ລັດຖະບານເປີດໄຟຂຽວໃຫ້ບໍລິສັດບົວລະພາກະສິກຳ-ປ່າໄມ້ຈຳກັດແລະບໍລິສັດສະໂຕຣາເອັນໂຊລາວຈຳກັດສືບຕໍ່ປູກໄມ້ວິກໃນລາວພາຍຫຼັງກອງປະຊຸມນາຍົກ, ຮອງນາຍົກຮ່ວມ ກັບກະຊວງ ແລະທະບວງການກ່ຽວຂ້ອງ ເປີດຂຶ້ນເມື່ອຕົ້ນເດືອນມີນານີ້ເຫັນດີອະນຸຍາດໃຫ້ສອງບໍລິສັດນີ້ສືບຕໍ່ປູກໄມ້ວິກ ພ້ອມທັງໃຫ້ສ້າງໂຮງງານກັ່ນຊີວະພາບທີ່ແຂວງວຽງຈັນ ທີ່ມີມູນຄ່າການລົງທຶນໃນລະດັບຕື້ກວ່າໂດລາສະຫະລັດ.
ເພື່ອອຳນວຍຄວາມສະດວກໃຫ້ສອງບໍລິສັດນີ້ເຄື່ອນໄຫວໄດ້ສະດວກ, ຫ້ອງວ່າການລັດຖະບານຈິ່ງອອກແຈ້ງການເລກທີ 449/ຫລບ ກລຂ ລົງວັນທີ 22 ມີນາ 2016 ເຖິງບັນດາກະຊວງ, ແຂວງ-ອົງການທີ່ກ່ຽວຂ້ອງຊາບວ່າ: ເນື່ອງຈາກລັດຖະບານອະນຸຍາດການລົງທຶນໃຫ້ບໍລິສັດເພື່ອດຳເນີນການປູກໄມ້ວິກມາແຕ່ຕົ້ນປີ 1980 ດັ່ງນັ້ນການສະເໜີຂໍສືບຕໍ່ປູກໄມ້ວິກຄັ້ງນີ້ຈິ່ງບໍ່ຂັດກັບຄຳສັ່ງເລກທີ 13/ນຍ ຂອງນາຍົກລັດຖະມົນຕີສະນັ້ນ ຈິ່ງເຫັນດີອະນຸມັດໃຫ້ບໍລິສັດບົວລະພາກະສິກຳ-ປ່າໄມ້ຈຳກັດແລະບໍລິສັດສະໂຕຣາເອັນໂຊລາວຈຳກັດສືບຕໍ່ປູກໄມ້ວິກຕາມແຜນການການລົງທຶນຂອງບໍລິສັດ ແລະປູກເນື້ອທີ່ດິນປະມານ 3.049 ເຮັກຕາ ຢູ່ເມືອງ ຫີນເຫີບ, ແຂວງວຽງຈັນທີ່ບໍລິສັດໄດ້ສົມທົບກັບທ້ອງຖິ່ນສຳຫຼວດລະອຽດແລ້ວ, ນອກນັ້ນໃຫ້ປຸກລະດົມປະຊາຊົນປູກຕື່ມໂດຍເຮັດສັນຍາຊື້-ຂາຍກັບປະຊາຊົນຄັກແນ່ສຳລັບເນື້ອທີ່ລະດົມປະຊາຊົນປູກນັ້ນແມ່ນໃຫ້ກະຊວງກະສິກຳສຳຫຼວດກວດກາເຂດໃດຄວນປູກເຂດໃດບໍ່ຄວນປູກເພື່ອບໍ່ໃຫ້ກະທົບຕໍ່ສິ່ງແວດລ້ອມ, ດ້ານຫຼັກການເຫັນດີໃຫ້ສ້າງໂຮງງານກັ່ນຊີວະພາບດຳເນີນຕາມລະບຽບກົດໝາຍ.
ທ່ານ ນາງ ສຸໄພວັນ ທ່ຽງຈັນໄຊ ຮອງຜູ້ອຳນວຍການ ບໍລິສັດ ບົວລະພາ ກະສິກຳ-ປ່າໄມ້ຈຳກັດໃຫ້ສຳພາດວ່າ: ບໍລິສັດມີຄວາມພ້ອມທຸກດ້ານໂດຍສະເພາະເງິນທີ່ຈະລົງທຶນປູກໄມ້ໃນເມື່ອລັດຖະບານເປີດໄຟຂຽວຄືແນວນີ້ບໍລິສັດຈະເລັ່ງມືປູກໃຫ້ເປັນໄປຕາມແຜນຊຶ່ງຮອດປີ 2018 ແມ່ນຈະລົງມືສ້າງໂຮງງານຝານໄມ້ກ່ອນເພື່ອຮອງຮັບໄມ້ ທີ່ປູກໄປກ່ອນແລ້ວນັ້ນຄາດປີ 2018 ກໍ່ສາມາດຕັດເຂົ້າໂຮງງານຝານໄມ້ໄດ້ຊຶ່ງຄາດຄະເນການລົງທຶນຮອດປີເວລານີ້ຈະຢູ່ປະມານ 16 ລ້ານໂດລາສະຫະລັດ ແລະການປູກໄມ້ຮອດປີ 2022 ຈະ ໃຫ້ບັນລຸ 60 ພັນເຮັກຕາ ແລ້ວຈະລົງມື ກໍ່ສ້າງໂຮງງານກັ່ນຊີວະພາບຂະໜາດໃຫຍ່ທີ່ມູນຄ່າການລົງທຶນ 1 ຕື້ກວ່າໂດລາສະຫະລັດ ຊຶ່ງມຂະແໜງແຜ່ນແພ, ໄຟຟ້າ ແລະອື່ນໆສຳລັບປີນີ້ການປູກໄມ້ວິກມາຮອດປະຈຸບັນຫຼ້າຊ້າແລ້ວຄາດຄະເນຈະໄດ້ຢູ່ປະມານພັນເຮັກຕາ.