ເພື່ອສົ່ງເສີມການປະດິດຄິດແຕ່ງຂອງນັກປະພັນນັກກະວີໃຫ້ນຳໃຊ້ຄວາມສາມາດ ແລະພອນສະຫວັນຂອງຕົນເຂົ້າໃນການປະກອບສ່ວນສ້າງສັນບົດປະ ພັນວັນນະຄະດີ ປະກອບສ່ວນໃຫ້ວົງການວັນນະກຳລາວນັບມື້ ອຸດົມສົມບູນ ແລະເພື່ອເຮັດໜ້າທີ່ເປັນເວທີສົ່ງເສີມການປະພັນວັນນະຄະດີ ທັງເປັນການປຸກລະດົມການປະດິດຄິດແຕ່ງດ້ານວັນນະກຳໃຫ້ເປັນຂະບວນຟົດຟື້ນ ແລະຂະຫຍາຍຕົວຢ່າງກ້ວາງຂວາງ, ຕໍ່ເນື່ອງຮັບປະກັນທາງດ້ານຄຸນນະພາບ ແລະມີປະລິມານນັບມື້ນັບຫຼາຍຂຶ້ນ.
ໃນວັນທີ 25 ມີນາທີ່ຜ່ານມາໄດ້ມີການຈັດພິທີມອບລາງວັນສິນໄຊ ແລະວັນນະກຳສ້າງສັນດີເດັ່ນ ປະຈຳປີ 2015 ຂຶ້ນ ທີ່ໂຮງແຮມດາວວຽງ ນະຄອນຫຼວງວຽງຈັນ, ໂດຍການເປັນທານຂອງ ທ່ານ ບົວເງິນ ຊາພູວົງ ລັດຖະມົນຕີຊ່ວຍວ່າການກະຊວງຖະແຫຼງຂ່າວວັດທະນະທຳ ແລະທ່ອງທ່ຽວ ມີຄະນະພັນລະຍາການນຳ, ສະມາຄົມນັກປະພັນ-ນັກກະວີ, ຄະນະພະສົງ, ນັກຂຽນຮຸ່ນໃໝ່ ແລະເກົ່າ, ພ້ອມແຂກທີ່ຖືກເຊີນ ແລະນັກຂ່າວເຂົ້າຮ່ວມຢ່າງພ້ອມໜ້າ.
ງານດັ່ງກ່າວນີ້ ມີຜູ້ສົ່ງບົດເຂົ້າແຂ່ງຂັນທັງໝົດ 254 ບົດ ໃນນັ້ນມີ ເລື່ອງສັ້ນ 87 ບົດ, ບົດກະວີ 158 ບົດ ແລະບົດນະວະນິຍາຍ 9 ບົດ. ການຕັດສິນລາງວັນເລື່ອງສັ້ນ, ບົດກະວີ ແລະນະວະນິຍາຍແມ່ນໄດ້ຕັດສິນ ເປັນ 2 ຮອບຄື: ຮອບຄັດເລືອກຄະນະກຳ ມະການປະກອບດ້ວຍຄະນະອຳນວຍການວາລະສານວັນນະສິນ 3 ທ່ານຄື: 1. ທ່ານ ໂອທອງ ຄຳອິນຊູ ຫົວໜ້າອຳນວຍການວາລະສານວັນນະສິນ. 2, ທ່ານ ສິນສະຫວັນ ເຄື່ອງເທພາລິດ ຮອງຫົວໜ້າອຳນວຍການຝ່າຍເນື້ອໃນ 3, ທ່ານ ນາງ ສົມພອນ ທຸມມະວົງ ຮອງຫົວໜ້າອຳນວຍການຝ່າຍບໍລິຫານ ໂດຍໄດ້ຄັດເລືອກຈາກເລື່ອງສັ້ນທັງໜົດທີ່ສົ່ງມາ 87 ບົດ ເຂົ້າຮອບ 4 ບົດ ແລ້ວ ສົ່ງໃຫ້ຄະນະກຳມະການຕັດສິນລາງວັນ ເພື່ອອ່ານແລະຕັດສິນໃນຮອບສຸດທ້າຍຄະນະກຳມະການຊຸດນີ້ປະກອບມີ 5 ທ່ານ ຄື: 1. ທ່ານ ທອງໃບ ໂພທິສານ ຮອງຫົວໜ້າຫ້ອງການກະຊວງຖະແຫຼງຂ່າວວັດທະນະທຳ ແລະທ່ອງທ່ຽວ ປະທານສະມາຄົມນັກປະພັນລາວ. 2 ທ່ານ ນາງ ຜິວລາວັນ ຫຼວງວັນນາ ຮອງປະທານສະມາຄົມນັກປະພັນລາວ 3. ທ່ານ ສຸບັນ ຫຼວງລາດ ຫົວໜ້າສູນວັດທະນະທຳເດັກ ກະຊວງຖະແຫຼງຂ່າວວັດທະນະທຳ ແລະທ່ອງທ່ຽວ ຮອງປະທານສະມາຄົມນັກປະພັນລາວ 4, ທ່ານ ສົມສຸກ ສຸກສະຫວັດ ຄະນະບໍລິຫານງານສະມາຄົມນັກປະພັນລາວ 5, ທ່ານ ນາງ ສົມພຽນ ພົງສະຫວັດມີໄຊ ຮອງຫົວໜ້າກົມພິມຈຳໜ່າຍ. ຄະນະກຳມະການທັງ 5 ທ່ານໄດ້ອ່ານ ແລະໃຫ້ຄະແນນຕາມ 6 ມາດຖານຄື: ເນື້ອໃນ, ວິທີການປະດິດແຕ່ງ, ຫຼັກການປະພັນ, ພາສາ, ສິລະປະການແຕ່ງ, ຄຸນຄ່າທາງວັນນະກຳ.
ຜ່ານການຮວມຄະແນນຕົວຈິງຜົນການຕັດສິນສຳລັບປີນີ້ອອກມາຄື: ປະເພດເລື່ອງຍາວນະວະນິຍາຍບົດທີ່ໄດ້ຮັບລາງວັນທີ 1 ມີ 243 ຄະແນນໄດ້ຮັບເງິນສົດ 4 ລ້ານກີບ ພ້ອມໃບຢັ້ງຢືນ. ເລື່ອງສັ້ນທີ່ໄດ້ຮັບລາງວັນທີ 1 ມີ 249 ຄະແນນໄດ້ຮັບເງິນສົດ 3 ລ້ານກີບ ພ້ອມໃບຢັ້ງຢືນ ແລະບົດກະວີທີ່ໄດ້ຮັບລາງວັນທີ 1 ມີ 259 ຄະແນນ ໄດ້ຮັບເງິນສົດ 2,5 ລ້ານກີບ ພ້ອມໃບຢັ້ງຢືນ. ສຳລັບ ບົດທີ່ໄດ້ຮັບລາງວັນຊົມເຊີຍມີ 11 ບົດ, ໃນນັ້ນມີເລື່ອງຍາວ 1 ບົດ ເລື່ອງສັ້ນ 5 ບົດ ແລະບົດກະວີ 5 ບົດໄດ້ຮັບເງິນສົດ 8 ແສນກີບ ພ້ອມໃບຢັ້ງຢືນ.
ທີ່ມາ: