ເນື່ອງໃນໂອກາດສະເຫຼີມສະຫຼອງວັນຟຣັງໂກໂຟນີ ປະຈໍາປີ 2016 ໃນຕອນເຊົ້າວັນທີ 26 ມີນາ 2016 ທີ່ສະໂມສອນໂຮງຮຽນມັດທະຍົມສົມບູນ (ມສ) ວຽງຈັນ ເມືອງຈັນທະບູລີ ນະຄອນຫຼວງວຽງຈັນ ທ່ານນາງ ກະໂລດິນ ເລີດູ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງປະເທດຝຣັ່ງ ປະຈໍາ ສປປ.ລາວ ໄດ້ຕາງໜ້າໃຫ້ລັດຖະບານປະເທດຝຣັ່ງ ມອບນາມະຍົດປ້າຍໂຮງຮຽນຄຸນະພາບດ້ານການສຶກສາແຫ່ງທໍາອິດໃນ ສປປ.ລາວ ແລະ ເປັນແຫ່ງທໍາອິດໃນບັນດາປະເທດທີ່ໃຊ້ພາສາຝຣັ່ງ ຢູ່ລະດັບພາກພື້ນອາຊີ ໂດຍການເຂົ້າຮ່ວມຂອງທ່ານ ລີຕູ້ ບົວປາວ ຮອງລັດຖະມົນຕີກະຊວງສຶກສາທິການ ແລະ ກີລາ ທ່ານ ຂວັນຕາ ພະລິວົງ ຫົວໜ້າກົມເອີຣົບ-ອາເມຣິກາ ກະຊວງການຕ່າງປະເທດ ທັງເປັນຜູ້ປະສານງານລະ ດັບຊາດຟຣັງໂກໂຟນີ ປະຈໍາ ສປປ.ລາວ ມີຫົວໜ້າຫ້ອງການກະຊວງສຶກສາທິການ ແລະ ກີລາ ບັນດາຄະນະອໍານວຍການ ຄູ-ອາຈານ ແລະ ນັກຮຽນ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ອາຈານ ຄໍາຊ້ອຍ ວົງສໍາພັນ ຄູເຝິກອາຈານສອນພາສາຝຣັ່ງ ທັງເປັນທີ່ປຶກສາໂຮງຮຽນ ມສ.ວຽງຈັນ ໄດ້ໃຫ້ຮູ້ວ່າ ການຮັບນາມະຍົດເປັນໂຮງຮຽນໂຕແບບຄຸນະພາບດ້ານການຮຽນ-ການສິດສອນພາສາຝຣັ່ງໃນຄັ້ງນີ້ ຖືເປັນຄວາມພາກພູມໃຈຢ່າງຍິ່ງທີ່ນໍາເອົາຊື່ສຽງມາສູ່ປະເທດຊາດ ເຮັດໃຫ້ບັນດາປະເທດຕ່າງໆໃນທົ່ວໂລກທີ່ໃຊ້ພາສາຝຣັ່ງຮູ້ຈັກ ສປປ.ລາວ ຫຼາຍຂຶ້ນ ແລະ ມີບົດບາດສໍາຄັນອີກກ້າວນຶ່ງໃນລະດັບພາກພື້ນ-ສາກົນ ນອກນີ້ ກໍຖືວ່າເປັນແບບຢ່າງອັນດີໃຫ້ແກ່ໂຮງຮຽນແຫ່ງຕ່າງໆນັບທັງພາກລັດ-ເອກະຊົນພາຍໃນປະເທດ ແລະ ເປັນຂວັນກໍາລັງໃຈໃຫ້ຄະນະບໍລິຫານການສຶກສາ ຄູ{ອາຈານ ໄດ້ມີຄວາມຫ້າວຫັນ ບຸກໜ້າບືນໂຕ ສ້າງໂຮງຮຽນຂອງຕົນໃຫ້ກາຍເປັນໂຕແບບຄຸນະພາບໃນອະນາຄົດ ປັດຈຸບັນ ຢູ່ໂຮງຮຽນ ມສ.ວຽງຈັນ ມີນັກຮຽນທີ່ພວມສຶກສາຢູ່ແຕ່ລະດັບຊັ້ນ ມ.1-ມ.7 ທັງໝົດ 2.999 ຄົນ ມີ ຄູ-ອາຈານ 168 ຄົນ ໃນນັ້ນ ຄູສອນພາສາຝຣັ່ງ ມີ 25 ຄົນ ຍິງ 17 ຄົນ ມີຫ້ອງຮຽນ 83 ຫ້ອງ ໃນນັ້ນ ມີຫ້ອງຮຽນ 2 ພາສາ 15 ຫ້ອງ ຫ້ອງຮຽນພອນສະຫັວນ 14 ຫ້ອງ ຫ້ອງຮຽນບີແລັງ 14 ຫ້ອງ ນອກນີ້ ຍັງມີຫ້ອງຮຽນທາງອິນເຕີເນັດ ຫ້ອງໄອທີ ແລະ ຫ້ອງອື່ນໆອີກຈໍານວນນຶ່ງ.

ແຫລ່ງຂ່າວຈາກ: ວິທະຍຸ-ໂທລະພາບນະຄອນຫຼວງ