ປາກີສະຖານ ແລະ ອີຣານປະກາດຍົກລະດັບຄວາມສຳພັນທາງເສດຖະກິດ ແລະ ເປີດດ່ານຊາຍແດນອີກ 2 ຈຸດ ເພື່ອເພີ່ມມູນຄ່າການຄ້າ.
ສຳນັກຂ່າວຕ່າງປະເທດລາຍງານວ່າ ລັດຖະບານປາກີສະຖານ ແລະ ອີຣານຕົກລົງໃນທ້າຍອາທິດທີ່ຜ່ານມາ ຈະຍົກລະດັບຄວາມສຳພັນທາງເສດຖະກິດ ພ້ອມທັງເປີດດ່ານຊາຍແດນອີກ 2 ຈຸດ ເພື່ອເພີ່ມການຄ້າລະຫວ່າງ 2 ປະເທດ ສູ່ລະດັບ 5 ຕື້ໂດລາ ພາຍໃນປີ 2021, ຖະແຫຼງການຂອງນາຍົກລັດຖະມົນຕີປາກີສະຖານທ່ານ ນາວາຊ ຊາຣີຟ ລະບຸວ່າ ທ່ານ ຮັສ ຊັນ ໂຣຮານີ ປະທານາທິບໍດີອີຣານ ທີ່ເດີນທາງຢ້ຽມຢາມປາກີສະຖານຢ່າງເປັນທາງການເປັນເວລາ 2 ວັນໄດ້ພົບປະຫາລືກັບທ່ານ ຊາຣີຟ ໃນປະເດັນຕ່າງໆທີ່ເປັນຜົນປະໂຫຍດຮ່ວມກັນ “ຄວາມສຳພັນດ້ານການຄ້າ ແລະ ເສດຖະກິດ ທີ່ໄດ້ຮັບຜົນກະທົບຈາກມາດຕະການລົງໂທດສອງຝ່າຍໄດ້ຕົກລົງກັນທີ່ຈະເສີມສ້າງຄວາມສຳພັນທະວີພາຄີທາງດ້ານການຄ້າ, ເສດຖະກິດ ແລະ ພະລັງງານ, ຫຼັງຈາກການພົບປະຫາລືທ່ານ ຊາຣີຟ ແລະ ໂຣຮານີ ຮ່ວມເປັນສັກຂີພະຍານ ການເຊັນລົງນາມຂໍ້ຕົກລົງຄວາມຮ່ວມມື 6 ສະບັບ ທາງດ້ານການຄ້າ ແລະ ເສດຖະກິດລວມເຖິງແຜນການຄວາມຮ່ວມມືຍຸດທະສາດການຄ້າ 5 ປີ ຊຶ່ງການຫາລືໄດ້ມີການຕົກລົງໃຫ້ເປີດດ່ານຊາຍແດນ 2 ຈຸດ ເພື່ອກະຕຸ້ນການຄ້າຂາຍລະຫວ່າງ 2 ປະເທດ.
ທ່ານ ໂຣຮານີ ກ່າວວ່າ ທັງສອງຝ່າຍໄດ້ຫາລືກັນເຖິງການສຳຫຼວດໂອກາດໃໝ່ໆສຳລັບຄວາມຮ່ວມມືດ້ານພະລັງງານ ຊຶ່ງລວມເຖິງການສົ່ງອອກໄຟຟ້າຈາກອີຣານໄປຍັງປາກິດສະຖານການສົ່ງເສີມການຄ້າທະວີພາຄີ ສຳຫຼວດຄວາມເປັນໄປໄດ້ໃນການຄ້າທາງທະເລລະຫວ່າງທ່າເຮືອກວາດາຂອງປາກີສະຖານກັບທ່າເຮືອຊາບາຮາຂອງອີຣານ ແລະ ເດີນໜ້າຂໍ້ຕົກລົງການຄ້າເສລີລະຫວ່າງສອງປະເທດ.