ພິທີ​ມອບ-ຮັບ​ປ້າຍ “La Belle France Education” ເພື່ອຢັ້ງຢືນ​ຄຸນະພາບ​ທີ່​ດີເລີດ​ຂອງການ​ຮຽນ-ການ​ສອນ ສຳລັບຫ້ອງ​ສອງ​ພາສາລາວ-ຝຣັ່ງ ຂອງ​ໂຮງຮຽນ​ມັດທະຍົມ​ສຶກ​ສາສົມບູນ (​ມສ) ວຽງ​ຈັນ ຈັດ​ຂຶ້ນ​ວັນ​ທີ 26 ມີນາ 2016 ທີ່​ໂຮງຮຽນດັ່ງກ່າວ ມີ​ທ່ານ ລີ​ຕູ້ ບົວ​ປາວ ຮອງ​ລັດຖະມົນຕີ​ກະຊວງ​ສຶກ​ສາທິ​ການ ແລະ ກີລາ ທ່ານ​ນາງ ຄຼໍ​ດີນ ເລີ​ດຸກ (Claudine Ledoux) ເອກ​ອັກ​ຄະ​ລັດ​ຖະ​ທູດ​ຝຣັ່ງ ປະຈຳ​ລາວ ຄະນະ​ອຳນວຍ​ການ ພະນັກງານ​ຄູ-ອາຈານ ແລະ ແຂກ​ຖືກ​ເຊີນ ເຂົ້າ​ຮ່ວມ.

ທ່ານ​ນາງ ຄຳ​ຊ້ອຍ ວົງສຳພັນ ທີ່​ປຶກສາ​ໂຮງຮຽນ ​ມສ ວຽງ​ຈັນ ຄູ​ເຝິກ​ຂັ້ນ​ສູນ​ກາງ​ສອນພາສາ​ຝຣັ່ງ ໄດ້​ກ່າວ​ວ່າ: ​ສປປ ລາວ ແມ່ນ​ໜຶ່ງ​ໃນ​ບັນດາ 70 ປະເທດຂອງ​ກຸ່ມ​ປະເທດ​ທີ່​ມີ​ການສິດສອນ​ພາສາ​ຝຣັ່ງ ໃນ​ສາຍ​ວິທະ​ຍາ​ສາດ​ທຳ​ມະ​ຊາດ ວິທະຍາສາດ​ສັງຄົມ ແລະ ການ​ສອນສອງ​ພາສາ ເຊິ່ງ ​ມສ ວຽງ​ຈັນ ກໍ່​ເປັນ​ໂຮງຮຽນ​ໜຶ່ງ​ທີ່​ໄດ້​ສິດສອນພາສາ​ຝຣັ່ງ ມີ​ຜົນງານ​ອັນ​ໂດດເດັ່ນ ມີ​ຜົນ​ການ​ຮຽນ​ທີ່​ດີ ໄດ້​ມາດຕະ​ຖານ ເປັນ​ທີ່​ຍອມຮັບ​ໃນ​ລະດັບ​ສາກົນ.

ຈາກ​ເຫດຜົນ​ດັ່ງກ່າວ ລັດ​ຖະບານ​ຝຣັ່ງ ຈຶ່ງ​ໄດ້​ມອບ​ປ້າຍ “La Belle France Education” ເພື່ອ​ຢັ້ງຢືນ​ຄຸນະພາບ​ທີ່​ດີເລີດຂອງ​ການ​ຮຽນ-ການ​ສອນ ສຳລັບ​ຫ້ອງ​ສອງ​ພາສາ​ລາວ-ຝຣັ່ງ ໃຫ້​ກັບ​ໂຮງຮຽນ ​ມສ ວຽງ​ຈັນ ເປັນ​ໂຮງຮຽນ​ແຫ່ງ​ດຽວ​ໃນ ​ສປປ ລາວ ແລະ ເປັນ​ປະເທດ​ທຳ​ອິດໃນ​ພາກ​ພື້ນ (ອາ​ຊຽນ) ທີ່​ໄດ້​ຮັບປ້າຍ​ຢັ້ງຢືນ​ນີ້ ຈາກ​ລັດຖະບານປະເທດ​ຝຣັ່ງ ຜົນ​ປະໂຫຍດ​ທີ່​ຈະຕາມ​ມາ​ຄື: ຄູ-ອາຈານ ແລະ ນັກຮຽນ ຈະ​ມີ​ໂອກາດໃນ​ການເຂົ້າ​ອົບຮົມ ຍົກ​ລະດັບ​ການ​ສຶກສາຈາກ​ໂຄງການ​ຕ່າງໆ ​ທີ່​ກ່ຽວຂ້ອງ​ກັບ​ການ​ນຳ​ໃຊ້​ພາສາ​ຝຣັ່ງ ​ທີ່ຈະ​ຕາມ​ມາ​ໃນ​ອະນາຄົດ.