ສຳນັກຂ່າວຕ່າງປະເທດ ລາຍງານໃນວັນທີ 29 ມີນານີ້ວ່າ ໃນວັນຈັນທີ 28 ມີນາ 2016 ກອງທັບປົດປ່ອຍປະຊາຊົນຈີນ ໄດ້ມີຄຳສັ່ງໃຫ້ທະຫານໃນກອງທັບ ຈຳນວນກວ່າ 2.3 ລ້ານຄົນ ໃຫ້ຢຸຕິການຫາລາຍຮັບອື່ນໆທັງໝົດ ນອກເໜືອຈາກການເຮັດໜ້າທີ່ທະຫານ ພາຍໃນໄລຍະ 3 ປີຂ້າງໜ້າ ອັນເປັນສ່ວນໜຶ່ງຂອງນະໂຍບາຍ ເພື່ອສ້າງກອງທັບຈີນໃຫ້ກາຍເປັນກອງທັບ ທີ່ມີລະບຽບວິໄນເຂັ້ມງວດ ແລະ ມີຄວາມເຂັ້ມແຂງ ກຽມພ້ອມສູ້ຮົບຕະຫລອດເວລາ.

ຄຳສັ່ງດັ່ງກ່າວ ບໍ່ໄດ້ລະບຸຢ່າງຊັດເຈນ ກ່ຽວກັບຂອບເຂດຂອງການຫ້າມຫາລາຍຮັບເສີມ ແຕ່ໃນໄລຍະຜ່ານມາ ເປັນທີ່ຮັບຮູ້ທົ່ວໄປວ່າ ທະຫານໄດ້ມີລາຍຮັບອື່ນໆ ນອກຈາກການປະຕິບັດໜ້າທີ່ໃນກອງທັບເຊັ່ນ ການຮັບເງິນຈາກທຸລະກິດຫ້າງຮ້ານຕ່າງໆ ຕະຫລອດຮອດການມີສ່ວນຮ່ວມຂອງທະຫານ ໃນການດຳເນີນທຸລະກິດ ໃນຂົງເຂດອຸດສາຫະກຳ ແລະ ຄົມມະນາຄົມຂົນສົ່ງ ຊຶ່ງນຳໄປສູ່ການສໍ້ລາດບັງຫລວງ ທີ່ຂັດຕໍ່ລະບຽບວິໄນຂອງກອງທັບ ຕາມນະໂຍບາຍປາບປາມການສໍ້ລາດບັງຫລວງ ຂອງປະທານປະເທດຈີນ ສີຈິ້ນຜິງ.