ພາຍຫຼັງທີ່ໄດ້ດຳເນີນການກໍ່ສ້າງມາແຕ່ປີ 2013 ໂດຍບໍລິສັດ ດວງດີກໍ່ສ້າງຂົວ-ທາງ ຈຳກັດ ເປັນຜູ້ຮັບເໝົາສຳປະທານ ດ້ວຍຄວາມຍາວຂອງເສັ້ນທາງຫຼາຍກວ່າ 40 ກິໂລແມັດ ຈາກທາງ 2 ເລນມາເປັນ 4-6 ເລນ ໃຫ້ໄດ້ເສັ້ນທາງໃນລະດັບມາດຕະຖານສາກົນຮອງຮັບການເຊື່ອມໂຍງ AEC ປັດຈຸບັນ ເສັ້ນທາງດັ່ງກ່າວສຳເລັດແລ້ວ 90% ຍັງເຫຼືອພຽງແຕ່ການປັບປຸງຄວາມລະອຽດຂອງເສັ້ນທາງ ແລະ ຂົວບາງແຫ່ງ.
ທ່ານ ອຸດອນ ແກ້ວດວງດີ ປະທານບໍລິສັດ ດວງດີກໍ່ສ້າງຂົວ-ທາງ ຈຳກັດ ໃຫ້ສຳພາດຕົ້ນເດືອນມີນາ 2016 ຜ່ານມາວ່າ: ເສັ້ນທາງເລກທີ 16W ຫຼື ເສັ້ນທາງປາກເຊ-ດ່ານຊາຍແດນສາກົນວັງເຕົ່າ ທີ່ມີຄວາມຍາວ 42,8 ກິໂລແມັດ ແຕ່ສົ້ນຂົວຂ້າມແມ່ນ້ຳຂອງ ບ້ານຄັນແຍງ-ດ່ານສາກົນວັງເຕົ່າ ເມືອງໂພນທອງ ແຂວງຈຳປາສັກ ໂດຍບໍລິສັດ ດວງດີກໍ່ສ້າງຂົວ-ທາງ ຈຳກັດ ລົງທຶນໃນເບື້ອງຕົ້ນຫຼາຍກວ່າ 30 ລ້ານໂດລາສະຫະລັດ (240 ຕື້ກີບ) ມາເຖິງປັດຈຸບັນ ຜ່ານການລົງຕິດຕາມ ແລະ ກວດກາຕົວຈິງ ເສັ້ນທາງດັ່ງກ່າວສຳເລັດແລ້ວຫຼາຍກວ່າ 90% ສ່ວນວຽກງານທີ່ຍັງເຫຼືອມີພຽງແຕ່ຄວາມລະອຽດຂອງເສັ້ນທາງ ແລະ ຂົວບາງແຫ່ງຈາກທີ່ມີທັງໝົດ 4 ຂົວ ຄາດວ່າຈະໃຫ້ສຳເລັດ ແລະ ເປີດນຳໃຊ້ເປັນທາງໃນທ້າຍປີ 2016 ນີ້.
ເສັ້ນທາງປາກເຊ-ດ່ານຊາຍແດນສາກົນວັງເຕົ່າ ຫຼື ເອີ້ນວ່າເສັ້ນທາງວັງເຕົ່າ-ຊ່ອງເມັກ (ປະເທດໄທ) ຈາກເດີມທີ່ມີ 2 ເລນຈະຖືກຍົກລະດັບມາເປັນ 4-6 ເລນ ທີ່ປູດ້ວຍຢາງອັດສະຟານ (ຢາງຂົ້ວ) ສາມາດຮັບນ້ຳໜັກໄດ້ 9,1 ໂຕນຕໍ່ເພົາ ເສັ້ນທາງດັ່ງກ່າວແມ່ນນອນໃນເສັ້ນທາງຍຸດທະສາດສຳຄັນ ໃນການເຊື່ອມຕໍ່ລະຫວ່າງປະເທດ ແລະ ອະນຸພາກພື້ນ ໂດຍສະເພາະແມ່ນ ການເຊື່ອມຕໍ່ລະຫວ່າງແຂວງຈຳປາສັກ ສປປ ລາວ ກັບແຂວງອຸບົນ ປະເທດໄທ ສຳລັບການເປີດປະຕູສູ່ AEC ເສັ້ນທາງດັ່ງກ່າວ ຈະມີຄວາມສຳຄັນກັບການຂົນສົ່ງທາງດ້ານການຄ້າ ເພື່ອເຊື່ອມໂຍງກັບບັນດາປະເທດໃກ້ຄຽງ ໂດຍສະເພາະແມ່ນ: ໄທ ຫວຽດນາມ ແລະ ກຳປູເຈຍ.
ຈຳປາສັກ ເປັນແຂວງໜຶ່ງທີ່ມີປະຊາກອນຢູ່ໃນອັນດັບ 3 ຂອງປະເທດ ປັດຈຸບັນ ລະບົບການພັດທະນາພື້ນຖານໂຄງລ່າງ ດ້ານເສດຖະກິດໄດ້ຮັບການພັດທະນາຢ່າງຕໍ່ເນື່ອງ ເປັນຕົ້ນແມ່ນຖະໜົນຫົນທາງຕ່າງໆ ລວມທັງເຂດເສດຖະກິດພິເສດທີ່ມີຢູ່ 2 ແຫ່ງ ທີ່ຈະຊ່ວຍຍົກລະດັບເສດຖະກິດຂອງແຂວງ ໃຫ້ກ້າວຂຶ້ນມາອີກລະດັບ ໂດຍສະເພາະ ໃນຍຸກຂອງການເຊື່ອມໂຍງປະຊາຄົມເສດຖະກິດອາຊຽນ (AEC) ຈຳປາສັກ ເປັນອີກແຂວງໜຶ່ງທີ່ນັກທຸລະກິດໃຫ້ຄວາມສົນໃຈເຂົ້າໄປລົງທຶນ ໃນຫຼາຍຂະແໜງການ ທັງດ້ານການບໍລິການ ການຄ້າ ກະສິກຳ ແລະ ກໍ່ສ້າງ.
ແຫລ່ງຂ່າວ:
