ວັນທີ 23 ມີນາຜ່ານມາທີ່ສູນການຄ້າວຽງຈັນເຊັນເຕີ ນະຄອນຫຼວງວຽງຈັນໄດ້ມີພິທີເປີດງານວາງສະແດງສິນຄ້າເຟີນີເຈີຄັ້ງທີ 1 ປະຈຳປີ 2016 ເພື່ອເປັນການຊຸກຍູ້ໃຫ້ຫົວໜ່ວຍທຸລະກິດມີການຜະລິດສິນຄ້າໄດ້ທັງດ້ານປະລິມານແລະຄຸນນະພາບ, ສ້າງມູນຄ່າເພີ່ມໃຫ້ແກ່ຜະລິດຕະພັນໄມ້ລາວໃຫ້ຫຼາຍຂຶ້ນຕາມລຳດັບ.
ເຂົ້າຮ່ວມງານດັ່ງກ່າວມີທ່ານຄຳບຸນນັດໄຊຍະນົນລັດຖະມົນຕີຊ່ວຍວ່າການກະຊວງກະສິກຳແລະປ່າໄມ້, ທ່ານສີສະຫວາດທິຣະວົງປະທານສະພາການຄ້າແລະອຸດສາຫະກຳແຫ່ງຊາດລາວ, ທ່ານເບີລີນເພັດຈັນທະລາດຫົວໜ້າ ພະແນກອຸດສາຫະກຳແລະການຄ້ານະຄອນຫຼວງ, ທ່ານຄຳໄພສົມຊະນະປະທານສະມາຄົມເຟີນີເຈີລາວ ພ້ອມດ້ວຍບັນດາຫົວໜ່ວຍທຸລະກິດເຟີນີເຈີລາວ 25 ຫົວໜ່ວຍ, ມາຈາກຕ່າງແຂວງ 4 ຫົວໜ່ວຍແລະບັນດາສື່ມວນຊົນເຂົ້າຮ່ວມ.
ທ່ານຄຳໄພສົມຊະນະກ່າວວ່າ: ງານວາງສະແດງສິນຄ້າດັ່ງກ່າວຈະດຳເນີນໄປຈົນເຖິງວັນທີ 1 ເມສາ 2016 ໂດຍງານວາງສະແດງສີນຄ້າເຟີນີເຈີວຽງຈັນນີ້ເກີດຂຶ້ນມາໄດ້ກໍຍ້ອນໄດ້ຮັບການຊ່ວຍເຫຼືອແລະຮ່ວມມືທີ່ດີຈາກອົງການປົກຄອງນະຄອນຫຼວງ, ສະພາການຄ້າແລະອຸດສາຫະກຳແຫ່ງຊາດ, ພິເສດແມ່ນຄະນະບໍລິຫານການ ແລະສະມາຊິກຂອງສະມາຄົມເຟີນີເຈີລາວເປັນຜູ້ໃຫ້ການສະໜັບສະໜູນ, ທັງນີ້ຍັງມີຄວາມໝາຍຄວາມສຳຄັນຢ່າງຍິ່ງຕໍ່ການຈະເລີນເຕີບໂຕຂອງຂະແໜງເຟີນີເຈີຫຼືສະມາຄົມເຟີນີເຈີລາວທີ່ໄດ້ເຕົ້າໂຮມແລະມີໂອກາດນຳເອົາບັນດາຜະລິດຕະພັນເຟີນີເຈີທີ່ເປັນຫົວຄິດປະດິດສ້າງຂອງຄົນລາວເຮົາມາວາງສະແດງຫຼືຈຳໜ່າຍຕໍ່ຊາວນະຄອນຫຼວງແລະຊາວຕ່າງປະເທດ, ທັງເປັນການຊຸກຍູ້ໃຫ້ຫົວໜ່ວຍທຸລະກິດມີການຜະລິດສີນຄ້າໃຫນັບມື້ນັບຫຼາຍຂຶ້ນໄປເລື້ອຍໆທາງດ້ານປະລິມານແລະຄຸນນະພາບ, ສ້າງມູນຄ່າເພີ່ມໃຫ້ແກ່ຜະລິດຕະພັນໄມ້ລາວຫຼາຍຂຶ້ນຕາມລຳດັບ, ປະກອບສ່ວນເຂົ້າໃນການສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງໄປເລື້ອຍໆແລະຍັງເປັນການສ້າງວຽກເຮັດງານທຳໃຫ້ກັບປະຊາຊົນລາວບັນດາເຜົ່າແລະໃຫ້ຫຼຸດຜ່ອນຈາກໄພຫວ່າງງານໄປເທື່ອລະກ້າວຊຶ່ງສອດຄ່ອງກັບແຜນພັດທະນາເສດຖະກິດສັງຄົມຂອງລັດວາງອອກ, ນອກຈາກນີ້ງານດັ່ງກ່າວກໍຍັງເປັນການສ້າງຄວາມພ້ອມໃຫ້ແກ່ພາກທຸລະກິດລາວໂດຍສະເພາະແມ່ນຂະແໜງເຟີນີເຈີໃນຍຸກ AEC ອີກດ້ວຍ.
ທີ່ມາ: