຈີ້ໄປປະເທດໄຊປຣັສ ອ້າງວ່າມີລະເບີດຜູກມັດຢູ່ກັບຕົວ ເຮັດໃຫ້ຜູ້ຄົນຢ້ານວ່າເປັນເຫດກໍ່ການຮ້າຍ ຈົນຕໍ່ມາຄົນຮ້າຍຂໍພົບຍິງຄົນຮັກເກົ່າຊາວໄຊປຣັສ ຈິ່ງກັບກາຍເປັນເລື່ອງສ່ວນຕົວ.
ປະທານາທິບໍດີນິກອສ ອານາສຕາເຊຍເດສ ຜູ້ນຳໄຊປຣັສ ກ່າວວ່າ ເຫດຈີ້ເຮືອບິນທີ່ເກີດຂຶ້ນນັ້ນບໍ່ແມ່ນການກໍ່ການຮ້າຍ ຜູ້ໂດຍສານແລະລູກເຮືອທຸກຄົນປອດໄພ ເມື່ອຜູ້ສື່ຂ່າວຄົນໜຶ່ງຖາມເຖິງສາເຫດທີ່ຄົນຮ້າຍລົງມືກໍ່ເຫດວ່າ ມາຈາກຄວາມຮັກຫຼືບໍ່ ຜູ້ນຳໄຊປຣັສໄດ້ຫົວຂຶ້ນ ເລື່ອງແບບນີ້ກໍ່ມັກຈະມີຜູ້ຍິງມາກ່ຽວຂ້ອງສະເໝີ.
ດ້ານເຈົ້າໜ້າທີ່ກະຊວງການຕ່າງປະເທດເຜີຍເບື້ອງຕົ້ນວ່າ ຄົນຮ້າຍມີສະພາບຈິດໃຈບໍ່ໝັ້ນຄົງ.
ທັງນີ້ ລະຫວ່າງເຫດຄົນຮ້າຍບີບບັງຄັບໃຫ້ຜູ້ບັນຄັບເຮືອບິນມາລົງຈອດທີ່ທ່າອາກາດສະຍານເມືອງລານາກາ ທາງພາກໃຕ້ຂອງປະເທດໄຊປຣັສ ໂດຍຫາກບໍ່ເຮັດຕາມຈະຈູດສະນວນລະເບີດສະຫຼະຊີບ ຕໍ່ມາເຈົ້າໜ້າທີ່ພະຍາຍາມເຈລະຈາຈົນຄົນຮ້າຍຍອມປ່ອຍຜູ້ໂດຍສານທັງໝົດລົງຈາກເຮືອບິນຍົກເວັ້ນລູກເຮືອ 4 ຄົນ ແລະຜູ້ໂດຍສານ 3 ຄົນ ທ່າມກາງບັນຍາກາດທີ່ກົດດັນ.
ຕໍ່ມາເຈົ້າໜ້າທີ່ຫໍບັງຄັບການວິທະຍຸການບິນສັ່ງໃຫ້ຖ້ຽວບິນທັງໝົດໄປລົງທີ່ສະໜາມບິນອື່ນ ແລະ ທາງການໄຊປຣັສປິດໃຫ້ບໍລິການສະໜານບິນຊົ່ວຄາວ ຈົນຄົນຮ້າຍຍື່ນຂໍ້ຮຽກຮ້ອງຂໍລີ້ໄພໃນປະເທດໄຊປຣັສ ລວມທັງຂໍພົບກັບຄົນຮັກເກົ່າທີ່ແຍກທາງກັນ ເຈົ້າໜ້າທີ່ຈິ່ງພາຕົວມາແລະຈັບກຸມຄົ້ນຮ້າຍໃນທີ່ສຸດ.
ດ້ານເຈົ້າໜ້າທີ່ລະດັບສູງຂອງທ່າອາກາດສະຍານນະຄອນຫຼວງອະເລັກຊານເດຣຍ ລະບຸວ່າ ສັນຊາດຜູ້ໂດຍສານທີ່ມີຢູ່ເທິງເຮືອບິນໄດ້ແກ່ ອາເມລິກາ 8 ຄົນ, ອັງກິດ 4 ຄົນ, ເນເທີແລນ 4 ຄົນ, ແບນຊິກ 2 ຄົນ, ອິຕາລີ 1 ຄົນ ແລະ ທີ່ເຫຼືອເປັນຊາວເອຢິບ.