ພິທີ​ມອບ-ຮັບ​ລົດຈັກ ຈຳນວນ 140 ຄັນ ໃຫ້​ແກ່​ຫ້ອງການ​ຍຸຕິທຳ​ເມືອງ ໃນ​ຂອບ​ເຂດ​ທົ່ວ​ປະເທດ ຈັດ​ຂຶ້ນ​ວັນ​ທີ 25 ມີນາ 2016 ທີ່​ກະຊວງ​ຍຸຕິ​ທຳ ໂດຍກ່າວ​ມອບ​ຂອງ​ທ່ານ ບຸນ​ເກີດ ສັງສົມ​ສັກ ລັດຖະມົນຕີກະຊວງ​ຍຸຕິທຳ ແລະ ກ່າວ​ຮັບ​ຂອງ​ບັນດາຫ້ອງການ​ຍຸຕິ​ທຳ​ເມືອງ​ທົ່ວ​ປະເທດ ໂດຍ​ມີ​ທ່ານ ນາ​ແອມ ສາເລັງ ເອກ​ອັກ​ຄະ​ລັດ​ຖະ​ທູດ ບຣູໄນ​ດາ​ລູ​ຊາ​ລາມ ປະຈຳ​ລາວ ບັນດາ​ຫົວໜ້າ​ກົມ ສະ​ຖາ​ບັນ ແລະ ຫົວໜ້າ​ຫ້ອງການ​ຍຸຕິ​ທຳ​ເມືອງທົ່ວ​ປະເທດ ເຂົ້າ​ຮ່ວມ.

ໂອກາດ​ນີ້ ລັດຖະມົນຕີ​ວ່າການກະຊວງ​ຍຸຕິ​ທຳ ກ່າວ​ວ່າ: ຍ້ອນ​ເຫັນ​ໄດ້​ຄວາມ​ຈຳເປັນຂອງ​ວຽກ​ງານ​ຍຸຕິ​ທຳ​ຢູ່​ທ້ອງຖິ່ນຮາກ​ຖານ ລັດຖະບານ​ແຫ່ງ​ບຣູໄນ​ດາ​ລູ​ຊາ​ລາມ ຈຶ່ງ​ໄດ້​ຕອບ​ສະໜອງ​ຄຳ​ສະເໜີ​ຈາກ​ກະຊວງ​ຍຸຕິທຳ ປະກອບ​ທຶນຮອນ ຈຳນວນ 200.000 ໂດ​ລາ​ສະຫະລັດ (1,6 ຕື້​ກວ່າ​ກີບ) ໃນ​ການ​ສະໜອງ​ລົດຈັກໃຫ້​ຫ້ອງການ​ຍຸຕິ​ທຳ​ເມືອງ ໄດ້​ນຳ​ໃຊ້​ເຂົ້າ​ໃນ​ການ​ປະຕິບັດໜ້າທີ່​ວຽກ​ງານ​ຂອງ​ຕົນ ເຊິ່ງການ​ຊ່ວຍເຫຼືອ​ຄັ້ງ​ນີ້​ຂອງ​ລັດ​ຖະບານ​ບຣູ​ໄນ ສະແດງ​ເຖິງ​ສາຍພົວພັນ​ທີ່​ສ້າງສັນ ເຂົ້າໃຈ​ກັນ ນັບ​ມື້​ນັບ​ເພີ່ມ​ທະວີ ແລະ ກ້າວ​ສູ່ລວງ​ເລິກ.