ສະ​ຖາ​ບັນ​ຄົ້ນຄວ້າ​ເສດຖະກິດແຫ່ງ​ຊາດ (​ສຄສ) ກະຊວງ​ແຜນການ ແລະ ການ​ລົງທຶນ ຈັດ​ກອງປະຊຸມ​ເຜີຍແຜ່​ບົດ​ລາຍ​ງານ​ເສດຖະ​ກິດ​ຂອງ ​ສປປ ລາວ ປະຈຳສົກ​ປີ 2014-2015 ແລະ ທ່າອ່ຽງ 2015-2016 ຂຶ້ນ​ໃນ​ວັນ​ທີ 23 ມີນາ 2016 ທີ່​ໂຮງແຮມແລນ​ມາກ ໂດຍ​ເປັນ​ປະທານຂອງ​ທ່ານ ​ດຣ. ບຸນ​ທະວີ ສີ​ສຸພັນທອງ ຮອງ​ລັດຖະມົນຕີ ກະຊວງແຜນການ ແລະ ການ​ລົງທຶນ ທ່ານ ​ດຣ. ລີ​ເບີ ລີ​ບົວ​ປາວ ຫົວໜ້າ​ສະ​ຖາ​ບັນ​ຄົ້ນຄວ້າ​ເສດ​ຖະກິດ​ແຫ່ງ​ຊາດ ທ່ານ​ຫົວໜ້າ​ກົມ ຮອງ​ກົມ ພະແນກການ​ອ້ອມຂ້າງ​ສູນ​ກາງ ອົງ​ການຈັດຕັ້ງ​ສາກົນ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ອີງ​ຕາມ​ຜົນ​ການ​ຄາດ​ຄະເນຂອງ​ສະ​ຖາ​ບັນ​ຄົ້ນຄວ້າ​ເສດຖະ​ກິດ​ແຫ່ງ​ຊາດ ເສດຖະກິດລາວ​ຄາດ​ວ່າ​ຈະ​ເຕີບ​ໂຕປະມານ 7,7% ໃນ​ສົກ​ປີ 2015-2016 ຕົ້ນຕໍ​ແມ່ນ​ຍ້ອນ​ຂະແໜງ​ພະລັງງານ​ໄຟຟ້າ ແລະ ອຸດສາຫະກຳປຸງ​ແຕ່ງ ຄາດ​ວ່າ​ຈະ​ປະກອບສ່ວນ​ຫຼາຍ​ຂຶ້ນ​ຕໍ່​ການ​ເຕີບ​ໂຕ​ໃນສົກ​ປີ 2016-2017 ຄາດ​ວ່າ GDP ຈະ​ເຕີບ​ໂຕ 7,9% ໃນ​ຂະແໜງ​ການ​ບໍລິການ ແລະ ພະລັງງານ​ໄຟຟ້າ ຈະ​ສືບຕໍ່​ຊຸກຍູ້​ເສດຖະ​ກິດ​ຢ່າງ​ແຂງແຮງ ຂະແໜງບໍ່​ແຮ່​ຈະ​ຄ່ອຍ​ປະກອບສ່ວນໜ້ອຍ​ລົງ ສຳລັບ​ເງິນ​ເຟີ້ ຄາດວ່າ​ຈະ​ສືບຕໍ່​ຢູ່​ໃນ​ລະດັບ​ຕ່ຳ ເປັນຕົ້ນ​ແມ່ນ​ຍ້ອນ​ລາຄາ​ນ້ຳມັນ​ຍັງມີ​ທ່າ​ອ່ຽງ​ຫຼຸດ​ລົງ ແລະ ເງິນ​ເຟີ້ຂອງ​ປະເທດ​ຄູ່​ຄ້າ​ຕົ້ນຕໍ​ມີ​ທ່າ​ອ່ຽງຕ່ຳ​ລົງ.